+0 بَگَن (Bəyən)
سارسیلماز انسان پروفئسور محمد تقی زهتابی وفاتی نین ایل دؤنومو!
حسن راشدی : اول دی 1397
۱۳۷۷- جی ایلین دی آیی‌نین بیرینجی گونو ( 22 دسامبر 1998 میلادی ) سه شنبه، ادبیّات سمامیزدان بیر اوُلدوز آخدی. بو اوُلدوز ائله ایشیقلی، ائله پارلاق ایدی کی، اوْنون آخماسیندان سوْنرا یئری‌نین بوشلوغونو هله ده حسّ ائدیریک!
اوْ بؤیوک انسان بوتون وارلیغی ایله یالنیز میلّتی اوچون یاشادی، اؤزو اوچون هئچ یاشامادی !
وار قوه‌سیله چالیشیردی بیر میلّتین وارلیغی اوچون، گئجه -گوندوز تانیماییردی بوچالیشمادا. وارلیق تاریخیمیزی یازدی، 7000 ایل لیک وارلیغیمیزی، اودا دوْغما دیلیمیزده !
" ایران تورکلری‌نین اسکی تاریخی" کیتابی بیر دؤنوش نقطه‌‌سی اوْلدو تاریخیمیزده. یاشاییشی اَن ساده انسانلارین یاشایشی کیمی‌ایدی. آمما بو ساده یاشایان انساندا نه قدر یوکسک‌لیک نه قدر بؤیوکلوک، نه قدر اراده، نه قدر اینام واریدی؟!
یاشی‌نین چوْخلوغونا باخمایاراق بیر گنج کیمی چالیشیردی. بیلیرم اوْنو یاشادان، اوْنو بو قدر حرکته گتیرَن چیگین‌لرینده حسّ ائتدیگی آغیر میلّی وظیفه ایدی. اوْ، میلّتی‌نین آغری‌لارینی،آجی‌لارینی،تحقیرلرینی بوتون وارلیغی ایله حسّ ائدیردی، او اؤزونه یوْخ میلّتینه یاشادی. بو سؤز بیرتعارف یوْخ بیر حقیقت، بیر گئرچک‌دیر!
بوگون، اوْنون " ایران تورکلری‌نین اسکی تاریخی" کیتابی آرتیق بیر تَمَل کیتاب اوْلوبدور. گونو گوندن استناد ائتدیگی سندلرده داها آرتیق تثبیت‌لَشیر.
بو کیتاب آذربایجانلیلارا و ایران تورکلرینه بیر هویّت سندی اوْلدو؛ بو کیتاب چاپ اوْلدوقدا، تاریخی یالنیز آریالاردان بو طرفه ترسیم ائدَن آریا پرست شوونیست‌‌لرین یوخوسو قاریشدی.
اوْ یازدی، یاراتدی، فداکارلیق درسی وئردی و میلّتی‌نین اوره‌یینده اؤزونه ابدی یئر قازاندی!
۱۳۷۷-جی ایلین آذر آیی‌نین- 25 جی گونو سفرده اوْلدوغو آلمانیادان یئنی‌جه قاییتمیشدی، بیزده شنبه گونو آذر آیی‌نین ۲۸- جی گونو بیر تعداد ادبیّات سئورلرله تهراندا باجیسی اوغلونون ایش دفترینده قوللوغوندایدیق.
بیر آی - بیر آی یاریم آلمانیادا اوْلدوغو گونلرده اوْ اؤلکه‌ده، تورکجه تحصیل آلان دانشگاه اؤیرنجی‌لرینه کونفرانس وئرمیشدی وسوت گونو ،آذر آیی‌نین 29 –و دوکتور زهتابی آخشام، اوتوبوسلا تهراندان شبستره حرکت ائتمیش و دوز گونو آذر آیی نین ۳۰- جو گونو یعنی بیزله گؤروشدن یالنیز ایکی گون سوْنرا و شبستره چاتان گون، سحَر چاغی احتمالا هله ائوی‌نین گاز بوخاریسینی یاندیرمامیشدان، دونیانی وداع ائتمیشدی.!
