بیر "تلگرام " یازیسیندا اولان بحث‌دن

                                  تورکلر یوخسا تاتلار آذربایجانلی‌دیرلار ؟

                                      حسن راشدی : 15اوردیبهشت1395
        

" آچیقلاما : نئچه آی اؤنجه بیر تلگرام یازیسندا بیر دوست، آذربایجان مسئله‌سی ایله باغلی مندن بعضی سورغولار ائتمیشدی ، منده اونا ائله تلگرام صحیفه سینده جاوابلار یازدیم ، ایندی او سورغولار و منیم جاوابلاریم ائله او صحیفه ده یازیلان کیمی سیز حؤرمتلی اوخوجولارا تقدیم اولور ؛ یالنیز او دوستون آدینی یازیب سوی آدی نین ایلک حرفینی بورادا گتیریرم ."

hasan rashidi, [24.10.15 16:13]

سلام حؤرمتلی محبوب. م  

 ایندی سیزین ایکینجی سورغولارین جاوابینی یازماق زامانی گلیب چاتیب . منی  باغیشلایین جاواب یازماق گئج اولدو . ایکی گون ؛ یعنی بیر گون بیر گئجه منیم اینتئرنئتیم کسیلمیشدی ، بو گون چالیشیر . حؤرمتلی و عزیز محبوب ، اگر سیز منیم یازدیغیم " ترکان و بررسی تاریخ ، زبان و ...." کیتابیمی اوخویوبسوزسا منیم اورادا  آذربایجاندا تورک دیلی‌نین باره سینده یازدیغیم مطلبلر تماما مستند اولاراق یازیلیب . یعنی هر بیر ادعایا رفرنس وئره رک سند گتیرمیشم مگر اینکه اؤزومون بیر مسئله باره‌ده مستقیل نظریم اولموش اولا ، اوندا اؤز نظریمی دئمیشم اودا یئنه باشقا نظریه‌لره استناد ائده رک .

hasan rashidi, [24.10.15 16:15]

سیز دئمیشکن بو گون ایرانین سیاسی چرچیوه سینده یاشایان ۴۰ ، ۳۵، ۳۰ ، ۲۰ و حتی ۱۵ میلیون نفوسو اولان تورکلرین، تاریخی آذربایجان ( شرقی، غربی آذربایجان ، اردبیل ، زنجان ، همدان ،آستارا ، ساوه  ، قزوین و ...) اراضی سینده یاشایانلارین مطلق اکثریتی تورکدور ، ایندی بو تورک اولماق ۷۰۰۰ ایل بوندان قاباقدان اولورسا اولسون و یا اونلار ۵ گون قاباق گئجه یاتمیش و سحر یوخودان دوروب گؤرموش اولوبلار دیللری تورک اولوب ! بونلارین هئچ بیریسی اونلارین انسانی و مدنی حقلرینی و آنا دیللرینده درس اوخوما حقلرینی چوخالدیب و یا آزالتماز . کئچمیشده کیمین دیلی نه اولوبسا  اونو یالنیز بیر دیل تاریخی کیمی مطالعه ائتمک اولار  آمما اوندان سوء استفاده ائدیب بیر میلّتین انسانی و مدنی حاقلاری اوستونه آیاق قویماق اولماز !

فارسلاریندا دیلی، چوخ معتبر دیل تاریخی اساسیندا اسلامدان قاباق و حتی سلجوقلارا قدر پهلوی دیلی ایمیش و بو دیل ایندی‌ده فارسلارین بعضی شهر و کندلرینده او جمله‌دن سمنان ، میمه ، نائین و کاشان اطرافیندا و ابیانه کندینده دانیشیلیر و بو دیلی اصفهان ، شیراز ، کرمان و تهران فارسلاری باشا دوشمورلر . فارسلارین قدیم دیلی بو ایمیش و یا بو لهجه‌یه یاخین بیر دیل. آمما ایندی اونلارین دانیشدیقلاری دیل بو گونکو " فارس " دیلی اولوب کی ، اصلینده بو دیله "دری " دیلی دئییلیب و اصلی‌ده افغانستاندا و تاجیکستاندا دانیشیلیرمیش و دانیشیلیر کی ، یازی و شعر دیلینه تبدیل اولوب و یاواش یاواش فارسلارین دانیشدیقلاری پهلوی دیلی‌نین یئرینه اوتوروب .

