(بؤلوم ۴)

🌒  قوتور سویو، شابیل، شعر- موسیقی و

اسرائیل حمله‌سی...!!

✍️ پنجشنبه ٢٢ خورداد ١۴٠۴ ناهاردان قاباق «آت‌گؤلو»نو گؤروب و منطقه آداملاری ، اؤزللیکله  شاهسون ائللری آراسیندا بو حاقدا دئییلن افسانه‌نی ائشیدندن سونرا «قوتورسویو» - «شابیل» طرفینه حرکت ائتدیک.

من ایلک دفعه ۶۵ - ۶۶ ایل قاباق یعنی۵ ـ۶ یاشیمدا و ١٣٣٨-١٣٣٩ جو ایل  رحمتلیک آنام و آتاملا «قوتور سویو» و  «شابیل» سویونا گلمیشدیم، او زامان کندیمیزدن «لاری» ( دؤلت دفترینده لاهرود) کندینه کیمی بوغدا داشییان یوک ماشینی اوستونده و لاری کندیندن ( ایندی شهرجیک اولوب) قوتورسو و شابیل‌ـه قَدر قاطیر- ائششک ایله گئتمیشدیک!

ایکینجی دفعه‌ده بو سولارا ١٣٩٢ جی ایل و ۵٣ ایل سونرا ۵٩ یاشیمدا و ماشینلا گئتمیشدیم، بو دفعه‌ده اوچونجوسو و ٧١ یاشیم اولان زامان گئدیردیم، دؤردونجوسونوده گئده‌جه‌یم یا یوخ، آللاه بیلیر!

آت گؤلونون داشلی- دره‌لی، گوللو چیچکلی یولونا داوام ائده‌رک «#سلطان_ساوالان» داغی آغ اؤرپَکلی قاری ایله گؤزوموز قارشیسیندا متانتله دایانمیشدی، بئله بیر گؤزل تابلونو سئیر ائدرکن «قوتور سویو» کندینه چاتدیق، آمما سویا دوشه بیلمه‌دیک، چونکو خانیملارین نوبتی‌ایدی. 

اینانین، من گؤردویوم ۶۶ ایل قاباق  قوتورسویو کندی‌نین دوکانلاری ایله بوگونکو دوکانلارین بیناسیندا چوخدا فرق یوخ ایدی، یالنیز دوکانلار قاباغی و دار- دودوک کوچه‌لر مینیک ماشینلارلا دولموشدو!

بوردا چوخ قالماییب «شابیل» سویونا طرف گئتدیک. 

منجه، شابیل مجتمعی، قوتور سویوندان داها بهداشتی سیستیمه مالیکدیر؛ بورادا سویا دوشوب چیمدیک، آز آدام واریدی. 

نظره گلیردی قوتور سویونون مشتری‌لری شابیل‌دن داها چوخ، آمما شابیلین تمیزلیگی داها اوستون‌ درجه‌ده ایدی.

شابیل سویوندا چیمندن سونرا تله‌سیک حالدا آللی کندینه و« ساوالان ایگیدلری» بومگردی مکانیمیزا قاییتدیق، چونکو ناهار یئمه‌میشدیک، ساعات بئشی کئچمیشدی، ساعات آلتی‌دا، خیاودا و شهر اورتاسیندا دا شعر- موسیقی برنامه‌سینده شرکت ائده‌جکدیک. 

سرعتله ناهار- شام یئمه‌یینی بیرلشدیریب بیر آز گئج اولسادا برنامه‌ده شرکت ائدیب گئجه ساعات ١٢حدودو «آللی» کندینه، استراحت مکانیمیزا قاییدیب باشیمیزی قویوب راحات خیال ایله یاتدیق.

      جمعه صبح، ٢٣ خورداد ١۴٠۴ فاجعه...!! 

جمعه صبح یوخودان دوروب صبحانه یئمه‌یه حاضیرلاشیب اینتئرنئت دونیاسینا باش چکنده، ایران خبر آژانسلاری‌نین شاشیردیجی خبرلرینه اینانا بیلمیردیک!! 

-اسرائیل ایرانا حمله ائدیب و چوخلو فرمانده‌لری شهید ائدیب...؟؟!! 

داوام ائده‌جک....

« کیتاب ائوی، سید قَفه‌سی، اسکی اؤیرنجی‌لر، بوم‌گردی کند موزه‌سی، آت گؤلو...» 

(بؤلوم ٣)

بو سَفَردن هدف، آذربایجانیمیزین تاریخی اثرلرینی و طبیعت گؤزللیکلرینی گؤرمک و امکان چرچیوه سینده، قیسادا اولسا شاعیر و ادبیاتچیلار ایله یاخیندان گؤروشمک اولدوقدا چرشنبه ٢١ خورداد ١۴٠۴ آخشام چاغی «شیخ حیدر عابیده‌سی» یانیندا شاعیرلرین شعرلرینی دینله‌ییب ساز سسینی ائشیدندن سونرا ائله همان مکانا یاخین محتشم «دنیز» کیتاب ائوینی و چئشیدلی کیتابلارینی  گؤروب «سید قفه‌سی» آدی ایله تانینان مکانا گئتدیک.

سید قفه‌سینده، ١٣٧۵-١٣٨٠ جی ایللرده تهراندا اؤیرنجی اولان، ایللر بویو گؤرمه‌دیگیمیز، ایندی‌ایسه باشلارینین توکلری آغاریب اورتا یاشلاریندا اولان چوخلو صمیمی اینسانلارلا گؤروشدوک؛ دوغروسونو دئمک ایسته‌سم، اونلارین ساچلاری‌نین آغاردیغینی گؤرَنده کَدَرلندیم، آخی من اونلارین گنجلیک و ٢٠-٢۵ یاشلاریندا اولدوقلارینی داها چوخ گؤرموشدوم! 

