+0 بَگَن (Bəyən)
اوچ دوست و اوچ فیکیرداشین آذربایجان سفری...!
(سون بؤلوم، ۵ )
اردبیل گؤروشو، ایرانین هر یئری بومباران اولور، داها تهرانا قاییدیریق...!
جمعه خوردادین ٢٣-و صبحدن بومباران خبری هر یئری بؤروموشدو!
اسرائیل تهرانی بومباران ائتدی، فرمانده لری و هسته‌ای بیلگینلری تئرور ائتدی.
اصفهانی، نطنزی ووردو، تبریزی، کرمانشاهی و...!
خبر، خبر اوستوندن گلیردی، شاشیریب قالمیشدیق بو نه جریاندیر هئچ بیر ساواش هاواسی اولمادان بئله بیر اتفاق دوشدو!
ایران طرفیندنده سرعتلی عکس العمل‌دن خبر یوخ ایدی...!
بو خبرلری ایزلرکن نیگران حالدا «#اردبیل» شهرینه گئتدیک، گزی برنامه میزین بیر بؤلومو اردبیلی گزمک و تاریخی یئرلردن گؤرش ائتمک ایدی، آمما هر ساعات بومباران خبری و چوخلو اینسانلارین اؤلوم خبری گلیردی!
اردبیلده قالماغی قیسالدیب تهرانا قاییتماغا تصمیم توتدوق، چونکو عائله‌میز تهراندا بومباران آلتیندایدی!
اردبیلدن الی بوش قاییتماماق اوچون، «#کهرآلان» (کلخوران) منطقه‌سینه گئدیب بورادا یئرله‌شن «سید امین الدین جبرائیل» شیخ صفی‌نین آتاسی‌نین مزاریندان گؤروش ائتدیک.
بو مزاردان علاوه بورادا چوخلو اسکی مزار و بو مزارلارین یازیلی داشلاری یئرلشمیشدی، اگر بئله بیر اثر تورکیه‌ده اولسایدی، اونو گونده بلکه اون مین‌لر توریستلرین زیارت ائتدیگی مکانا چئویرردیلر!
تورکیه قالسین قیراقدا، شیراز و یا اصفهاندادا اولسایدی بو فصل‌ده، گونده مین‌لر توریست اوندان گؤروش ائدردی، آمما بورادا توریست‌دن، زاددان خبر یوخ‌ایدی !
«#شیخ_صفی» مجتمعیندن ده گؤروش ائده‌جکدیک کی، آذربایجانین « شاهی، شیخی، شاعیری» شاه اسماعیل سلطانیمیزین‌دا مزارینی زیارت ائدک، آمما اونا فورصت و امکان اولمادی!
منجه، حتی چوخلو آذربایجانلیلاردا بیلمیرلر #شاه_اسماعیل_صفوی نین مزاری‌دا بوردا و جدّی شیخ صفی مزاری‌نین یانیندادیر!
بیر گئجه‌ده اردبیلده قالیب صاباحی، شنبه ٢۴ خورداد زنجان- طارم یولو ایله تهرانا قاییتدیق، آمما سعید موغانلینی اردبیلده قویدوق کی، آناسی، تهران بومباران اولدوغونا گؤره سعیددن نیگران قالماسین و سعید گئتسین آناسینین یانینا کندلرینه.
تهرانا قاییداندا یول اوستونده قیزیل آذربایجان مرکزی، یعنی زنجان شهرینده دایانیب بیر دوست ایله بیرلیکده صبحانه یئییب، طارم منطقه‌سینه طرف حرکت ائتدیک؛ آذربایجانین بو گؤزل بؤلگه‌سینده ده گؤزل بیر توریستی رستوراندا صمیمی بیر ادیب، شاعیر و دوکتور دوستا ناهار قوناغی اولوب، زیتون باغیندان گؤروش ائدیب منجیل یولو ایله آخشامی تهرانا قاییتدیق و بو دؤرد گونلوک آذربایجان سفرینی سونا چاتدیردیق...!