 ایندی کیم دئیه بیلر فارسلار بو دیلدن ال چکسینلر و یا بو دیلده یازیب - اوخوماغا حقلری یوخدور ، چونکو کئچمیشده اونلارین دیلی باشقا بیر دیل ایمیش !

hasan rashidi, [24.10.15 16:53]

آمما گلدیک سیزین سورغولارا : سیز دئییرسیز " آذربایجان " سؤزو تات سؤزودور "  و احتمالا فیکر ائدیرسیز بو مسئله دلیل اولا بیلر کی بورا  یعنی آذربایجان منطقه‌سی تات دیللی منطقه ایمش . من " آذربایجان " سؤزجویو باره‌ده اولان اوچ نظریه‌لرین اوچونوده سیزه یازدیم و بو نظریه‌لر اساس نظریه‌لردیر آذربایجان کلمه سی موردینده . یعنی آذربایجان سؤزجویونون یالنیز بیری " تات " سؤزجویوندن گؤتورولموش گؤستریلیر نه هر اوچو . بیری تورک سؤزلری‌نین ترکیبیندن گؤتورولموش ،ایکینجیسی مقدونیه‌لی اسکندرین آذربایجانداکی حاکیمی آدیندان گؤتورولمه‌سی و اوچونجوسوده قدیم " فرس " یا سیز دئمیشکن تات سؤزوندن گؤتورلموش بیر ترکیب اولا بیلر .

بو کلمه حتی "تات" سؤزوندن گؤتورلموش اولسا بئله یئنه دلیل اولا بیلمز بورانین کئچمیشده اکثریتی تات اولسون ؛ نییه ؟ مثلا : مصر اؤلکه سی‌نین مشهور شهرلری‌نین بیری نین آدی " اسکندریه " دیر . بو شهرین آدی مقدونیه نین بؤیوک و مشهور امپراتورو " الکساندر و یا مشهور اسکندر " آدیندان گؤتورولوب ؛ آیا ایندی دئمک اولار مصر اهالیسی‌نین دیلی کئچمیشده یونان و یا مقدونیه دیلی ایمش ؟ طبیعی کی یوخ .

 اصولا امپراتورلار ، سلطانلار و حاکیملر اله کئچیردیکلری و حؤکم سوردوکلری شهر و منطقه نین آدینی اؤز دیللرینده قویا بیلرلر ؛ آمما بو او دئمک دئییلدیر بو آد یوزده یوز ( ۱۰۰% ) او شهر و منطقه‌ده یاشایان انسانلارین دیلی‌نین نه اولدوغونو گؤستریر . طبیعی دیر اسکندر پارس و یا بو گونکو ایرانی اله کئچیرمه‌میشدن قاباق ، هخامنش شاهلاری ایران ، آذربایجان ، کیچیک آسیا ( بوگونکو تورکیه ) و بیر چوخ باشقا منطقه‌لره حاکیم ایمیشلر و اؤز ایسته دیکلری و اؤز دیللرینده او منطقه‌لره‌ده آد قویا بیلردیلر او جمله دن آذربایجانا . حتی مقدونیه لی اسکندر ایرانا حاکیم اولاندان سونرا ایراندا دیوان - دفتر دیلی یونان دیلی اولور و فارس منطقه سینده چوخلو یونان دیلینده یازیلمیش کتیبه لر تاپیلیب ، آیا بو کتیبه لرین فارس منطقه سینده تاپیلماسی فارس منطقه سینده یاشایانلارین آنا دیلی‌نین میلاددان قاباق یونان دیلی اولدوغونا دلیل اولا بیلرمی ؟

hasan rashidi, [24.10.15 17:19]

