+0 بَگَن (Bəyən)
تیر آیی نین ایکینجی جمعه‌سی
میلّی قهرمان" خرّمدین بابک" ین دوغوم گونو
حسن راشدی : ۷ تیر ۱۳۹۶
۱۳۷۹ جو هجری شمسی ایلیندن قاباقلار، آذربایجانلی اؤیرنجیلر و میلّی دوشونجه‌لی اینسانلاریمیز شرقی آذربایجان ، اهر شهری وکلئیبر قصبه سی‌نین قوزئی - باتی‌سیندا و یام یاشیل اورمانلیق و داغلیق منطقه‌ده یئرلَشَن " بابک قالاسی" یا " بَذ قالاسی" حاقدا تاریخی حادثه‌لری اوخودوقدا یای فصلی‌نین ایستی سیندن اوزاقلاشیب سرین هاوا و گؤزل طبیعت‌دن فایدالاناراق میلّی قهرمانلاریمیزین خاطیره‌سینی اونوتماماق اوچون ۲۰- ۳۰ نفرلیک توپلومدا "بابک قالاسی" باشینادا چیخیر و عرب خلیفه‌سینه قارشی ۲۲ ایل مبارزه آپاران آذربایجانین تاریخی قهرمانی "بابک خرّمدین"ین تاریخی قهرمانلیغینداندا سؤز آچیردیلار.
آمما ۱۳۷۹ - جو ایل و یاز آیلاریندان، باشقا بیر جریان دیلدن دیله دوشدو!
"بو ایل ( ۱۳۷۹) جمعه گونو و تیر آیی ۱۰ - و " بابک خرّمدین "ین دوغوم گونو ، بابک قالاسیندا عظمتلی مراسیم کئچیریله‌جک ؛ بو مراسیمه آذربایجان شاعیر، یازیچی، ادبیاتچی و عاشیقلاری قاتیلیب آزاد طبیعت‌ده ادبی- فرهنگی مراسیم چرچیوه‌سینده آذربایجان موسیقیسی و رقصی‌ده اجرا ائده جکلر."
بو خبرلر و اطلاعیه‌لر او قدر چوخالدی و جدّی لشدی کی، حتی شایعه اولدو بو مراسیمه تورکیه‌دن " ابراهیم تاتلی سس"ده قاتیلاجاق و مراسیمده برنامه اجرا ائده جک!
او ایللر ایراندا ، تورکیه صنعتچی‌لری‌نین ایچینده ابراهیم تاتلی سس ان تانینمیش و مشهور خواننده‌لردن ایدی و ماهنیلاری هر کس‌دن چوخ جاونلار ایچینده دینله‌نیردی.
هر حالدا تیر آیی گلدی و اونون جمعه و ۱۰- جو گونونده اون مینلرجه اؤیرنجی و غیر اؤیرنجی آمما میلّی فعال تورک اینسانی آذربایجانین مختلیف شهر و کندلریندن و حتی تهراندان بابک قالاسینا توپلاشیب ادبی- فرهنگی ، شعر - موسیقی برنامه‌لرین اجراسینا باشلارکن جمهوری اسلامی‌نین آنا یاسی‌نین (اساس قانونون) ۱۵ و ۱۹ جو ماده سی‌نین اجراسینی یعنی آنا دیلده مکتب‌لرده درس وئریلمه‌سینی‌ده توپلوم حالدا دؤلت‌دن ایسته‌دیلر.
بو مراسیمده خبری گئدن بوتون برنامه‌لر او جمله‌دن ، شعر - موسیقی ، تئاتر و باشقا فرهنگی - هنری برنامه‌لر اودا بابک قالاسی‌نین گؤزل محیطی و سرین هاواسیندا اجرا اولدقدان علاوه، میلّی مسئله لریمیز ، اینسان حاقلاری و فرهنگی - مدنی ایستکلریمیزله باغلی دانیشیقلار و چیخیشلار اولدو.
یالنیز ابراهیم تاتلی سسین مراسیمه قاتیلماسی شایعه ایمیش !
مراسیمدن سونرا ، اونون خبری تبریز رادیو- تلویزیونو و حتی تهران روزنامه‌لرینده گئنیش سویه‌ده یاییلدی و بابک قالاسی‌نین خبری هر کسین نظرینی اؤزونه چکیردی.
1380 ، 1381 و 1382 جی ایللرده بو مراسیمین کئچیرمه‌سینه دؤلت طرفیندن مختلف محدودیتلر یارانیب بیر تعداد مدنی فعاللاریمیزی توتوقلاییب حبس ائتسه‌لرده یئنه مراسیم ، مدنی بیر چرچیوه‌ده و یوز مینلر اینسانین اشتراکی ایله هر ایل تیر آیی ایکینجی پنجشنبه - جمعه‌سی و یوکسک سویه‌لی فرهنگی دورومدا کئچیریلیردی؛ آمما 1383 جو ایلدن داها بابک قالاسی اطرافینی نظامی بؤلمه‌لرینه چئویریب و 1384 جو ایلدن تیر آیی‌نین ایکینجی پنجشنبه - جمعه‌سینده داها کیمسه‌نین بو مکانا گئتمه سینه اجازه وئرمه‌دیلر!!
