بو اوتوز ایل ایچینده ایران، آذربایجان تورپاقلارینی اشغال ائدن ائرمنستانی نه اینکی محکوم ائتمه‌میش بلکه ائرمنی‌لر طرفیندن یارانان، لاکین دونیانین هئچ بیر دؤلتی طرفیندن رسمیتله تانینمایان قوندارما «قاراباغ و یا آرتساخ جمهوریتی» تشکیلاتینی  تهراندا تشکیل تاپان « اولوسلار آراسی کیتاب سرگیسی» گونلرینده مستقل بیر جمهوریت کیمی‌ده قبول ائتمیشدیر![i]

تجاوزکار ائرمنستان، وطن ائولادلاریمیزین 12 سینی شهید ائتدیکدن سونرا  آذربایجان ملّتی‌نین قانی جوشه گلیب « باکی» شهرینده  قاراباغ جبهه‌سینه گئتمه‌یه تظاهرات باشلاندی و جولای ( یول) آیی‌نین ایگیرمی سینه کیمی (2020) کؤنوللو اولاراق قاراباغ جبهه‌سینه گئدیب وطن تورپاقلارینی آزاد ائتمه‌یه 55000 گنج آد یازدیردیلار!

گونئی آذربایجاندا ایسه، گنجلر، حتی یاری یاشلیلار تبریز شهرینده قوزئی آذربایجان کنسوللوغونا مراجعت ائدیب قاراباغ جبهه‌سینده اشغالچی ائرمنستانلا ساواشماغا  و وطنی، ائرمنی اشغالیندان آزاد ائتمه‌یه حاضیرلیقلارینی بیلدیردیلر، من ده 66 یاشیمدا اولدوغوما باخمایاراق تلگرام ، اینستاگرام و فئیسبوک صحیفه لریمده اعلام ائتدیم قاراباغ جبهه‌سینده موبارزه ائتمه‌یه حاضیرام!

گونئی آذربایجاندان یالنیز من یوخ، چوخ تعداددا من یاشدا،حتی مندنده یاشلی اولانلار  قاراباغ جبهه‌سینه گئتمه‌یه حاضیرلیقلارینی بیلدیردیلر!

آمما ائرمنستانلا- آذربایجان و یا باطل ایله حق ساواشی‌نین قیزغین چاغی، بازار گونو 27 سپتامبر 2020 تاریخینده باشلاندی؛ بو گونده ائرمنی قوه‌لری آذربایجان قوه‌لرینین موضع‌لرینی توپ و تانک آتشینه توتدولار، آمما قهرمان آذربایجان اوردوسونون جاوابی گئجیکمه‌دی و ایلدیریم سرعتی ایله دوشمنی سوسدوروب فضولی و جبرائیل رایونلاریندان  6 کندی دوشمن اشغالیندان آزاد ائدیب ائرمنستان قوه‌لریندن 550 نفر و 22 تانکی نابود ائتدی، البته کی، وطن اوغروندا جانلاریندان کئچن ایگید عسگرلریمیزدنده شهید اولدولار!

آذربایجانین انسانسیز هاوا آراجلاری Drone)) اؤزللیکله تورکیه یاپیمی«بایراکتار تی بی 2»‌سی ائرمنستانین تانک، توپ زرهلی ماشین و باشقا نظامی تجهیزلرینی شکار ائده‌رک فیلیمینی دونیایا گؤستریردی، بو ویدئو فیلملر یالنیز قوزئی آذربایجاندا یوخ، گونئی آذربایجاندادا چوخلو گؤزلری سئوینجدن یاشاردیردی!

بئله بیر حسّاس زاماندا،تورکیه‌نین جمهور باشقانی رجب طیب اردوغان و بو اؤلکه‌نین خارجی ایشلر ناظری مولود چاووش اوغلو آچیقجاسینا و تام  قدرت و جسارتله آذربایجاندان حمایه‌لرینی بیلدیردیلر.

طیب اردوغان دئمیشدیر: « بیز آذربایجانلا ایکی دؤلت بیر ملّت اولاراق بو ساواشدا و آذربایجانین توپراقلاری ائرمنستان اشغالیندان قورتاریلانا قدر آذربایجاندان حمایه ائده‌جه‌ییک، ساواش او زامان دایانا بیلر کی،ائرمنستان اشغال ائتمیش توپراقلاردان ال چکیب اونو بوشالتسین!».

