عظمتلی «بابک قالاسی مراسیمی»...!

🔷 حسن راشدی
٩ تیر ١۴٠۵

«بابک قالاسی» یا «جمهور قالاسی» تاریخی قالا اولوب اونون حاققیندا تاریخچی‌لر او جمله‌دن سعید نفیسی، کیتاب یازمیش اولسادا بو قالا،١٣٧٩  هجری شمسی ایلینه دک، عموم خالق آراسیندا چوخ تانینمیش و آدی دیللر اَزبَر اولاسی قالا دئییلدی.
دئییلنلره گؤره، ١٣٧۵-١٣٧۶ جی ایللرده رحمتلیک پروفسور محمد تقی زهتابی بیر تعداد علاقمند اؤیرنجی‌لری‌ایله بیرلیکده، تیر آیی‌نین اوّل‌لرینده بو محتشم، لاکین داغیلماقدا اولان قالانین باشینا چیخمیش و اؤیرنجیلرینی تاریخده «خُرّم‌دین بابک» آدی ایله تانینمیش و ایگیرمی ایکی ایل عباسی خلیفه‌سی «معتصم» علیهینه مبارزه آپاردیقدان سونرا بیر ارمنی خیانتی ایله توتوقلانیب خلیفه اوردوسونا تحویل وئریلمه‌سی و خلیفه فرمانی ایله بابکین قوللاری‌نین کسیلمه‌سی اثناسیندا بابکین شهامتله سؤیله دیگی : 
👈 «قیزارا قیزارا اؤلمَک، سارالا سارالا یاشاماقدان داها اوستوندور!»
جمله‌سینی و احتمالاً، بابک‌ین دوغوم گونونون هجری شمسی تاریخی ایله یای‌ فصلی‌نین اوّل آیی‌نین ایکینجی هفته‌سینین پنجشنبه - جمعه گونونه دوشدویونو دئمیشدی!
سانکی، دوکتور زهتابی‌نین سؤیله‌دیگی بو تاریخی حادثه‌، اویرنجی‌لرده اؤز درین تاثیر و ائتگیسینی بوراخاراق، ١٣٧٧ و ١٣٧٨ جی ایللرده تیر آیی‌نین ایکینجی پنجشنبه - جمعه سینده نئچه یوز تورک اؤیرنجی و ملی- مدنی فعال بو قالایا توپلاشمیش و آذربایجان قهرمانی«خرم‌دین بابک»ین دوغوم گونو مناسبتی‌ایله مراسیم کئچیرمیشلر.
لاکین ١۳٧٩- جو ایل یاز آیی‌نین اورتالاریندان، اس ام اس، اینترنئت سایت و وئبلاقلار طریقی ایله پایلاشیلان:
🔷 «بو ایل تیر آیی‌نین ٩ و ١٠ - جو گونلری (پنجشنبه و جمعه) بابک قالاسیندا آذربایجان قهرمانی «خرم‌دین» بابکین «دوغوم گونو» مراسیمی عظمتلی و موسیقیلی کئچیریله‌جک» خبری اعلام اولدوقدا هر بیر آذربایجان تورکونون، آذربایجان و ایرانین هانسی شهرینده یاشاماسینا باخمایاراق بو مراسیمه قاتیلماغا ماراغینی چکمیشدی!
او زامان ایراندا هر کسین تانیدیغی و ماهنیلارینی سئودیگی مشهور تورکیه‌لی صنعتچی «ابراهیم تاتلی‌سَس»ین احتمالاً بو مراسیمه قاتیلاجاغی خبری‌ده پایلاشیلمیشدی!
نهایتاً ١٣٧٩ جو ایل تیر آیی‌نین ایکینجی پنجشنبه - جمعه‌سی گلدی و بابکین دوغوم گونو مراسیمی شرقی آذربایجان اوستانی و «کلیبر» شهری یاخینلیغیندا طنطنه و عظمتله کئچیریلدی!
بو مراسیمین خبری هر یئره یاییلدی، حتی تبریز رادیو - تلویزیونو طرفیندن مراسیمه قاتیلانلارین تعدادینی ایکی یوز مین نفر حدودوندا اعلام اولدوغونو دئدیلر!
١٣٨٠ جی ایل داها چوخ اینسانلارین مراسیمه قاتیلدیغی‌نین و متنوع ادبی- مدنی برنامه‌لرین قالا دره‌سینده اجرا اولدوغونون شاهیدی اولدوق.
١٣٨١ جی ایل‌ده امنیت قوه لری طرفیندن مراسیمه چوخلو محدودیت یارادیلدیغینا باخمایاراق، یئنه قاتیلیمجیلارین تعدادی چوخ و برنامه، دوزنلی و چئشیدلی اولدو.
١٣٨١،١٣٨٢ جی ایل‌لرده، امنیت قوه‌لری طرفیندن قاداغالار، توتوقلانمالار و محدودیت‌لره باخمایاراق، قاتیلیمجیلارین تعدادینی ٨٠٠ مین ایله بیر میلیون آراسی دئدیلر!
١٣٨٣ دن، مراسیمین تام قارشیسینی آلماغا وار قوه‌لری ایله اقدام ائتدیلر و ١٣٨۴دن داها تیر آیی‌نین بیرینجی و ایکینجی هفته‌سینده بابک قالاسینا گئتمه‌نی یاساقلادیلار....!!
✍️ آمما «بابک قالاسی مراسیمی» عظمتلی و دونیادا تایی آز گؤرونن ملّی- مدنی قورولتای اولاراق آذربایجان تاریخینده ابدی اولاراق ثبت اولدو...!
#دوکتور_زهتابی
#دکتر_زهتابی
#بابک_قالاسی
#آذربایجان
#بابک_خرمدین
#بابک_قالاسی_مراسیمی
#حسن_راشدی

https://telegram.me/yurddash

https://www.instagram.com/hasan_rashidi_zahra

http://yurddash.arzublog.com

https://x.com/Hasan_rash_zahr