+0 بَگَن (Bəyən)
میلّی - مدنی حاقلاریمیزا چاتماغا نه ائتمه لییك ؟
حسن راشدی 10 / 10 /1390
توركیه نین كورد سویلو و دیاربكر مجلیس وكیلی و BDP پارتیاسی عضوو اولان خانیم " لیلا زانا " توركیه كوردلری نین اؤز " آلین یازیلارینی تعیین ائتمك" اوچون توركیه دؤلتیندن كورد منطقه لرینده رفراندم كئچیرمه یی ایسته میشدیر .
لیلا زانا دئمیشدیر : " من اؤنجه دن دئمیشدیم توركیه كوردلری " اؤز اركلیك " (خودمختارلیق ) ایسته ییرلر لاكین بوگون دئییرم ایندی داها بوندان آرتیق ایستكلری وار " .
توركیه اؤلكه سینده كورد نماینده لری بو قدر دانیشماغا اؤزلرینه حق وئریررلرسه ، توركیه رادیو - تلویزیون و مطبوعاتی دا اونلارین بو دانیشیق و ایستكلرینی اؤلكه ایچیندن علاوه دونیانین هر یئرینه یاییرلار .
هله بو دانیشیق و ایستكلر توركیه نین آنا یاساسیندان قیراق و آنا یاساسینا ضد اولان ایستك دیر ، لاكین بو اؤلكه ده آزادلیق چرچیوه سینده اونون ایستكلری تام آزاد و سربست ، توركیه نین جمعی رسانه لرینده یاییلیر ، آما تاسف لر اولسون بیزیم آذربایجان نماینده لریمیز مجلسه گئدنده ان آزی آنا یاسانین 15 – جی ماده سیندن ده بئله دانیشماغا اؤزلرینه جرئت وئرمیرلر .
ایندی بیزیم مجلس وكیل لریمیز بو ایلكین و ابتدایی حاقدان دانیشمایان یئرده بیز نه ائتمه لی و مدنی ایستكلریمیزه چاتماق اوچون هانسی یولدا و نه سایاق حركت ائتمه لییك .
بو مسئله ایله باغلی سون زامانلاردا الكترونیكی مكتوب طریقی ایله مدنی فعالیتیمزله باغلی و " میللی بیرلیك " آدینا من دن اوچ سورغو اولموشدو ، من او سورغولارا جاواب یازدیم كی ، او جاوابلارین متنینی بوردا گتیریرم :
1 - سیزجه بیرلیگین تعریفی نئجه اولا بیلر ( بیرلیگی نئجه تعریف ائتمك اولار ) ؟
ج : "بیرلیك " سؤزده و لغوی آنلامدا "بیر " و " واحد " آنلامینی داشییر ، لاكین سیاسی ، اجتماعی ، مدنی و باشقا آلانلاردا : "هر بیر توپلوم ، پارتیا ، تشكیلات ، قوروم و حتی نئچه شخصین " دیلده ، فیكیرده و عملده " بللی بیر هدف و مقصداوچون و مشخص بیر چرچیوه ده چالیشمالارینا " بیرلیك " دئمك اولار . "
2 – میللی حركت آتمسفرینده تعریفله دیگینیز بیرلیگی نئجه گؤرورسونوز ؟
ج : آذربایجان میللی حركتی آزاد و دموكراتیك بیر حركت اولاراق دونیا سویه سینده تانینمیش اینسان حاقلارینا دایاناراق تاریخی آذربایجانین گونئی بؤلومونده یاشایان توركلرین ، یعنی ایران سرحدلری ایچه ریسینده یاشایان و رضاخان حاكمیته گلن گوندن بو گونه كیمی دیل ، مدنیت ، شخصیت ، تاریخ و هویت لری علیهینه یورودولن نژادپرستانه سیاسته قارشی ، مدنی مبارزه چرچیوه سینده و داها قاباریق شكیلده 1370 – جی ایلدن بو طرفه آذربایجان آیدینلاری طرفیندن باشلانمیش مدنی و اعتراضی حركت دیر .
بو حركت ، ایران چرچیوه سینده نفوس باخیمیندان نسبی اكثریته مالیك اولاراق اقلیت حاقلاریندان بئله فایدالانا بیلمه ین مدنی - فرهنگی ، اجتماعی ، سیاسی و اقتصادی سیخینتی لاردان علاوه ان ایلكین و ابتدایی اینسانی حاق ساییلان یعنی آنا دیلده تحصیل آلماقدان محروم قالان توركلرین حاقلارینی مدافعه ائتمك اوچون آذربایجان آیدینلاری طرفیندن باشلانمیش ، گئتدیكجه توپلومون مختلیف لایه لری اؤزللیكله بیلیم یوردو اؤیرنجیلری بو جریانا قوشولموش و اونا یئنی بیر روح وئرمیشدیر .
گونئی آذربایجان میللتی ایچیندن قایناقلانان بو حركت ، یالنیز بیر حزبی و گروهی حركت و چابا یوخ ، بلكه دونیا سویه سینده ، اوزللیكله ایران سیاسی سینیرلاری ایچینده یاشایان بوتون میللت لر و قومیت لرین حاقلارینا سایغی دویاراق گونئی آذربایجان توركلری و ایرانین مختلیف شهر و بؤلگه لرینده یاشایان باشقا توركلرین مدنی – فرهنگی ، اجتماعی ، سیاسی ، اقتصادی و باشقا ساحه لرده حاقلارینی قوروماق و هرجور آیری سئچگی لیك و آسیمیلاسیون سیاستینه قارشی حركت اولدوغوندان ، میللت طرفیندن " میللی حركت " آدلانمیشدیر .