بئله بیر دورومدا، ایران طرفیندن و «نوردوز» گؤمروکوندنده روس یاپیمی ساواش کامیونلاری و باشقا سیلاح و تجهیزلر ائرمنستانا گؤنده‌ریلمکده ایدی! بو کامیونلاری داشییان ایران تریلی‌لریندن ( تیرلاریندان) گونئی آذربایجانین یئرلی اهالیسی فیلم چکیب دونیایا گؤستردی و دونیانین مشهور خبر آژانسلاری او جمله‌دن «بی بی سی»ده بو ویدئولاری پایلاشدی!

                     قوزئی آذربایجانا آرخا اولماغا، گونئی آذربایجان شهرلرینده تظاهرات

پنجشنبه گونو 10 مهر 1399 ( 1 اوکتوبر 2020) آذربایجانین اؤنملی گونلریندن حساب اولونور، بو گونده گونئی آذربایجانین مختلیف شهرلرینده، اؤزللیکله آذربایجانین تاریخ بویو اعتراضلار و قیاملار شهری ساییلان تبریز شهرینده «ایکینجی قاراباغ ساواشی» آدلانان آذربایجانلا ائرمنستان محاربه‌سینده شمالی آذربایجانا و جبهه‌ده ووروشان ایگید عسگرلریمیزه آرخا دورماغا، ملّت‌چیلر اؤنده گئده‌رک تظاهرات باشلاندی.

تظاهراتین قارشیسینی آلماغا ایران امنیت قوه‌لری طرفیندن مختلیف مانعه‌لر  و تضییق‌لر یاراندی، لاکین  مانعه‌لره باخمایاراق بو گؤستریلر آذربایجانین تبریز، اورمو، اردبیل، زنجان، مشگین‌شهر(خیاو)، پارساباد حتی پایتخت تهران‌دا تام گوجو ایله کئچیریلدی!

تبریز شهری‌نین اون مینلر تظاهراتچیلاری‌نین ویدئو فیلملری دونیانین مشهور سوسیال شبکه‌لرینده او جمله‌دن «بی بی سی» خبر آژانسی‌نین اینستاگرام  و باشقا اجتماعی کانال و صحیفه‌لرینده پایلاشیلدی؛ تبریز شهری تظاهراتیندا وئریلن بیر پارا شعارلار بئله ایدی:

«قاراباغ بیزیمدیر بیزیم اولاجاق/ ائرمنی‌دن حمایت، جنایتدیر جنایت!/ نوردوز گرَک باغلانا و ...»[ii]

گونئی آذربایجان اهالیسی‌نین قوزئی آذربایجان قارداشلاریندان حمایه‌لری، دونیانی یاتمیش یوخودان آییلتدی، دونیا بیلدی ایران ایچینده اوتوز میلیوندان چوخ نفوسو اولان آذربایجان تورکلری،‌ قوزئی آذربایجان سویداشلارینین چتین گونلرینده اونلارا یاردیمچی اولماغی اونوتماز!

بئله بیر دورومدا، یعنی آذربایجان اوردوسو اؤز اوستونلویونو گؤستره‌رک، ائرمنستان اوردوسونو دارماداغین ائتدیگی و هر گون ایره‌لیله‌ییب نئچه کندی ائرمنی اشغالیندان قورتاردیغی زامان، ایران رهبرلیگی طرفیندن، تبریز، اردبیل، اورمیه و زنجان امام جمعه‌لری، قاراباغین آذربایجان تورپاغی اولدوغونا و آذربایجان دؤلتی‌نین اشغالدا اولموش تورپاقلارینی آزاد ائتمکده حاقلی اولدوغونا اشاره ائده رک اطلاعیه‌ یایدی، بیر نئچه گون سونرا  و 15 مهر 1399 ( 6 اوکتوبر 2020) تاریخینده بو اطلاعیه‌یه اوخشار آمما چوخ یوموشاق شکیلده، علی اکبر ولایتی، آیت الله خامنه‌ای‌نین اولوسلار آراسی مشورتچیسی بیر بیانیه‌ده : « اولوسلار آراسی تشکیلاتی‌نین تهلوکه‌سیزلیک شوراسی‌نین دؤرد بیان‌نامه‌سی اساسیندا، ائرمنستان، اشغال ائتمیش آذربایجان تورپاقلارینی بوشالتمالیدیر» دئمیشدیر؛ آمما بیر گون بو بیانیه‌دن سونرا و 7 اوکتوبر 2020 تاریخینده ایرانین جمهور باشقانی «حسن روحانی» قاراباغ ساواشینا اشاره ائده رک دئمیشدیر: «بیز خارج اؤلکه‌لردن و سوریه‌دن گلمیش دویوشچولری ایران سرحدینده تحّمل ائده بیلمه‌ریک، ایرانین ائرمنستانلا یاخشی ایلیشگیسی وار و بیز اون‌لارجا اورتاق پروژه‌لر،او جمله‌دن الکتریک تامینی ساحه‌سینده بو اؤلکه ایله امکداشلیق ائدیریک،لاکین آذربایجانلا ایران آراسی، معّین زامانلاردا یئنیش - یوخوشلو اولوب!»

