١٣٨۵ جی ایل خورداد قیامی هئچ زامان اونودولماییب و اونودولمایاجاق!

ح. راشدی
٣ خورداد ١۴٠۵

حق یولوندا و اهانت، تحقیر، توهین و ظولمه قارشی قیام ائدیب شهید اولانلاریمیزین روحو هر زامان بیزلری اینسان کیمی یاشاماغا چاغیریر!
خورداد قیامی گونلریندن ایگیرمی ایل کئچمه‌سینه رغما، او زامان، پنجشنبه خوردادین دؤردونجو گونو (١٣٨۵ ایل) خیاو (مشکین‌) شهرینده قیام زامانی، گول پارچاسی و آی کیمی پاریلدایان گؤزل و رعنا جاوانیمیز *«جلیل عابدی*»نین شهید اولدوغو دقیقه و صحنه‌سینی بیر دوست منه تئلفونلا خبر وئرنده دونیا باشیما ییخیلمیشدی...!
شهیدیمیزین باشیندان گولله ایله وورولدوغونو دئمیشدیلر!
*آخ...!
تحقیر و توهینه اعتراضین جاوابی گولله اولمالیدیرمی؟! *
آجی خبرلر باشقا شهرلردن گلیردی، اورمیه و سولدوزدان داها چوخ شهید خبرلری گلمیشدی....!
تبریز، اورمیه، زنجان، اردبیل، سولدوز، خیاو، قوشاچای، موغان، میانا، ماراغا و آذربایجانین کیچیک شهرلری بئله «ایران» روزنامه‌سی‌نین تورکلره ائتدیگی توهینینه قارشی آیاغا قالخمیشدیلار!
تهران تورکلری‌ده خوردادین یئددینجی گونو بو راسیستی و ضد بشری اعتراضا قاتیلدیلار، آمما هر زامان، اینسان حاقلاریندان دانیشان فارس دیللی باصطلاح آیدین و روشنفکرلردن، او زامان بیر کلمه اولسون بئله «ایران» قزئته‌سینین تورکلره ائتدیگی توهینینه اعتراض ائدیب و آذربایجان قیامیندان سؤزده بئله حمایه ائدن اولمادی....!
آذربایجان و گئنل‌لیکله ایران تورکلری، اؤزلری اؤز حقلریندن دفاع ائتمه‌لیدیرلر؛ اؤزلرینی فارس آیدینلاری خطاب ائدنلرین چوخو مع الاسف پان فارسیسم،راسیسم و گئریلیک رؤیالاریندا یاشاییرلار و اونلاردان تورکلره و غیر فارس ملیت‌لره یاردیم گؤزله‌مک یئرسیزدیر ..!
١٣٨۵ جی ایل،آذربایجانین و عمومیتله ایراندا یاشایان بوتون تورکلرین تحقیر، توهین پانفارسیسم و نژادپرستانه حرکتلره قارشی خورداد قیامی هئچ زامان اونودولماییب و اونودولمایاجاق...!
١٣٨۵ جی ایل و «ایران» روزنامه‌سی‌نین تورکلره قارشی توهین ائتدیگی گونلر و بو توهینه «بیلیم یوردو»(دانشگاه) تورک اؤیرنجی‌لر و عموم خلقیمیزین اعتراض حرکتلری، او زامان گون و ساعاتی ایله sms یولو ایله منه گلیردی‌.
او زامانین sms لری‌نین بیر بؤلومونو بوردا گتیریرم:
🌒 شنبه دن دوشنبه یه قَدَر (٢٣ اردیبهشت الی٢۵ اردیبهشت ١٣٨۵)
👈 تبریزین _«سهند»_ بیلیم یوردوندا ظاهرا صنفی ایستَکلره گؤره اؤیرنجی‌لر اوروج اعتصابی (اعتصاب غذا) ائتمیش و یئمَک یئمَکدن امتناع ائتمیشلر، لاکین الکترونیکی سایتلارین بعضی لری یازمیشلار:
«*اعتصاب غذای دانشجویان دانشگاه سهند در ارتباط با مسائل قومی است.»*
🔷 سه شنبه ٢۶ اردیبهشت ١٣٨۵
👈 تبریز بیلیم یوردو تورک اؤیرنجیلری «ایران» روزنامه‌سی‌نین تورکلره اهانت ائتدیگینه گؤره بیر توپلانتی‌دا اؤز اعتراضلارینی تبریز دانشگاهی نین ایچینده گؤسترمیشلر، sms خبرلرینه اساسلاناراق، بو اعتراض دا ٧٠٠٠-۶٠٠٠ اؤیرنجی اشتراک ائتمیشدیر.
🔷 چهارشنبه ٢٧ اردیبهشت ١٣٨۵
👈 تهران بیلیم یوردو تورک اؤیرنجیلری بو گون ساعات ١٢:٣٠ دا تهران دانشگاهی قاباغیندا توپلانمیش و «ایران» روزنامه‌سی‌نین توهینینه اعتراض ائتمیشلر، لاکین پولیس قوه‌لری اؤیرنجیلری دانشگاه ایچینه سوروکله‌میش و ائشیکدن گلیب اعتراضا قوشولان تورک اؤیرنجیلرین قاباغینی آلمیشدیر؛ بو اعتراضا ۵٠٠ - ۴٠٠ اؤیرنجی قاتیلا بیلمیشدیر.

🔳 👈 *بو اعتراضلار، خوردادین سککیزینه قدر داوام ائتدی و تبریز شهری باشدا اولماقلا آذربایجانین باشقا شهرلرینده‌ده یوز مینلرله قاتیلانلارین اعتراض تظاهراتلاری داوام ائتدی و مع‌الاسف چوخ تعداددا گنج یاشلی اینسانلاریمیز بو اعتراض‌دا شهید اولدولار!*

https://telegram.me/yurddash

https://www.instagram.com/hasan_rashidi_zahra