+0 بَگَن (Bəyən)
آذربایجانین تانینمیش ادیب و یازاری
خانیم «زهره وفایی» وفات ائتدی...!
حسن راشدی
سوت گونو: ١ مهر ١۴٠٣
آذربایجان، بو گون چالیشقان ادیب، یازار، ژورنالیست و تانینمیش شخصیتی خانیم «زهره وفایی» نی الدن وئردی!
خانم وفایی١٣٣٢ هجری شمسی ایلی تبریزده دونیایا گؤز آچدی ، انقلابدان سونرا آنادیلیمیزده مطبوعاتین چاپ اولماسینا نسبی آزادلیق یاراندیقدا خانیم وفایی‌دا بو یولدا چالیشماغا جدی صورتده باشلادی، آمما اونون ١٣٧٠- جی ایللرده تورکجه- فارسجا «جوالدوز» طنز نشریه‌سینه باشچیلیق ائدیب چیخارماسی اونون آذربایجان مطبوعات یولوندا گوجلو چالیشما و اراده‌سینی گؤستردی.
او ایللر، «جوالدوز» مجله‌سینی من تهراندا آلارکن اوخوماغا باشلاردیم، چونکو بو نشریه،آذربایجانین آجی واقعیت و گئرچکلرینی کاریکاتور و طنز چرچیوه‌‌ده اوخوجولارا چاتدیریردی، مجله‌ده چاپ اولان بو آجی واقعیتلرین بیرینی هئچواخت اونوتمارام!
مجله‌نین نومره‌سی‌نین بیرینده و قابیغی اوستونده بیر کاریکاتور چکیلیب یازیلمیشدی ( بیلمیرم تورکجه یا فارسجا آمما مفهومو بئله ایدی):
«...پروژه نین کولونگو تبریزده یئره ویریلدی، اصفهاندا استفاده‌یه وئریلدی...!»
سانیرام ١٣٧١- جی ایل ایدی، او ایل، تهراندا «مطبوعات سرگیسی » آچیلان زامان خانیم وفایی‌نین‌ده غرفه‌سی واریدی ، سرگی‌نین داخیلی نشریه‌سینده یازیلمیشدی :
«جوالدوز » مدیری خانیم زهره وفایی ایرانین و دونیانین ایلک طنز نشریه سینین مدیری‌دیر.»
جوالدوز چیخان زامان بئله بیر دوشونجه ادبیاتچیلار آراسیندا واریدی:
«جوالدوز طنز نشریه‌سی ، کئچمیش زامانلاردا شمالی آذربایجاندا چیخان «موللا نصرالدین» نشریه‌سینین جنوبی آذربایجان مدلی‌دیر.»
تاسفلر اولسون «جوالدوز» نشریه‌سینین عؤمرو اوزون اولمادی و ١٩ نومره‌دن سونرا دایاندی.
خانیم وفایی‌نین چالیشماسی جوالدوزون دایانماسی ایله بیتمه‌دی، او « زینب پاشا » انتشاراتینی اداره ائدیردی و بو طریق‌ایله آذربایجان مسئله‌لری ایله ایلگیلی چوخلو کیتابلار منتشر ائتدی.
خانیم وفایی یازیب یاراتماقدان دایانمادی و آذربایجان ادبیاتی ایله باغلی دگرلی کیتابلار اوخوجولارا تقدیم ائتدی .
بوگون آذربایجانین ادیب شخصیتی خانیم #زهره_وفایی آرتیق، بیزیم ایچیمیزده یوخدور آمما اونون یازیب - یاراتدیقلاری اثرلر آذربایجان ادبیات خزینه‌سینده ابدی اولاراق قالاجاقدیر.
خانیم وفایی‌نین وفاتینی اونون حؤرمتلی عائله‌سینه و آذربایجانیمیزا باش ساغلیغی وئررکن اولو تانری‌دان او مرحومه رحمت و مرحمت دیله‌ییرم.