ایران پرزیدنتی حسن روحانی‌نین بو توتومو گؤستریر، حسن روحانی اداره ائدن دؤلت، اؤزونو نه قدر آذربایجان تورپاقلارینی اشغال ائدن خیریستیان ائرمنستانا یاخین و تورپاغی اشغال اولان مسلمان آذربایجان جمهوریتینه قارشی گؤرور؛ بو سیاسی توتوم، پان ایرانیستلرین آچیق -آیدین سیاسی توتوملاری‌دیر!

آذربایجانین اوردوسو هر گون نئچه کندی ائرمنی اشغالیندان آزاد ائتدیکده، حتی ائرمنستانین گنجه شهرینی راکت ایله ووروب سیویل اهالینی شهید ائتمه‌سی مظّفر اوردموزون اراده‌سینی نه اینکی سارسیدا بیلمه دی بلکه ، اوردوموز هر گون نئچه کندی ائرمنی اشغالیندان آزاد ائتدیکده  « نیکول پاشینیان» 6 اوکتوبر 2020 ده اعلان ائتدی : « آذربایجانا امتیاز وئرمه‌یه حاضیریق، آذربایجاندا بیزه بعضی امتیازلار وئررسه!».

پاشینیان اونوتموشدور، آذربایجانین سنه وئردیگی امتیاز، سنین اشغال ائتمیش آذربایجان تورپاقلاریندان چکیلمه‌یین و ائرمنی عسگرلرینین بوندان آرتیق اؤلمه‌مه‌سی اولا بیلر!

و او ظفر گونو گلیب چاتدی و 16 اوکتوبر 2020 تاریخینده « فضولی» شهری ایللر بویو ائرمنی تاپداغی آلتیندان قالاندان سونرا آزاد ائدیلدی و ائرمنستانین ایکی «سو 25» ساواش اوچاغی دا دوشورولدو !

تورکیه اعلام ائتدی: « قاراباغ و اونون اطرافیندا اولان یئددی شهر آذربایجان تورپاغی اولاراق ائرمنستان طرفیندن اشغال اولوب و اشغال اولموش تورپاقلار تمامیله آذربایجانا قایتاریلمالیدیر و بیز بو مسئله‌ده آذربایجانین یانینداییق و آذربایجان بیزدن یاردیم ایسترسه بیز اوردوموزلا اونلارا یاردیمجی اولاریق، آمما ایندی معنوی حالدا اونلاردان حمایه ائدیریک!»

18 اوکتوبر 2020 « جبرائیل» شهری‌ و تاریخی « خدا آفرین» حسرت‌ کؤرپوسوده  ایگید و دلاور عسگرلریمیزین شهامت و شهادتی ایله وطنه قووشدو و آذربایجان بایراغی حسرت کؤرپوسو اوزه‌رینده سانجیلیب دالغالاندی!

20 اوکتوبر2020 «زنگیلان» شهری‌ده  ائرمنی جایناغیندان آزاد ائدیلدی!

حسرت کؤرپوسو آزاد اولاندان سونرا آراز چایی اطرافیندا یاشایان گونئی آذربایجانلیلار آراز قیراغینا توپلاشاراق آرازین اوتاییندا گؤرونن عسگرلریمیزه سلام وئریب اونلارین ایگیدلیگینی آلقیشلایاراق سازلا- سؤزله: « آذربایجان سنسن منیم علویتیم شان - شؤهرتیم....» ماهنیلارینی بیرلیکده اوخودولار!

اونلار بو تایدان او تای آذربایجان اوردوسوندان حمایه ائتدیکده ایران ژاندارما قوه‌لری گونئی‌لیلرین قاباغینی آلماغا چالیشیردی،آمما یئنه گونئی جاوانلاری سسله ییردیلر : «یاشاسین...! » او تایدان آذبایجان عسگرلری جاواب وئریردیلر : « آذربایجان...!» باشقا شعار: « آذربایجان وار اولسون، ایسته مه‌ین کور اولسون» ایدی.

                                      گونئی آذربایجانلیلارین سئوینجی،

                                          پان ایرانیستلرین عزاسی !

