آذربایجان میلّی حركتی نین آغ ساققاللاری طرفیندن ،                       

         آجلیق آكسیاسی كئچیرن 5 نفر " یئنی گاموح" اؤندرلرینه مكتوب     

 حؤرمتلی دوكتور لطیف حسنی ، مهندس محمود فضلی،آیت مهر علی بیگلو ، بهبود قلی زاده و مهندس شهرام رادمهر جنابلاری

میلّتیمیزین دَیَرلی و سئچگین اوغوللاری!

سیزین بو گونكو دورومونوزو بیز ائشیكده و ائویمیزده اولاراق بیلیریك و چوخ نیگران حالدا ایزله ییریك. بیز بیلیریك كی، سیز مدنی چالیشمادان باشقا اؤلكه یه تهلكه یارادان بیر ایش گؤرمه ییب سینیز  لاكین اوزون سوره لی حَبسه محكوم اولوبسونوز .

بیزده سیز كیمی بو 9 ایل حبسی نه اینكی سیزه، بلكه مدنی یولدا چالیشان هئچ بیر كیمسه یه  روا گؤرموروك و اینانیریق كی، سیزین آجلیق آكسیاسیلا باشلادیغینیز بو یئنی مجادله حركتین تاریخینده یئنی بیر صحیفه آچمیشدیر ، لاكین سیزین ساغلاملیغینیز عائیله نیزه، بیزه، و باشقا مدنی یولدا چالیشانلارا چوخ اؤنملی دیر .

بونا گؤره ده سیزدن خواهیش ائدیریك ، عائیله نیزین ، بیزیم و حتی ساغلاملیغینیزا نیگران اولان مینلر اینسانلارین تقاضا و ایسته یینه مثبت جاواب وئریب ان آزی كئچیجی و موقتی ده اولموش اولسا ، آجلیق اكسانیزی دایاندیریب و دالی سالاسینیز .

طبیعی دیر بیزده مسئول مقاملاردان گؤزله ییریك بو مسئله یه مثبت نظرله یاناشیب سیزه وئریلن حؤكمو یئنی دن گؤزدن كئچیریب عادلانه بیر محكمه قورولماسینا اقدام ائتسین لر .

                                                             و من ا... التوفیق 15/5/1392

1- حسن هرگلی ( دمیرچی)

2- منوچهر عزیزی

3- حسن راشدی

4- حسین محمدخانی ( گونئیلی)

5- عباس لسانی

6- اكبر آزاد

7- حمید شافعی

8- علیرضا صرافی

9- جلال كودریلو

10- سعید متین پور

...........................................................................................

بو 10 نفرین ایچیندن اونلارین دؤردو  ( اكبر آزاد ، حسن راشدی ،‌حسین محمد خانی ( گونئیلی ) و  جلال كودریلو ) و بیر عده باشقا  ملّی - مدنی یولدا چالیشانلار او جمله‌دن " صیاد محمدیان"  زندانی عائله عضولری ایله بیرلیكده  سه شنبه گونو 15/5/1392 تاریخینده " یئنی گاموح " اؤندرلری نین بیری ، بهبود قلی زاده ایله « رجایی شهر » زیندانیندا و زیندان رئیسی دفترینده گؤروشموش ، میلّتیمیزین و اؤز نیگرانلیقلارینی اونلارین ساغلاملیقلاری حاقدا  اونلارا بیلدیرمیش و آجلیق آكسیالاری‌نین  دایاندیرمالارینی اونلاردان ایسته میشلر . 
.............................................................................................

آجلیق آكسیاسی باره ده سوْن خبر :

میلّتیمیزین نیگرانلیغی و خواهیشی اساسیندا و دونیا مسلمانلاری نین بیر آی اوروج توتدوقدان سونرا بایرام توتدوقلاری « فیطیر بایرامی » مناسبتی ایله ،  5 نفر « یئنی گاموح » اؤندرلری اؤز آجلیق آكسیالارینی فیطر بایرامیندا ( 18/5/92 تاریخینده) و  یئنی و عادلانه بیر محكمه قورولماق شرطی ایله كئچیجی و موقتی اولاراق دایاندیرمیشلار .         شنبه 19/5/92