+0 بَگَن (Bəyən)
آی یاندیم !
نه بیلیم ، ائله بیل حتی یاندیغیمیز حالدادا " آی یاندیم ! " دئمه‌یه‌ده حاقّیمیز یوخدور !
بو مجازی دونیادا و بئش- اون نفرین بو سیته یه باخماسی دا گویا مسئله یارادا بیلَرمیش كیمی بو " یوردداش نفطه او آر جی www.yurddash.org" سیته سی ده فیلتر اولدو ! گویا بیزیم حتی یاندیغیمیز حالدادا " آی یاندیم " دئمه‌یه‌ده حاقّیمیز یوخوموش !
دئدیك بو آنا یاسادا ۱۵ – جی ماده نه واخت اجرا اولاجاق ؟ بیر عده بیزه دئدیلر " پان توركیست " ! ، دئدیك آنا یاسانین ۱۹ – جو ماده سینده سوی -كؤك ، دیل و لهجه فرقی اولمادان بوتون ایراندا یاشایانلار برابر حقوقا مالیكدیرلر ،بئله اولورسا بیز توركلرده نفسوموزلا مقایسه ده فارسلار قدری حق و حقوقوموز وار و دیلیمیز فارس دیلی كیمی رسمی اولمالی دیر ، دئدیلر بو سؤزلر پان توركیست‌لرین سؤزودور ! ؛ دئدیك بو تهرانین یاری جمعیتی تورك دیللی دیر هئچ اولمازسا بو ۸ -۹ تلویزیون كانالی‌نین ایكیسی تورك دیلینده اولسون بیری ده باشقا غیری فارس او جمله دن كورد ، توركمن ، عرب ، بلوچ و …دیلینده ، دئدیلر بو لاپ پان توركیسمین اؤزودور ! دئدیك تورك دیللی اوستانلاردا او جمله دن شرقی آذربایجان ، غربی آذربایجان ، اردبیل ، زنجان اوستانلاریندا كی ، اصلا فارس دیللی هئچ یوخدور بو اوستانلاردا رادیو – تلویزیون برنامه لری نین یالنیز یاریسی ، یعنی مثلا آلتی تلویزیون كانالیندان اوچو و همدان ، قزوین ، مركزی ، شمالی خراسان اوستانلاریندا كی هئچ اولمازسا اوچ قسمت دن ایكی قسمتی تورك دیللی‌دیرلر بو كاناللارین اوچدن بیری توركجه اولسون ، دئدیلر بو سؤزلر یالنیز پان توركلر آغزیندان چیخار !
دئدیك بیز آذری دئییلیك و توركوك ، بیزه آذری دئمه یین . دئدیلر سیزین اؤزونوزدن خبرینیز یوخدور سیز آذری سینیز و هركس بو سوزو دانیشسا بللی دیر كی اؤزونو تانیماییب و " پان توركیست " دیر ! سونرا دئدیك آخی بیز توركلر بو مملكت‌ده ۱۰۰۰ ایل حكومت سورموشوك و بو مملكتی قوروماغا فارسلارداندا چوخ قان وئرمیشیك و حتی دیلداش و سویداشلاریمیزلادا ساواشمیشیق و جمعیتیمیزده ان آزی بو مملكت‌ده فارسلار قدری دیر ، بس فارسلار قدری‌ده حاقّیمیز وار بو مملكتین امكانلاریندان فایدالاناق و بو ایران آدلانان اؤلكه‌ده هئچ اولمازسا ابتدای قدری تورك دیلینده اؤز آنا دیلیمیزده درس اوخویاق ، دئدیلر سیزین هدفینیز فارس دیلینی آرادان آپاماقدیر و بونو دانیشان لاپ " پان توركیست "دیر !
هر نه قانون چرچیوه سینده ایسته دیك ، آلنیمیزا پان توركیست دامغاسی یاپیشدیردیلار كی ، نهایت او گون بیر نفر گلیب منه دئدی :
" من پان توركیست اولموشام ! " دئدیم بو سؤزو دانیشما كی ، سوچ و گوناهدیر و باشقالارینین حاقّی اوستونه آیاق قویماق آنلامیندادیر. دئدی واللاه من كی ، ایندیه قدر بو ایسته‌نیلن حاقلاردا حاقّی تاپدالاماق مسئله سی گؤرمه دیگیم حالدا بو ایستَك‌لری ایسته‌ینلره " پان توركیست " دئییب‌لر ، گؤردوم پان توركیست اولماق یاخشی شئی دیر اونا گؤره پان توركیست اولدوم !!