یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

« صبر ائله دیك »

+0 بَگَن (Bəyən)

    «صبر ائله دیك »  

                         بختیار واهابزاده 

                  ...................................     

          آچان گوندن گؤزوموزو

         اومیدلرین لایلاسیندا

              خومار گؤردوك اؤزوموزو.

        آرزوموزو وئرمه دیلر

          بیزه آنجاق دؤز دئدیلر ،

                  ائله بیلدیك دوز دئدیلر !!

       هرگئجه‌نین گؤندوزو وار 

      گله‌جك گوندوز دئدیلر

                     بیزگؤزله دیك.

     قلبیمیزده باش قالدیران

      اومودلاری عزیزله‌ دیك  

                   هئی ایزله‌دیك

       اوجا-اوجاكورسولردن

      وعظ اولونان نیطق لری.

حیاتدا یوخ،

          قزئتلرده گؤستردیلر

         بیزه یالنیز خیری-شری

شیرین –شكر یالانلاری یئیه-یئیه

        بیز ایناندیق گله‌جه‌یه.

  اوگلمه دی،

   دوز اَییلدی،

  اَیریلیكلر دوزه‌لمه‌دی.

آرزوموزون عوضینه

          بیزه یئنه سؤز وئردیلر.

حقیقتی گؤرمه‌مكچون

      ده‌ییشدیریب گؤزوموزو

      بیزه باشقا گؤز وئردیلر.

باخیب ساختا گؤزوموزله

           هامار گؤردوك چوخورو بیز !

سارای بیلدیك آخورو بیز ،

گؤره‌نمه‌دیك قات باغلایان پاخیری بیز.

بو پاخیری گؤره‌نلری

خالق یولوندا جاندان كئچن ارنلری

«خالق دوشمانی» دامغاسیلا

لكه‌له‌ییب محو ائتدیلر

حاقّ آدینا حاقّی ییخیب سوروتدولر.

بؤزو آغدان سئچه‌نلری

                زیندانلاردا چوروتدولر .

سوسوب دؤزدوك ،دؤز دئدیلر.

سؤزدن بولوق

سؤز ایچینده اوز دئدیلر.

سؤز ایچینده اوزه-اوزه

صبریمیزدن بزك ووردوق عؤمروموزه،

هرجفایا دؤزه-دؤزه

 بیز آلچالدیق آددیم باشی.

قول ائتدیلر وطنینده وطنداشی،

آیاق آلتدا پالاز اولدو لیاقتی

بیز اوجالیق ظنّ ائله‌دیك رذالتی،

صبر ائله‌دیك. 

قارا گونو آغ سؤزیله پرده‌له‌دیك.

ظن ائتمه‌یین،

 بدبختلیگی اؤزوموزه درد ائله‌دیك.

«بیزخوشبختیك،بختوریك»-سؤزلرینی

شوعار كیمی دیلیمیزده وئرد ائله‌دیك.

قیریب قالین مئشه‌لری پامبیق اكدیك.

قانیمیزدان گولاب چكدیك.

یوز هئكتارین محصولونو اون هئكتارا،

اون هئكتارین محصولونو بیرهئكتارا،

اون نفرین محصولونو بیرنفره

                          یازا-یازا.

هم اینسانی هم تورپاغی

هئچه وئردیك بیز گودازا.

مئیدان وئردیك آغ یالانا

حقیقت‌ده تاپدالانا- تاپدالانا

چكیلدی داغلار دالینا،

بلكه...اوردا دالدالانا !

صبر ائله دیك،

اؤزوموزه جبر ائله‌دیك.

اوردئن، مئدال یاریشیندا

دومانلانیب بئیینلری

د د ت‌یله زهرلندیك

یوز-یوزلری مین –مین لری،

بیرجه چنگه آغ پامبیغا

قوربان وئردیك گنج قیزلاری گلینلری.

بودونیایا گؤز آچمامیش كؤرپه‌لری

بطینده‌جه زهرله‌دیك.

یاشامادیق باش گیرله‌دیك

یالان-یالان وعده‌لری یئیه –یئیه؛

اومیدایله قانیمیزی دویوزدوروب

بیز ایناملا یئنه باخدیق گله‌جه‌یه.

گله‌جكلر گلیب كئچدی،

اومودوموز دوغرولمادی.

شیرین –شكر یوخولاردا چین اولمادی.

آمّا یئنه صبر ائله دیك

قلبیمیزی آرزولارا قبر ائله‌دیك

سوسماغی دا غئیرت ساندی غئیرتیمیز !

صبریمیزین لایلاسیندا

                     خومارلاندی غئیرتیمیز

بو دؤزومه،

بو ظولومه،        

حئیرتده‌دیر حئیرتیمیز !!