+0 بَگَن (Bəyən)
حسن راشدی
1385 – جی ایل اُردیبهشت آیی‌نین 22-سی دولت اورگانی اولان " ایران " گونده‌لیگی، تمل و بینوره‌سی پهلوی حاكمیتی دؤنمیندن قویولان راسیسم و پان فارسیسم تفكّرونه دایاناراق ایران آدلی اؤلكه‌ده و تقریبا اونون یاری نفوسونو تشكیل ائدَ‌ن توركلرین حریمینه جسارت ائدیب بو گونده‌لیگین اؤزل سایی‌سیندا و اوشاقلارا آیریلمیش صحیفه‌سینده كاریكاتورلو بیر حكایه‌ده حیاسیزجاسینا توركلری " سوسك " ( سوسه‌ری بؤجَگی ) آدلاندیراراق، اونلارین كوتله‌وی محو ائتمه یول‌لارینی اوشاقلارا اؤیرَتمه‌یه چالیشمیشدیر!
لاكین بو اهانت و توهین جاواب‌سیز قالماییب آیاغینی جیزیغیندان قیراغا اوزادان "ایران " گونده‌لیگی علیهینه اعتراض قیامی آذربایجانین گؤز ببه‌گی اولان و تاریخ بویو قیاملار و رشادتلر مركزی ساییلان تبریزدن و تبریزین بیلیم یوردوندا تحصیل آلان و آذربایجانیمیزین آییق وجدانلاری و دوشونن بئینلری ساییلان اؤیرنجیلری طرفیندن باشلاندی.
" ایران " گونده‌لیگی مسئوللاری، بو اعتراضلارا اعتناسیز قالاراق تاریخ بویو هئچ بیر توهین و ذلالته بویون اگمه‌ییب حتّا جانلاریندان كئچن و ۷۰ میلیون نفوسو اولان ایران آدلی اؤلكه‌نین ۳۰ میلیونوندان چوخونو تشكیل ائدَ‌ن توركلردن، بئله بیر عذرده دیله‌مه‌دی!
طبیعی‌دیر كی،بو اعتناسیزلیق ائله او توهین قَدَر بلكه‌ده اوندان چوخ، آذربایجان ملّتینه اهانت‌ایدی. بو اعتناسیزلیغین آردیندان تبریز، اورمو،زنجان، اردبیل، تهران و باشقا شهرلرین بیلیم یوردوندا تحصیل آلان تورك اؤیرنجیلری "ایران " گونده‌لیگی‌نین بو جسارت و حیاسیزلیغینی محكوم ائده‌رَك اُردیبهشت آیی‌نین 25، 26 و ۲۷- جی گونلری بو شهرلرین بیلیم یوردلاری ایچینده اعتراض نمایشی كئچیردیلر و دؤلت اورگانی اولان " ایران " گونده‌لیگی‌نین نژادپرستانه و راسیستی سیاستینی قینادیلار. آمما بو اعتراضلاردا ،" ایران " گونده‌لیگی مسئوللارینا هئچ بیر تاثیر بوراخمادی و اونلار او هفته‌نین سونو و اُردیبهشت آیی‌نین ۲۹ – جو گونو و یئنه همان اؤزل صحیفه‌ده بو اعتراضلارا اعتنا ائتمه‌دن توركلره ائتدیكلری توهینی اهمیت‌سیز ساندیلار!
دئمه‌لی " ایران " گونده‌لیگی مسئوللاری بلكه هدفلی بیر پلان اوزه‌رینده بو كاریكاتورلو توهینی ایره‌لی سورمكده اولدوقلاریندان حتّا بو صحیفه‌نین یازانی " مانا نیستانی "نین دیلیندن بئله، یانلیش بیر یازی‌نین یازیلدیغینی دیله گتیرمه‌ییب بو یازی‌دان غیر مستقیم اولاراق مدافعه ائتدیلر!
طبیعی‌دیر آذربایجان ملّتینه بئله بیر حؤرمتسیزلیك , و بو حؤرمتسیزلیگه اعتراضین گور سسی یالنیز تبریز، آذربایجان و ایراندا یوخ، بلكه دونیانین هر یئرینده ائشیدیلدی!
تبریز اهالیسینه آرخا دوروب " ایران " گونده‌لیگی‌نین راسیستی سیاستینه اعتراض اولاراق، اورمو، زنجان، اردبیل، سولدوز، قوشاچای، خیاو (مشكین‌شهر )، موغان ( پارساآباد و گئرمی )، مرند، میانا، ماراغا، خوی، سالماس، ماكی و آذربایجانین باشقا شهرلری و حتّا تهراندا یاشایان توركلر آردی – آردیندان بو اعتراضا قوشولدولار.
بئله بیر دورومدا اؤلكه مسئوللاری‌دا بو اعتراض سسلرینی ائشیدیب " ایران " گونده‌لیگی‌نین نشرینی دایاندیریب اونون مسئول مدیری و توهینلی كاریكاتورلو حكایه‌سینی یازان " مانا نیستانی "نی توتوقلاییب حبس ائتدیلر.
آمما بو اعتراض سسلری‌نین ائشیدیلمه‌سی و آذربایجان ملّتی‌نین اؤز وارلیق و شرفیندن مدافعه ائتمه‌سی چوخدا اوجوز باشا گلمه‌دی؛ چونكو تبریز، اورمو، سولدوز و خیاودا گول پارچاسی كیمی گنجلریمیز، شرفلی و ملّی دوشونجه‌لی انسانلاریمیز بیر مدنی اعتراض‌دا و انسانلیق شرفیندن و حیثیتیندن مدافعه ائتمك یولوندا آل قانلارینا بویانیب شهید اولدولار!
اگر بیر نئچه آی سونرا "ایران " گونده‌لیگی یئنی‌دن ایشه باشلاییب، اونون مسئول مدیری بو ماجرالارین یاراتماسیندان تبرئه اولوب توهینلی كاریكاتورلو حكایه یازاری "مانا نیستانی " ایراندان قاچیب یا قاچیریلسادا، آذربایجان ملّتی هئچ زمان اؤز شرف و حیثیتی یولوندا آذربایجان شهر و بؤلگه‌لرینده باشلانان ۱۳۸۵- جی ایل خورداد آیی‌نین قیامی‌نی و بو یولدا جانلارینی قوربان وئرَ‌ن اَردملی شهیدلری‌نین خاطره‌سینی اونوتمایاجاق!