آذربایجان اوردوسو اشغال اولموش شهر و کندلری بیرَر  بیرَر اشغالدان آزاد ائدیب ائرمنی جایناغیندان چیخارتدیقجا گونئی آذربایجانلیلارین اوره‌یی سئوینیر، آراز قیراغینداکی سویداشلاریمیز بیرلیکده  سئوینجدن آغلاییردیلار[iii] ، آمما پان ایرانیستلر و آذری‌چیلر، آذربایجان اوردوسونون غلبه‌سیندن عزا توتماق قدری راحاتسیز ایدلر!  اونلار آذربایجان اوردوسونون ظفریندن هئچ بیر سؤز آچمادان، نه بیلیم سوریه‌لی دؤیوشچولری‌نین آذربایجاندا  دؤیوشدویوندن دانیشیردیلار!

یعنی بونلارین دانیشماغا داها بیر سؤزو قالمادیغیندان و ائرمنستانین بو ساواشدا شکست یئدیگیندن،باشقا بهانه‌لر دالیندا ایدلر و یالانچی اتهاملار آذربایجان دؤلتینه یاپیشدیرماغا چالیشیردیلار، بیر حالدا کی، قوزئی آذربایجانین 100000( یوز مین) تعلیم گؤرموش و گوجلو اوردوسو وار ایدی و هئچ بیر موزدور و باشقا دؤیوشچویه احتیاجی یوخ ایدی.

قاراباغ ساواشی کلاسیک و مدرن ساواش ایدی، مدرن ساواشدا پارتیزانی دؤیوشچو بیر ایش گؤره بیلمز و آذربایجان مسئوللاری‌دا بو اتهامی دفعه‌لرله ردّ ائدیردیلر.

«قوبادلی» شهری‌ده 25 اوکتوبر 2020 ده ائرمنی اشغالیندان آزاد اولدو، یعنی آذربایجان اوردوسو  اؤز قهرمانلیقلاری ایله اشغالدا اولان شهرلری سرعتله و بیر بیری‌نین آردینجا آزاد ائتدیکده بؤیوک قهرمانلیقلار یاراتدیلار؛ آمما 5 نوامبر2020 ده آذربایجانین اینجه صنعت مرکزی ساییلان،شاعیرلر و ادبیاتچیلار شهری اولان «شوشا»‌نین اشغالدان آزاد اولماغا یاخینلاشما خبری سوسیال شبکه‌لرده یاییلدیقدا سئوینجیمیزین حدّی مقداری یوخودو! آمما شوشانین اوچ طرفی ال چاتماز قایا اولدوقدا بو شهری اشغالدان آزاد ائتمک اینانیلماز کیمی ایدی، بو گونلر شوشا خبرلرینی مختلیف قایناقلاردان ایزله‌مکده گئجه گوندوزوموز یوخودو!

پان‌ایرانیست‌لرین و ائرمنستانین فارس دیلینده یاییلان رادیو خبرلرینی اوخویاندا اوره‌ییمیز توتولور، گؤزلریمیز یاشاریردی، آمما تورکیه و قوزئی آذربایجان رادیو - تلویزیون خبرلرینی دینله‌یینده گؤزلریمیزه ایشیق و اوره‌ییمیزه اومید گلیردی!

«8 نوامبر2020» ( 18 آبان 1399) بازار گونو،اینانیلماز کیمی اولان بیر خبر، آذربایجان جمهوریتی پرزیدنتی و همیشه دوز و اطمینانلی خبری اعلام ائدن سایین «ایلهام علی یف» طرفیندن، گون اورتادان بیرآز قاباق دونیایا یاییلدی!

« شوشا شهری اشغالدان آزاد اولدو...!»

آخ ... ! بو خبر نه قدر گؤزل، نه قدر ائتگیلی و نه قدر گوجلو ایدی!

ال چاتماز «شوشا» شهری و یا اصلینده تاریخی شوشا قالاسی نئجه آلیندی، نه تاکتیک ایشلندی؟  داها چوخ افسانه کیمی اولدو!

بو افسانه‌لری بیزیم ایگید و قهرمان عسگرلریمیز اؤز جانلاری‌نین، قانلاری‌نین قیمتینه یازیب - یاراتدیلار و آذربایجان تاریخی بو قهرمانلاریمیزین آدلارینی، ایگیدلیکلرینی اؤز صحیفه‌لرینده ابدی اولاراق قیزیل قلمله یازاجاق....!

ای آذربایجان!

سن ایگید، قهرمان و جانلارینی وطن یولوندا قوربان وئرن وطن اوغوللارینا فخر ائت...!