یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

من دیلیم و مدنیّتیم یولوندا سوپورگه گؤتوروب یئر سوپوره‌رم (13)

+0 بَگَن (Bəyən)

من دیلیم و مدنیّتیم یولوندا سوپورگه گؤتوروب یئر سوپوره‌رم! (13)

                                           دوکتور هئیت‌دن اؤزل خاطیره‌لر  

                             حسن راشدی : 2 مرداد 1394 

سؤیله‌نیلن تاریخ: 1370 جی ایل ، مهر آیی  

مکان : ساوه شهری‌نین قره‌غان بؤلگه‌سی ، " مرَ‌غئی ( مراغه )"  کندی ، کند مسجدی

زامان : آخشام

1370 جی ایل مهر آیی نین ایلک گونلری‌ایدی . شرقی آذربایجانین گونئی منطقه سیندن اولوب تهران و کرجده یاشایان فعال گونئی‌لیلرین تلاشی ایله یارانان " شهریار درنگی " و ساوه تورکلریندن اولان بیرینجی درجه‌لی عدلیه وکیلی ، دیلیمیز و مدنیتیمیز یولوندا قیسا عؤمرونون سونونا قدر چالیشان رحمتلیک علی کمالی‌نین تلاشی‌ایله ساوه شهری‌‌نین  قره‌غان بؤلگه سینده یئرله‌شن و بو منطقه‌نین تانینمیش قاجار دؤرونون تورک شاعیری " حکیم تئلیم خان " ایله "اوستاد شهریار "ین خاطره سینی عزیزله مک اوچون  بیر ادبیات کاروانی حاضیرلانیب حکیم تئلیم خانین کندی اولان " مرَغئی - مراغه " کندینه گئتمیشدیک .

            


بو سفره 50 نفره یاخین تانینمیش شاعیر ، یازیچی و ادیب شخصیت‌لریمیزدن علاوه دیل و مدنیت یولوندا چالیشان باشقا هوسکارلاردا قاتیلمیشدی .

بو ادبی - مدنی کاروان ایچینده رحمتلیک اولانلاردان : دوکتور جواد هئیت ، دوکتور محمدعلی فرزانه ، عبدالکریم منظوری خامنه ، میر هدایت حصاری ، علی کمالی و یاشایانلاردان : مندن ( حسن راشدی ) علاوه حسن مجیدزاده ( ساوالان) ، اکبر آزاد ، حسین محمدخانی ( گونئیلی ) ، عبدالعلی مجازی ، حجت الاسلام ذاکری ، آغشین آغکمرلی ، اهرابی و باشقالاری وار ایدی .

ادبی کاروان مرَغئی کندینه چاتاندان سونرا داها هاوا قارانلیقلاشماقدا ایدی . کند ائولری‌نین ایچی کیچیک اولدوقدا و 50 نفره یاخین قوناقلارا بیر یئرده خدمات وئره بیلمه‌دیکلرینه گؤره و شام یئمه‌یی یاخینلاشدیغینا گؤره ادبی کاروان کند مسجیدینده یئرلشدی .هرکس ال - اوزونو  یویور استراحت ائتمه‌یه حاضیرلاشاندا آخشام اذانی رادیودان وئریلدی.  

            


مسجد خدّامی 50 نفری بیر یئرده گؤروب و کاروانین ایچینده باشی عمامه‌لی روحانی حجت الاسلام ذاکری‌نی‌ده گؤردوکده ، کاروان اعضاء لارینی بلکه مشهد و یا قوم زیارتچیلری ساناراق باشقالاریندان یاشلی و کاروانین آغ ساققاللاری کیمی گؤرونَن رحمتلیک دوکتور هئیت ، دوکتور فرزانه ، عبدالکریم منظوری خامنه ، میر هدایت حصاری و حاج آغا ذاکری‌نی بیر یئره توپلاییب سئوینجک حالدا دئدی :

یاخشی اولدو ناماز واختی اولدو ، حاج آغادا وار پئش ناماز اولماق اوچون ، حاج آغانین پئش نامازلیغی ایله هامیلیغا بیر یئرده جاماعات نامازی قیلاریق .

        


دوکتور هئیت اؤز رضایتینی بیلدیریب دستماز آلماغا حاضیرلاشاندا رحمتلیک اولموش ادیبلرین بیری کاروان اعضاءلاری‌نین جاماعات نامازی قیلماغا حاضیرلیقلاری اولمادیقلارینی سئزیب یاواشجا دوکتور هئیته دئدی:

" بودا واخت تاپیب جاماعات نامازی قیلماغا ها ! هر کس اؤزو نامازینی قیلاجاق دا !"

دوکتور هئیت دئدی :

" من دیلیم و مدنیّتیم یولوندا جاماعات نامازی قیلماق سهلدیر ، سوپورگه گؤتوروب یئر سوپوره‌رم !"

سونرا جاماعات نامازی قیلینیب ، مسجیدده شام یئییلدی .