طبیعی دیر میللی حركت آتمسفرینده میللی بیرلیگی قوروماق ان بیرینجی و ضروری وظیفه و گؤرو دیر و بو وظیفه نی یئرینه یئتیرمك اوچون میللی حركت چرچیوه سینده چالیشماق لازیمدیر و میللی حركت چرچیوه سینده چالیشماق اوچون شخصی و گروهی منافع و قازانج اوچون یوخ بوتون حركت و چابالار میللی منافع یولوندا اولمالی دیر .
میللی منافع و بیرلیگی قوروماق اوچون هر بیر میللتچی افراط و تفریطلی حركت لردن اوزاق قالمالی و هئچ بیر میللتچی باشقا میللتچی نین اؤزل حیات و یاشامینا آیاق قویمامالی و میللتچی لیك قوراللاری ایچینده حركت ائدن اینسانلارین كئچمیش اجتماعی – سیاسی دوروملارینی نظره آلاراق بوگونكو دوروم و حركتلرینی اساس توتمالی و میللی حركت و بیرلیگه ضرر وئرن بوتون مناقشه لی مسئله و موضوعلاردان اوزاق قالمالی دیر .
3 - داواملی ، اوزون سورن و دایانیملی بیرلیگین یارانماسینا نه یؤنتملر اؤنری سینیز ؟
ج : میللی حركتین بیرلیك و داوامینا فیكیرله شن هر بیر میللتچی بیلمه لی دیر ایران آدلی اؤلكه نین نسبی اكثریت نفوسو نو تشكیل ائدن توركلرین بو اؤلكه ده ابتدایی دن توتدو بیلیم یوردونون ( دانیشگاهین ) سونونا كیمی و بوتون تخصص لرده فارسلار قدری آنا دیلده تحصیل آلماق حاقلاریندان علاوه یاشامین بوتون ساحه لرینده فارسلاردان چوخ دئمیرم فارسلار قدری حاق و حقوقلاری وار ؛ بیر حالدا كی ، ایندی لیكده بو اؤلكه ده 30 میلیوندان چوخ جمعیتی اولان توركلرین 150 مین نفر حدودوندا جمعیتی اولان ائرمنی لر قدری ده آنا دیلده تحصیل آلماغا حاقلاری یوخدور !
بئله بیر دورومدا هئچ بیر میللتچی اؤزونه اجازه وئرمه مه لی دیر هله ان ایلكین و ابتدایی حاقلارینا چاتا بیلمه ین توركلرین مدنی مبارزه سی یولوندا تزلزل یاراتسین .
طبیعی دیر مدنی مبارزه یولوندا آددیملایان هر بیر میللتچی هئچ بیر مادّی منفعت و قازانج اوممادان و بوتون سیخینتی و بوغونتولارا رغما ایران اؤلكه سینده یاشایان بوتون اینسانلارین برابر حقوقا مالیك اولمالاری و نفوسلاری اساسیندا اؤلكه امكانلاریندان فایدالانمالاری و هر هانسی بیر میللت و قومیّتین باشقا میللتلر و قومیت لره اربابلیق ائتمه مه سی یولوندا چالیشماسینا داوام ائدیر .
بئله بیر دورومدا هر هانسی بیر منم - منملیك ، اؤزونو و سئودیگی شخص و قورومون یولونو ان دوزگون یول بیلیب باشقا میللتچی و مدنی مبارزلری یولونو آزان و حتی خائن آدلاندیرماق میللی حركتیمیزه ان بؤیوك ضربه دیر .
بیز حقیقی بیر میللتچی اولاراق دموكراسینی اؤزوموزدن باشلامالی و میللی منافع یولوندا فیكیر و عقیده میزله یوزه یوز موافق اولمایان لاكین بو یولدا اینام و ایمانلا چالیشان بوتون میللتچی لری ایچیمیزه آلمالییق ؛ بیزیم میللی حركتیمیز یالنیز حزبی و گروهی بیر حركت دئییل ، اونون ایچینده طبیب ، مهندس ، وكیل یازیچی ، شاعیر ، اؤیرتمن ، روحانی ، تاجیر و اؤیرنجی دن توتدو عادی ایشچی و اكینچی یه قدر چالیشانلاری وار ؛ طبیعی دیر بو گئننیشلیكده طیف ده فیكیر گئنیشلیگی ده چوخ اولمالی دیر و بیزیم حركتیمیزین اصالتی و اؤزللیگی ده ائله بوندادیر ؛ بو اوزدن بیز بوتون بو طیف لری نظره آلاراق هر بیر دانیشیق و حركتیمیزی معیّن چرچیوه ده و بوتون طیف لری ایچینه آلان میللی منافعیمیز اوزه رینده تنظیم ائتمه لییك .
لاكین هله ان ایلكین و ابتدایی مدنی – فرهنگی حقوقا چاتمادان فیكیر فرقلرینی مئیدانا آتیب میللی حركتیمیزه خلل یاراتماق هئچ بیر ایناملی میللتچی نین ذهنینه بئله دوشمه مه لی دیر .
داواملی ، اوزون سورن و دایانیملی بیر بیرلیگه چاتماق اوچون بوتون شخصی و گروهی منم لیگ لره گوز یوماراق وار گوج و قوه میزله و تام ایمان و ایناملا رضاخان حاكیمیته گلن گوندن بو گونه كیمی تاپدالانمیش میللی هویت و وارلیغیمیز، دانیلمیش دیلیمیز ، تحریف اولموش تاریخیمیز ، تحقیر اولموش شخصیتیمیز و بیر سؤزله یالنیز میللی حاقلاریمیز یولوندا چالیشمالییق !