دوکتور زهتابی‌نین اؤلوم خبری بیر گونون ایچینده بوتون شهرلره یاییلدی. سه شنبه گونو دی آیی نین بیرینجی گونو ادبیّات سئورلرین هامیسی بو آجی خبری ائشیتدی، اورکلر کؤورَلدی، گؤزلر یاشاردی!
پنجشنبه، دی آیی‌نین اوچونجو گونو تورپاغا تاپشیریلاجاغینی هامی بیلدی. تهراندان، اوُرمیه‌دن، زنجان دان، اردبیل‌دن خصوصی ایله تبریزدن بوتون ادبیّات سئوه‌رلر گلمیشدیلر.، پنجشنبه گونو و بیر گون عرضینده آنا دیلده اوُزون پارچالاردا پلاکاردلار یازیلمیشدی بو آغیر ضایعه اوُغروندا. هر شهردن، هر منطقه‌دن اورک سؤزلر سؤیله‌نیلمیشدی آذرباجانین فداکار اوْغلو حقّینده .
عظمتلی تشیع جنازه زامانی، شبستر اهالیسی اوّلده ائله تصور ائتمیشدی عراق- ایران ساواشیندا شهید اوْلانلارین مراسمی‌دیر بوگون، یالنیز یازیلان پلاکاردلار بوتونلوکله تورکجه ایدی!
اوْ گون شبستر اهالیسی بئله بیر فضانی گؤردوکده نه قدر بؤیوک بیر انسانین الدن وئرمه‌سینی یئنی‌جه باشا دوشموشدو!
آذربایجانین سارسیلماز و فداکار اوْغلو پرفسور محمد تقی زهتابی، پنجشنبه دی آی‌نین اوچونجو گونو، 1377- جی هجری گونش ایلی ( 24 دسامبر 1998 میلادی ایل )، اؤز سئوَنلرینی درین ماتمده غرق ائده‌رک تورپاغا تاپشیریلدی!
دوکتور زهتابی‌نین وفاتی شوبهه‌لی اولدو، چونکو او زامانلار «قتلهای زنجیره ای» آدی ایله مشهور اولان ناجوانمردانه قتل‌لر زامانی ایدی؛ دوکتور زهتابینی شبستر اوُتوبوس تئرمینالیندان ائوینه چاتدیران تاکسی سوروجوسو سوْنرالار دئمیشدی:
«پروْفئسور زهتابینی من تئرمینالدان ائوینه آپاردیم. اوُستاد زهتابی سحر چاغی اوُتوبوسدان یئره یئندیکدن سوْنرا من اوْنو تاکسی‌یه میندیردیم؛ من بیر تاکسی سوروجوسو اوْلاراق اوُستادی ائوینه چاتدیرماق ایسته‌دیم، اوْ منی تانیماسادا من اوْنو یاخشی تانیییردیم. اوُستاد تاکسی‌یه مینمَکده چوْخ احتیاط ائدیردی! هاوا یئنی‌جه ایشیقلانمیشدی، هله شهرده ماشین گل-گئدی چوْخ آزیدی، دوکتور زهتابی مندن سوْروشدو : اوْغلوم سن کیمسَن،کیملردَنسن؟ آدیمی دئدیم. اوُستاد دئدی : سن چوْخ جاوانسان و من سنی تانیمیرام، آتا و باباوین آدی نه دیر؟
هر ایکیسی‌نین آدینی دئدیم. اوُستاد هر ایکیسینی تانیدی، سوْنرا تاکسی‌یه میندی!
اونو تک یاشادیغی ائوی‌نین قاباغینا قدر آپاردیم. اوْ چوْخ ساغلام ایدی …لاکین اوْ گونون صباحیسی خبر یاییلدی کی: دوکتور زهتابی ….! چوْخ تعجب‌لندیم، اینانا بیلمیردیم …! »