سیز دئییرسیز " کسروی نین نظریه سینی دیلچیلیک‌ده قبول ائدیرم و اونو حاقلی گؤرورم ؛ چونکو بوگونون اؤزونده آذربایجاندا تاتلار وار ، مثلا قره داغدا بیر نئچه کند تات دیللی دیر ." سایین محبوب . م  ، اگر کسروی‌نین نظریه سینی قبول ائدیرسیزسه بو نظریه‌نی هر یئرده قبول ائتمه‌لی‌سیز ، تکجه آذربایجاندا یوخ . مثلا ایرانین‌دا تقریبا بوتون اوستانلاریندا چوخلو تورک کندلری وار ، اودا حتی چوخ تعداددا ، مثلا نیشابور شهری نین ۴۶ ، سبزوارین ۱۰۹ و ایرانین لاپ جنوبوندا اولان و خلیج فارسا یاپیشان شهری اولان "بوشهر"ین ۵۷  تورک ساکینلی و یئرلی و بومی کندی وار ، آیا بو کندلرین بورالاردا اولماسی بو منطقه‌نین یئرلی اهالیسی‌نین اکثریت و اصلی و قدیم دیلی نین تورک اولدوغونا و بو منطقه‌لرده یاشایان فارس لارین دیلی‌نین سونرادان فارس اولماسینا دلالت ائدیرمی ؟

hasan rashidi, [24.10.15 17:40]

ایراندا تورک دیللی کندلری نین هانسی اوستان و شهرلرده و نه تعداددا اولدوغونا باخین منیم یازدیغیم " ترکان و بررسی ...." کیتابیمین ۱۲۲- ۱۲۴ جو صحیفه لرینه .

دئییرسیز "سلجوقلاردان قاباق آذربایجان اهالیسی نین اکثریتی تات دیللی ایمیشلر و زامان بویوندا ارییب تورکلشمیشلر ." حؤرمتلی محبوب بو دئدیکلرینیزه سندلی دلیل گتیرمه ییبسیز ، آمما باشقا فارسلارداندا بو ادعانی ائدنلر وار ، مثلا: اونلار بعضی عرب مورّخ لرینه استناد ائده رک دئییرلر کی ، یازیلیب : " آذربایجان و چوخلو ارمنستان اهالیسی‌نین دیلی فارسجا و عربجه دیر ، فارسجا بیلنلرین چوخو عرب دیلینی‌ده بیلیر ، مخصوصا تاجیرلر ."

حؤرمتلی محبوب ، بوردا بیر ظریف نکته وار ؛ بو عرب مورّخی‌نین یازدیغی جمله‌یه دقّت ائدین : " آذربایجان و ارمنستان اهالیسی‌نین چوخو نون دیلی فارس و عرب دیلی دیر ." اصلینده بو مورخ دئمک ایستیرمیش کی، آذربایجان و ارمنستان اهالی‌سی‌نین دانیشیق دیلی یوخ ، بلکه چوخونون یازی دیلی فارسجا و عربجه دیر . " یوخسا کیم بیلمیر کی ، آذربایجاندا و ارمنستاندا هئچ زامان عربلر اکثریت حالدا یاشاماییبلار کی،اونلارین اکثریت و دانیشیق دیللری عربجه اولسون . آمما طبعیی دیر بو منطقه‌ده فارس و عرب دیلی یازی دیلی اولوب. پس عرب تاریخچیسی‌نین نظری بوردا اهالی نین یازی دیلی دیر نه دانیشیق دیلی . طبیعی دیر او زاماندا آذربایجاندا فارسجا یازیب - اوخویانلار عربجه‌نی‌ده بیلیرمیشلر ، اؤزللیکله تاجیرلر اؤز پئشه لری ایله باغلی ، باشقا اهالی دن داها یاخشی عربجه نی بیلیرمیشلر . پس آذربایجاندا تاتلارین اکثریت اولدوغونا چوخ دلیللی سند یوخدور .

