یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

"1385" جی ایل خورداد قیامی اونودولاجاق می ؟!

+0 بَگَن (Bəyən)

  "1385" جی ایل خورداد قیامی اونودولاجاق می ؟!

                                                     حسن راشدی : ۲۷ اوردیبهشت ۹۱ 

1385 – جی ایل اوردیبهشت  آیی نین  22-سی دولت اورگانی اولان " ایران " گونده‌لیگی ، تمل و بینوره‌سی پهلوی حاكمیتی دؤنمیندن قویولان راسیسم و پان فارسیسم تفكّورونه دایاناراق ایران آدلی اؤلكه‌ده و تقریبا اونون یاری نفوسونو  تشكیل ائدن توركلرین حریمینه جسارت ائدیب بو گونده‌لیگین اؤزل سایی‌سیندا و اوشاقلارا آیریلمیش كاریكاتور حیكایه‌لی صحیفه‌سینده حیاسیزجاسینا  توركلری " سوسك " ( بؤجك ) آدلاندیردی !

لاكین بو اهانت و توهین جاواب‌سیز قالماییب آیاغینی جیزیغیندان قیراغا اوزادان "‌ایران " گونده‌لیگی  علیهینه اعتراض قیامی آذربایجانین گؤز ببه‌گی اولان و تاریخ بویو قیاملار و رشادتلر  مركزی ساییلان تبریزدن و تبریزین بیلیم یوردوندا تحصیل آلان و آذربایجانیمیزین آییق وجدانلاری و دوشونن بئینلری ساییلان اؤیرنجیلری طرفیندن باشلاندی .

 " ایران " گونده‌لیگی مسئوللاری، بو اعتراضلارا اعتناسیز قالاراق تاریخ بویو هئچ بیر توهین و ذلالته بویون اگمه‌ییب حتی جانلاریندان كئچن و ۷۰ میلیون نفوسو اولان ایران آدلی اؤلكه‌نین ۳۰ میلیونوندان چوخونو تشكیل ائدن توركلردن ، بئله بیر عذرده دیله‌مه‌دی ! 

طبیعی‌دیر كی،بو اعتناسیزلیق ائله او توهین قَدَر  بلكه‌ده اوندان چوخ ، آذربایجان میلّتینه اهانت‌ایدی . بو اعتناسیزلیغین آردیندان تبریز ،‌اورمو ،زنجان ، اردبیل ، تهران و باشقا شهرلرین بیلیم یوردوندا تحصیل آلان تورك اؤیرنجیلری "ایران " گونده‌لیگی‌نین بو جسارت و حیاسیزلیغینی محكوم ائده‌رك اوردیبهشت آیی‌نین ۲۵-۲۶و ۲۷- جی گونلری بو شهرلرین بیلیم یوردلاری ایچینده اعتراض نمایشی كئچیردیلر و دؤلت اورگانی اولان " ایران " گونده‌لیگی‌نین نژادپرستانه و راسیستی سیاستینی قینادیلار . آمما بو اعتراضلاردا " ایران " گونده‌لیگی مسئوللارینا هئچ بیر تاثیر بوراخمادی و اونلار او هفته نین سونو و اوردیبهشت آیی‌نین ۲۹ – جو گونو و یئنه همان اؤزل صحیفه‌ده بو اعتراضلارا اعتنا ائتمه‌دن توركلره ائتدیكلری توهینی اهمیت سیز ساندیلار !

دئمه‌لی " ایران " گونده‌لیگی مسئوللاری بلكه هدفلی بیر پلان اوزه‌رینده بو كاریكاتورلو توهینی ایره‌لی سورمكده اولدوقلاریندان حتی بو صحیفه‌نین یازانی " مانا نیستانی " نین دیلیندن بئله ، یانلیش بیر یازی‌نین یازیلدیغینی دیله گتیرمه‌ییب بو یازی‌دان غیر مستقیم اولاراق مدافعه ائتدیلر!

طبیعی‌دیر آذربایجان میلّتینه بئله بیر حؤرمتسیزلیك باغیشلانیلماز و واز كئچیلمزایدی ؛ تاریخ بویو دونیا امپراتورلاری و تزارلاری قارشی‌سیندا داغ كیمی دایانان توركلر و هئچ بیر جسارت و اهانته دؤزمه‌ین آذربایجان میلّتی بو قدر آچیق و آیدن بیر نشریه‌‌نین تحقیر و توهینینه دؤزه بیلردیمی ؟  

بو اساسدا گوجلو لاكین مدنی بیر اعتراض نمایشی ایلك اؤنجه سوت گونو ( یكشنبه ) خوردادین بیرینجی گونو (۸۵- جی هجری گونش ایلی ) تبریز اهالیسی و قاباقدا و اؤن سیرادا اؤیرینجی‌لر و میلّی یولدا چالیشانلار اولماقلا تبریز خیابانلاریندا باشلاندی ؛ بو اعتراضین گور سسی یالنیز تبریز ، آذربایجان و ایراندا یوخ ، بلكه دونیانین هر یئرینده ائشیدیلدی !

تبریز اهالیسینه آرخا دوروب " ایران " گونده‌لیگی‌نین راسیستی سیاستینه اعتراض اولاراق ، اورمو ، زنجان ، اردبیل ، سولدوز ، قوشاچای ، خیاو (مشكین‌شهر ) ، موغان ( پارساباد – گئرمی ) ، مرند ،  میانا ، ماراغا ، خوی ، سالماس ،ماكی و آذربایجانین باشقا شهرلری و حتی تهراندا یاشایان توركلر  آردی – آردیندان بو اعتراضا قوشولدولار .

بئله بیر دورومدا اؤلكه مسئوللاری‌دا بو اعتراض سسلرینی ائشیدیب " ایران " گونده‌لیگی‌نین نشرینی دایاندیریب اونون مسئول مدیری و توهینلی كاریكاتور حیكایه نی یازان " مانا نیستانی " نی توتوقلاییب حبس ائتدیلر .

 آمما بو اعتراض سسلری‌نین ائشییدیلمه‌سی و آذربایجان میلّتی‌نین اؤز وارلیق و شرفیندن مدافعه ائتمه‌سی  چوخدا اوجوز باشا گلمه‌دی ؛ چونكو تبریز، اورمو ، سولدوز و خیاودا گول پارچاسی كیمی گنجلریمیز ، شرفلی و میلّی دوشونجه‌لی اینسانلاریمیز بیر مدنی اعتراض‌دا و اینسالیق شرفیندن  و حیثیتیندن مدافعه ائتمك یولوندا  آل قانلارینا بویانیب شهید اولدولار !

اگر بیر نئچه آی سونرا "‌ایران " گونده‌لیگی یئنی‌دن ایشه باشلاییب ، اونون مسئول مدیری بو ماجرالارین یاراتماسیندان تبرئه اولوب توهینلی كاریكاتور یازاری "مانا نیستانی " ایراندان قاچیب یا قاچیریلسادا ، آذربایجان میلّتی هئچ زامان اؤز شرف و حیثیتی یولوندا آذربایجان شهر و بؤلگه لرینده باشلانان ۱۳۸۵- جی ایل خورداد آیی‌نین قیامی‌نی و بو یولدا جانلارینی قوربان وئرن اردملی شهیدلری‌نین خاطره‌سینی اونوتمایاجاق !