ایندی ایسه 1380جی ایلده بابک قالاسیندا کئچیریلن مراسیمدن، او زامانا عاید یازدیغیم مقاله‌نین بیر بؤلوموندن، بورادا تقدیم ائدیرم .
بابک قالاسی مراسمینده گؤردوکلریم رؤیا دئییلدی حقیقت ایدی
17 /4/ 1380
گؤزومله گؤرمه‌سه‌یدیم اینانمازدیم، ایناندیم بو میلّتین اراده‌سینه، باشقالاری دا اینانمالیدیرلار!
بیر هدف، بیر آرزو ایله میلّی قهرمانین دوْغوم گونونو عزیزله‌مک اوچون «قالا دره‌سی»- یندن «بابک قالاسی» - نا قَدَر تخمیناً بئش کیلومئتر قَدَری اینسانلاردان یوْل دوزلمیشدی؛ ائله بیل اینسان یوْلو دوزلتمک آذربایجانلیلارین پایینا دوشموشموش!
جمعه‌دن- جمعه‌یه قَدَر؛ یعنی 1380- جی ایل تیر آیی‌نین سگگیزیندن اوْن بئشینه قَدَر آذربایجانیمیزین گؤزل نقطه‌لری‌نین بیری اوْلان قاراداغ منطقه‌سینده یئرلَشَن کلئیبر شَهَری‌نین گئجه- گوندوزو یوْخ ایدی. بابکین دوْغوم هفته‌سی توُتولدو بو ایل دوْغوم گونو یئرینه.
بو میلّی توپلانتییا آذربایجانین هر یئریندن گلمیشدیلر، اَن اوُجقار کندلردن توُتدو بؤیوک شَهَرلره قَدَر. حتّی ایرانین اَن اوُزاق شَهَر‌لرینده یاشایان آذربایجانلیلار اؤزلرینی بورایا چاتدیرمیشدیلار؛ بو قدر اینسانی هئچ بیر حزب، هئچ بیر تشیکلات بوجور بیر داغلیق بؤلگه‌ده بیر یئره توپلایا بیلمَز، بئله بیر توپلانتییا آنجاق آذربایجان بویدا وطن سئوگیسی، بیر هدف و بیر آرزو یوْلوندا اتّحاد، قاراداشلیق و کؤنول بیرلیگی لازم‌دیر.
تاریخده «بَذ» قالاسی آدلانان و ایندی‌ایسه «بابک قالاسی» ایله مشهور اوْلان داغین اتَگینده باشقا بیر عالَم وار ایدی، چادیرلار قوُرولان و «قالادره‌سی» آدلانان مکاندا وطن عشقی و وطن سئوداسی آدی ایله هر ایش ایره‌لیله‌ییردی.
بو گونلر بوُرا اینسان دنیزینه چئوریلیب، لاکین بو دنیزین اینسان آدلی هر بیر قطره‌سینده دونیا بویدا آرزو و ایستکَ‌لر توپلانیب، بیر میلّتین وارلیغی قَدَر، بیر میلّتین تاریخی قدر، بیر میلّتین‌دیلی، مدنیّتی، فوْلکلور و موسیقیسی قَدَر !
بوُرادا هر شئی دوْغما ایدی، هر یئرده دوْغما موسیقی سَسی قوُلاقلاری اوْخشاییردی. اینسانلار یوکسَک مدنیّته مالیک بیر صمیمیتله بیر – بیرلری ایله داورانیردیلار؛ میلّت طرفیندن یازیلان یازیلار ایسه دوْغما دیلده دانیشیردیلار.
اینانین، سایسیز- حِسابسیز چادیرلار آراسیندا و اینسانلار دنیزی‌نین ایچینده من حتّا کیچیک اوُشاقلاری بئله فارسجا دانیشاندا گؤرمه‌دیم. گؤیَرچینه بَنزَ‌‌ر بالالاریمیزین گؤزل تورکجه‌میزله دانیشمالاری آدامی حئیران ائدیردی.
تأسّف‌لر اوْلسون کی، یانلیش بیر تفکّور اساسیندا اوُشاقلاری ایله فارسجانی یانسیلاماق ناخوشلوغو چوْخدان‌دی بؤیوک شَهَرلریمیزه دوشوب،کیچیک شَهَرلریمیزه‌ده سرایت ائتمکده‌دیر. اوُرمیه، تبریز و اردبیل کوچه‌‌لرینده بوجور خسته‌لیگی بعضا آشکارا دوُیماق اولور، زنجان داها دهشتلی‌دیر!