بو گؤروشدن سونرا آخشامی خیاو یاخینلیغیندا و «آللی» کندینده (دولت دفترینده «آلنی») «ساوالان ایگیدلری» آدیندا«بوم‌گردی» بیر مکاندان گوروش ائدیب گئجه‌نی بو گؤزل و روحوموزو اوخشایان مکاندا قالمالی اولدوق.

بورانی اداره ائدن و بئله بیر گؤرمه‌لی مکانا چئویرن «دوکتور عمار احمدی» یازیچی، محقق و «ساوالان ایگیدلری» انتشاراتی‌نین مدیری‌دیر.

بو مکانین اوتاقلاری کئچمیش ایللرده کند  یاشامیندا استفاده اولونان گئییم، ایش وسیله‌لری، توخونما، ال ایشلری و باشقا متنوع وسیله‌لر ایله بَزه‌نیب سوسلندیکده اینسانا باشقا بیر آرامش، جسم و روح راحاتلیغی بخش ائدیر!

گئجه، بوردا راحاتلیقلا یاتیب صاباحی پنجشنبه خوردادین ٢٢سی صبحانه دن سونرا تورپاق یول ایله ساوالانین اتگینده یئرله‌شن و افسانه‌لرده دئییلن بابک خرمی‌نین «قاراقاشقا» آتی‌نین ایلده بیر دفعه سودان چیخیب کیشنه‌دیگی و بابکی آختاریب مینمه‌یه چاغیردیغی، آمما بابک اولمادیغینا یئنه سویا باتیب بیر ایلدن سونرا یئنه همین زامان حرکتینی تکرار ائتدیگی مشهور و افسانه‌وی «آت گؤلو»نون یاخینلیغینا گئتدیک...!

داوام ائده جک...

«خیاو شهری، شاعیرلر محفلی...» 

(بؤلوم ٢)

تبریز زیارتیندن سونرا خوردادین ٢١-ی چرشنبه گونو ناهاردان سونرا آمما ناهار یئمه‌میش هریس یولو ایله، یعنی داغلی-دره‌لی، یاشیل و گؤزل طبیعت و  بو منطقه‌نین سرین هاوالی گونونده آذربایجانیمیزین خیاو (مشکین‌شهر) شهرینه طرف حرکت ائتدیک.

من ایلک دفعه ایدی بو یول ایله تبریزدن خیاوا گئدیردیم، تبریزدن بیرآز اوزاقلاشاندان سونرا  و سانیرام  «#هریس» طرفیندن، هاوا سرینلیگی و طبیعت گؤزللیگی باشلاندی. 

هاوانین درجه‌سی بو منطقه ده ١۶ ایله ٢٢ سانتیگراد آراسیندا دگیشیردی، بونو ماشینین ایچینده کی، اؤلچو مانیتوروندا گؤروردوک، بیر حالدا کی، تبریزده هاوا ایستی ایدی، یادیمدا دئییل، آمما احتمالا ٢٨- ٣٠ آراسی اولاردی.

بو منطقه ده هله بوغدا زمی‌لری یئنیجه باش آچمیشدی، بیر حالدا کی، بیزیم گئرمی منطقه‌سینده حتی سوتول مرحله‌سینی‌ده کئچمیشدی و ایکی هفته‌دن سونرا بوغدالار بیچیله بیلردی!

سانمایین منیم سَفَر یولداشلاریمین یاشی منه یاخین اولدوغونا بو سفر لذتلی ایدی؛ یوخ، من اونلاردان ایگیرمی ایل و داها چوخ یاشلی ایدیم، آمما بیزلری بیربیریمیزه باغلایان اورتاق ملّی دوشونجه‌لر و مشترک دویغولار ایدی!

طبیعت اؤز گؤزللیگینی قورویاراق ماشینی‌ و سوروجولویو ایله بیزه بو خاطره‌لی سفری دوغرولدان مهندس علی‌ رضایی‌نین عاشیق موسیقی‌سی‌ده اوره‌یییمیزی اوخشایاراق، «خیاو» شهری‌نین یاخینلیغیندا و ساعات ۵ حدودو ناهار - شام یئمه‌ییمیزی بیرلشدیریب یئدیکدن سونرا، شهر اورتاسیندا و شاه اسماعیلین آتاسی «شیخ_حیدر»ین محتشم مزاری و عابیده‌سی یانیندا قرار قویدوغوموز خیاو شاعیرلری محفل و مجلسینه قوشولدوق.

طبیعی کی، بو گؤروشده شعرلری اورکلری تسخیر ائدیب کؤورَلدن آذربایجانیمیزین مهارتلی و تانینمیش شاعیری «نادر_الهی» و ١٣٨٣-جو ایل ملّی وارلیغیمیز یولوندا ارمنی پیچاغی ایله تهراندا یارالانان و ١٣٨۴-جو ایل ستارخان مراسیمی و مزاری اوستونده آلاولی شعرلری ایله  مراسیمه قاتیلانلاری هیجانا گتیرن و ایندی دوغما شهری خیاودا یاشایان «آتیلا_کیشی_زاده» شاعیر دوستلاریمیزین اؤزل یئرلری واریدی...!

داوام ائده جک..