ایکی آذربایجانین نیسگیللی شاعیری 

                                      سهراب طاهیر دونیاسینی دگیشدی             

ایکی آذربایجانین نیسگیللی شاعیری "سهراب طاهیر"  1305 جی هجری شمسی ایل و مرداد آیی نین 15 ینده گونئی آذربایجانین آستارا شهرینده و صنعتکار عائله سینده دونیایا گؤز آچدی. 1320 جی ایل عائله سی ایله بیرلیکده تبریز شهرینده ساکین اولدو و 1325 جی ایل تحصیلینه داوام ائتمک اوچون قوزئی آذربایجانا و " باکی" شهرینه گئتدی. 1325 جی ایل آذربایجان نهضتی محمدرضا شاه قوشونو طرفیندن سرکوب اولوب گونئی آذربایجاندا سوی- قیریم باشلاندیقدا و گونئی آذربایجانا شوونیسم دیکتاتورلوغو حاکیم اولدوقدا سهراب طاهیر دانیشگاهدان فارغ التحصیل اولاندان سونرا داها گونئی آذربایجانا دؤنمه ییب " باکی " شهرینده قالارغی اولدو و  یاشاماغا داوام ائتدی.

 سهراب طاهیر آنا دیلیمیزده چوخلو شعرلر سؤیله میش و رومانلار یازمیشدیر. 1393- جو ایل شهریور آیی نین سونلاری و رحمتلیک دوکتور جواد هئیتین قیرخ مراسیمینده ، بیر تعداد دوستلارلا اونونلا ائوینده یاخیندان گؤروشوب ساعاتلار دردلشیب ، بعضی نیسگیللی شعرلرینی دینله ینده حتی آغلامیشدیق ! ایکی آذربایجانین گؤرکملی شاعیری سهراب طاهیر 4 مای 2016 ( 15 اوردیبهشت 1395 هجری شمسی ) و 90 یاشیندا باکی شهرینده وفات ائتمیشدیر . روحو شاد و یئری جنت اولسون .

 سهراب طاهیردن چوخلو شعر و رومان اثرلری یادگار قالیب ، اوجمله دن  :

• آی ایشیغیندا (۱۹۵6)
• حیات سئوگیسی (۱۹۶۱)
• قیریلان زنجیرلر (۱۹۶۵)
• منیم یولوم (۱۹۷۵)
• انقلاب قارتالی (۱۹۸۹)
• وطن خاطرینه (۱۹۹۸)  و .....

 

سهراب طاهیردن بیر شعر

          ساحیل

................................

دردی درد اولموشدو ائلینده منه،

آغلادیم، بیر نسیل گولنده منه،

هر کس آغلاماسین اؤلنده منه،

من هئچ واخت، هئچ زامان اؤلمرم داها

 

آزاد قارداشیم وار، اونونلا خوشام،

من گرک ساحیلی ساحیله قوشام،

ایکی بؤلونمکدن ائله قورخموشام

چؤپو ده ایکییه بؤلمرم داها!

 

دنیزلر، دریالار منه دایازدیر،

ان درین بیر چای وار، او دا آرازدیر.

منه گؤروش وئرین، آزادلیق آزدیر،

گؤروشسم، آیریلماق بیلمرم داها.

 

عؤمرومدن قوربت لر، یادلار، قووولسون،

کئچمیشیم، یییه سیز قالدی، قوی اولسون!..

آنجاق گلجه ییم منیم کی اولسون،

من اونو عؤمرومدن سیلمرم داها!

 

منیم سعادتیم هارداسا ایتدی،

او آسان گلمیشدی، آساندا گئتدی،

منه نه ائتدیسه سعادت ائتدی،

بدبخت سعادته گولمرم داها.

آنامین ألی

آنامین اللری یادیما دوشوب ،
اؤپوب گؤزوم اوسته قویماق ایسته رم
اَلینین کؤتَگی نئجه شیرین​​ دیر ،
شیرین کؤتَگیندن دویماق ایسته رم ...
حیرصله نیب او منی هردن دؤیَنده ،
یاشلی گؤزلرینی قیرپیب یوماردی ،
خیردا اللری نین تیتره ییشیندن،
نصیحت تؤکولور، اؤگود داماردی ... !