آتا- آنالاری آذربایجانلی اوْلوب تهرانین زَهَرلی تبلیغات فضاسیندا بؤیویوب بو شهَرده یالنیز فارسجا دانیشان گنج اوْغلان- قیزلاری‌دا بوُردا تورکجه دانیشماقدا گؤروردون، اوْنلارین لهجه‌سیندن هر شئیی بئله، آنلاماق اوْلوردو!
بو گنجلره ، تهراندا حاکم اوْلان حقارت دوُیغوسو بوُرادا داها یوْخ ایدی، اوْنلار داها اؤزلرینی فارس‌دیلینده دانیشانلاردان اَسکیک یوْخ، بعضی جهتلردن‌ده اوْنلاردان اوستون گؤرور، یابانجی بیر دیلده یوْخ، اؤز آنا‌دیللرینده دانیشماقدان غرور دوُیوُردولار.
بئله بیر محیطی من آنجاق نئچه ایل قاباق یوُخودا گؤرموشدوم، یوُخودان اوْیاناندان سوْنرا اوْنو یالنیز بیر یوْخو گؤردوکده چوْخ کدَرله‌نیب ساعت‌لر اؤزومه گلمه‌میشدیم، آنجاق بو گونلر داها هر شئیی گؤزومله گؤروردوم اصلاً رویا دئییلدی، هر شئی حقیقت ایدی، هر زاد دوْغما و دوغال ایدی !
بوُرادا بابک و بابک قالاسی حقّینده مختلیف پوستر، عکس، اطلاعیه و اعلامیه‌لر یاییلمیشدی و یاییلیردی. کئچَن جمعه ایله بو جمعه اَن چوْخ اینسان قالایا گلمیشدی؛ هفته آراسی‌دا چوْخلاری گلیب -گئتمیشدیلر، لاکین هفته‌نین تعطیل گونلر ی اینسان دنیزی دالغالانیردی بوُرادا بو مکاندا!
جمعه گونو (15/4/1380) مراسمین سوْن گونو و عمومی قالایا چیخماق گونو ایدی؛ هم « بابک هوتئلی » و هم « قالادره‌سی » یوْللاری ایله بابک قالاسی‌نین آیاغیندان ، قالانین اتَگینه ( اصلینده بئلینه ) قَدَر ایکی ساعتلیک داغ و مئشه یوْلونو قالخدیقدان سوْنرا ، قالانین اتَگیندن قالانین باشینا جیغیر یوْللا چیخماق عادی گونلر ده 10- 15 دقیقه‌دن آرتیق وقت توُتمازدی، لاکین قادینلی – کیشیلی، اوْغلانلی– قیزلی اینسان آخینی نتیجه‌سینده بو اوْن- اوْن بئش دقیقه‌لیک یولو ساعت 9-12 آرالاریندا بلکه بیر ساعت یاریما دا گئده‌بیلمَزدین.
بوُرادا بوتون قادینلار- قیزلار، کیشی‌لر- اوْغلانلار ائله بیل، بیر عایله‌دندیرلر و آتا- آنا و باجی- قارداش‌دیلار، دونیانین اَن مدنی اینسانلاری‌نین داورانیشینی بوُرادا گؤره بیلَردین. چونکو قالایا چیخماغا آنجاق زنجیر سیجیرلمه‌سی کیمی و سانتیمتر- سانتیمتر حرکت ائتمه‌لیدین؛ قالانین بئلینه ساریلان بو اینسانلارین شکیلینی اوزاقدان چَکَن مهارتلی عکاسلار یقین کی، بئله صحنه‌لری عؤمور‌لرینده گؤرمه‌میش و یا چوْخ آز گؤرموشدولر!
قالانین اتَگینده مختلیف توْپلانتی‌لاردا موسیقی، رقص و چیخیش صحنه‌لری اینسانی باشقا بیر عالمه آپاریردی، داها دوْغروسو آدام گؤردوکلرینه چتین اینانیردی!
من بوُرادا میلّتیمیزین اراده‌سینه ایناندیم، اوْ، ایسته‌دیگینی یقین کی، اَله گتیره‌جک ، اوْ اؤز حقّینه چاتاجاق، اوْ ایللر بوْیو حسرتده قالدیغی آنا‌دیلده ابتدایی‌دن توُتدو دانشگاهین سوْنونا قَدَر درس اوْخویاجاق، اوْ تلویزیوندان دوْغما دیلده ماهنی ائشیده‌جک، خبر‌دینله‌یه‌جک، عاشیقلارین سازلاری و سؤزلری‌ایله شَنلیک ائدیب شَن یاشایاجاق و اوْنون بالالاری تورک اوْلدوقلارینا فخر ائده‌جکلر!
اوْنون شَهَرلری لوت کویرلرده‌کی شَهَرلردن داها گؤزل و داها آباد اوْلوب چیچکلَنه‌جک، بوُنلارین هامیسی اوْلاجاق، آنجاق احساس‌دان اوُزاق، اراده ایزی و منطق یوْلو ایله، ائله بابک قالاسیندا اوْلدوغو کیمی!
▀