بؤیوك مبارز " نئلسون ماندلا " ابدیّته قووشدو!

                                           ح. راشدی   16/ 9 / 1392

  آپارتاید و آیری- سئچگیلیك علیهینه قیزغین مبارزه آپاران دونیانین ان تانینمیش اینسانی "نئلسون ماندلا" 14/ آذر /1392  ( 5 دسامبر 2013 میلادی ) تاریخینده ابدیّته قووشدو .

عیرقچیلیق و نژادپرستلیك علیهینه آمانسیز مبارزه آپاران دونیانین ان سئویملی و بؤیوك اؤندری " نئلسون ماندلا " نین اؤلومونو بوتون آزادلیق و اؤزگورلوك سئون و بو یولدا چالیشان اینسانلارا باش ساغلیغی وئریریك !

آیری- سئچگیلیك علیهینه عؤمور بویو مبارزه یه گیریشمیش و 27ایل استبداد دوستاغیندا قالاندان سونرا ، حاقلاری تاپدالانمیش ، شخصیتلری تحقیر اولموش و غیر اینسانی ظولملر آلتیندا قالان گونئی آفریقا قره دریلی اینسانلارین حاقلارینی مبارزه ایله اونلارا قایتاران بو بؤیوك اینسان ، مظلوم میلّتلرین حاقلاری یولوندا چالیشان مبارزلرین ابدی سیمگه سینه چئوریلدی !

نئلسون ماندلا گؤستردی كی، حاقلاری تاپدالانمیش و ظولوم آلتیندا قالان میلّتلره كیمسه آزادلیق و اؤزگورلوك هدیه ائتمیه جك و بو حاقلارا چاتماغا آمانسیز مبارزه لازیمدیر ، طبیعی كی ، بئله مبارزه لرده،استبداد دوستاق و اشكنجه سی ده مبارزلرین سوراغینا گله جك ، آمما بیر میلّتی آزادلیق و اؤزگورلویه چاتدیرماق هر آدامین ایشی دئییل ، طبیعی كی ، بو بؤیوك وظیفه و گؤره وی یالنیز بؤیوك و ایناملی اینسانلار داشییا بیلرلر .

 آزادلیق فضاسیندا نفس چكمك ، اؤز دیل ، مدنیت ، تاریخ ، كیملیك ، هویت و وارلیغی ایله یاشاماق و اونا فخر ائتمك سوی- كؤكوندن ، رنگ و اینانجیندان آسیلی اولمایاراق بوتون میلّتلرین و اینسانلارین طبیعی و نورمال حاقّی دیر ، كیمسه بو حاقلارین قاباغینی آلارسا اونونلا مبارزه ائتمك هر بیر آییق وجدانلی اینسانین میلّی وظیفه سی و گؤره وی دیر. نئلسون ماندلا گوستردی كی ، ان چتین شرایطده نا عادلانه قانونلارا ، نژادپرستلیك و آیری سئچگیلیگه اوستون گلمك مومكوندور .

نئلسون ماندلا میلّتینی آزادلیغا چاتدیراندان سونرا دئدی:

بیز، دشمنلریمیزی باغیشلاریق ، آمما اونلارین ائتدیكلری ظولملرینی هئچ زامان اونوتماریق!