hasan rashidi, [24.10.15 18:28]

حؤرمتلی محبوب . سلجوقلار ایلک دفعه حاکیمیت باشینا گلدیکده ۴۲۹ هجری قمری ده نیشابور شهرینی ، ۴۳۳ هجری قمری ده " شهر ری " یی و سونرادا اصفهانی اؤزلرینه پایتخت سئچدیلر و موقتی و یایلاق پایتختلری‌ده همدان اولدو . اونلار ۱۶۰ ایل ایرانا حؤکم سوردولر آمما هئچ زامان آذربایجانین مشهور شهرلری اولان اردبیل ، تبریز ، اورمو ، زنجان و مراغه شهرلرینی اؤزلرینه پایتخت سئچمه دیلر ؛ بس نئجه اولدو سلجوقلار پایتختلری اولان شهرلرین یعنی نیشابور ، شهرری و اصفهان اهالیسینی کی ، طبیعی دیر هر یئردن چوخ اورالاردا اؤز تورک دیلداشلارینی ساکین ائتمیش اولسونلار تورکلشدیرمه دیلر آنجاق یوزلر بلکه ده مین‌لر کیلومتر اوزاقدا اولان آذربایجان شهرلری‌نین دیلینی تورکلشدیردیلر ؟!

hasan rashidi, [24.10.15 18:42]

سلجوقلار تورک دیلینی یوخ ، فارس دیلینی تقویت ائدیردیلر . اونلار فارس دیلینده شعر سؤیله ین شاعیرلره چوخلو انعاملار وئریردیلر. ائله اونا گؤره دیر سلجوقلار دؤرونده چوخلو فارس دیللی شاعیرلر مئیدانا گلدیلر او جمله دن : اوحدی مراغه ای ، اثیرالدین اخسیتکی ، بابا طاهر همدانی ، مسعود سعد سلمان ، ظهیرالدین فاریابی ، انوری ابیوردی ، نظامی گنجوی و باشقالاری . پس دئمک اولار سلجوقلار اصلینده فارس دیلینی اهالی یه تحمیل ائدیرمیشلر تورک دیلینی یوخ ، اودا فارس دیلینده شعر دییه‌ن شاعیرلره انعام وئرمکله .

البته طبیعی ایدی تاتلار آذربایجاندا یاشاییردیلار ، نئجه کی ایندی ده یاشاییرلار ، آمما اونلار اقلیت حالیندا یاشاییرمیشلار و زامان سوره سینده و نورمال حالدا اکثریت اولان تورکلرین ایچینده یاشادیقلاری اوچون اونلارین بیر عده سی تورکلشمیش اولا بیلرلر . نئجه کی ، صفوی‌لر زامانی تبریزدن اصفهانا کؤچدورولن و اصفهانین " عباس آباد " ( تبریزیها ) محله سینده ساکین اولان تبریزلیلر، اکثریتی فارس اولان اصفهانلیلارین ایچینده یاشادیقلاری اوچون بیر - ایکی نسیل سونرا فارسلاشدیلار و ایندی اصفهانین عباس آباد محله‌سینده داها تورکجه دانیشان او تبریزلیلردن خبر یوخدور . آمما تورکلرین آذربایجاندا اسکی زاماندان و هله سلجوقلاردان قاباق ساکین اولدوقلاری حاقدا " ترکان و ...." کیتابی نین ۷۲ الی ۱۱۲ جی صحیفه لرینی مطالعه ائدین و بو حاقدا دوشونون .  

       سیزه اوغورلار آرزولاییرام .