+0 بَگَن (Bəyən)
خوردادین بیری، تاریخی گونلریمیزدندیر!
حسن راشدی:
١ خورداد ١۴٠٣
بو گون خوردا آیی نین بیرینجی گونو، بو گون، حافظه میزده قالان ان آزی ایکی تاریخی گونلردندیر!
بیرینجیسی:
میلّی نهضت دؤنمینده قیسا، آمما مهم و اؤنملی بیر ایل‌لیک سید‌جعفر پیشه وری نین اؤندرلیگی ایله اداره اولان «اؤز ارک» (خودمختار) آذربایجانین دادستانی، جسارتلی اینسان «فریدون ابراهیمی» نین، قدار پهلوی رژیمی‌نین دار آغاجیندا آسیلان گونو ( ١ خورداد ١٣٢۶)
ایکینجیسی:
«ایران» روزنامه‌سینین ١٣٨۵ ایل اوردیبهشت آییندا آذربایجان تورکلرینه ائتدیگی رزیلانه توهینه اعتراض اولاراق، خوردادین بیریندن و تبریزدن باشلایاراق، خوردادین یئددیسنه قدر اورمو، اردبیل، زنجان، خیاو، سولدوز و آذربایجانین بوتون شهرلرینده او جمله‌دن تهراندا داوام ائدن سراسری اعتراض گونو!
بو حادثلی گونلری آرخادا قویاراق
بیزیم میلّی حرکتیمیز هر زامان دونیانین ان مدنی و مدرن حرکتلریندن اولموشدور!
بو گونده بو مدنی حرکت اؤز یولونا داوام ائتمکده دیر.
آذربایجانین میلّی حرکتی بو یولدا زحمت چکن بوتون اینسانلاریمیزین زحمتی و بیرلیگی سایه سینده بو گونه گلیب چاتمیشدیر، بو حرکتده هر کس اؤزونو محور ساییب باشقاسینی اؤزونه تابع ائتمک ایسترسه، یقین بیلسین کی، یانلیش یولدا آددیملاماقدان باشقا بیر ایش گؤرمه‌ییب.
بیزیم گوجوموز بیرلیکده دیر، آمما بو بیرلیک، یالنیز بیر جور فیکیرلشیب بیر جور حرکت ائتمه آنلامینا گلمز!
یئتَرکی، چئشیتلی فیکیرلره حؤرمت بسله‌ییب، بیر بیریمیزی تخریب ائتمه‌یک، میلّتیمیز دوز یول گئدنلری اؤزو یاخشی سئچیب اونلارا حؤرمت بسله‌یه‌جک!
بو گونلر، میلّی و اینسانی حاقلاریمیزدان مدافع ائدن چوخلو ایگیدلریمیز مختلیف اتهاملارلا دوستاقلاردا چتین گونلرینی کئچیریرلر، اونلارین فعالیت و چالیشمالاری ان ایلکین و ابتدایی حاق اولان آنا دیلده مکتبلرده درس اوخوماق و بوتون ساحه‌لرده حاکیم ائتنیک‌له برابر حقوقا مالیک اولماقدیر، آمما اونلار مختلیف و غیر مرتبط اتهاملارلا قارشیلاشیرلار!
اگر بو محبوسلارین سوچلاری بو ایلکین و ابتدایی اینسان حاقلاری دئییل‌سه، لطفا بو محبوسلاریمیزی آزاد، علنی و دئموکراتیک بیر فضادا محاکیمه ائدین!
https://t.me/yurddash