68 ایل او بهاردان و او سئوینج دن كئچدی !    

                                          حسن راشدی  21 آذر 1392                                  

او گونلری گؤزوموزله گؤرمه سَك ده آتا- آنالاریمیزدان و بؤیوكلریمیزدن ائشیتمیشیك او نشئه لی گونلرین خاطره لرینی . تاریخ ده اؤز صحیفه لرینده ضبط ائدیب او گونلرین خاطره لی حادثه لرینی شیرینلرینی، آجیلارینی دا .

ایكی ایل قاباق ، یئنی ایل تعطیللری گونلرینده، ایلده اولدغو كیمی دوغولدوغوم و یئنی یئتمه چاغلاریما كیمی قوجاغیندا بوی آتیب عطیرلی فضاسیندان نفس آلدیغیم آنایوردوندا و آتا یانیندا ایدیم .

بو گونلرین بیرینده آتامیزلا بیرلیكده موغانشهرده (پارسا آباددا) یاشایان قارداشلارین ائویندن كندیمیزه و آتا ائوینه دؤنمكده ایدیك . بو مسیری گئتمه یه گلیب گئرمی دن كئچیب 30 كیلومتر گئرمی – زاهرا كندیمیزین آراسینی گئتمه لی ایدیك . گئرمی دن یولا دوشنده آتام دئدی ، بو دفعه كندیمیزه گئتمه یه همیشه كی یولدان یوخ باشقا بیر یولدان گئده جه ییك .

آتا گؤستردیگی یول اصلی مسیردن اوزاق ، داغ یولو و عین حالدا یولون چوخو آسفالت اولمامیش یول ایدی ، بو مسیر آسفالت اولماسادا یازین اورتالاریندان سونرا و یای فصلینده اؤز گؤزل طبیعتی ایله صفالی اولور ، آمما یئنی ایلین بایرام گؤنلرینده بو مسیرده ائله بیر صفا اولمور ، ایندی اونون اوجالیقلاریندا قاردا گؤرونوردو .

آتادان یولو نییه بورادان سئچمه سینی نه من و نه قارداشیم هئچ بیریمیز سوروشمادیق ، چونكو حتی بیز یئنی یئتمه - گنج و آتامیز یاری یاش اولدوغو چاغلاردادا آتامیزین سؤزوندن چیخمامیشدیق ، ایندی كی ، منیم 57 و آتامیزین 85 یاشی وار ایدی سؤزونو مطلقا یئره سالمازدیق . دئدیگی مسیره ایكی مینیك ماشینلا و عائله عضولری ایله بیرلیكده داوام ائتدیك .

گئرمی دن سونرا قوزلو و اینی كندلرینی كئچندن سونرا ، سون ایللرده یازین سونلاری و یایین ایستی گونلرینده گئرمی لیلر و اطراف كندلیلرین گزمه لی و بوگونكو دئییم له دئسَك توریستی مكانینا چئوریلَن " داش دیبی " كندینه چاتمامیش ، مسیردن بیر – ایكی كیلومتر قیراقدا و داغلیقدا یئرله شن ، " قره بولاق " كندینه گئتمه یی  آتامیز،تكلیف ائتدی !

ایندیه كیمی بیز قارداشلار بو كنده گئتمه میش و اونو یاخیندان گؤرمه میشدیك ، 55- 60 ایل اولارمیش آتامیزدا بورا گلمه میش میش !

. یولو چینقیللی- داشلی اولسادا اورانی گئتدیك ،كندین یاخینلیغی بیر تپه یه چاتدیقدا آتا ، ماشینلارین بورادا دایانماسینی و هامیمیزین یئره دوشمه سینی بیزدن ایسته دی. ماشینلاری دایاندیریب یئره دوشدوك . تپه ایله آز فاصله ده اولان " قره بولاق " كندینی گؤز آلتیندان كئچیردیك .

منطقه نین باشقا كندلری و بلكه ده اونلاردان داها یوخسول ، بیر چوخ ائولرین صاحیب سیز قالیب اوچوب داغیلماسینی ( لابد صاحیب لری نین فارس شهرلرینه كؤچمه سی نتیجه سینده )  گؤرركَن 10 -  15 ائوین سالیم قالماسینی و قادینلارین كند یاخینلیغیندان بولاقدان سو گتیرمه سینی گؤردوكدن باشقا بوردا بیر اؤزللیك گؤروموردوك ، آتام ایسه اللرینی بیر -بیری نین اوستونه قویوب هم تپه یه و هم كنده حسرت گؤزو ایله باخیردی !

بیز ، بورادا بیر اؤنملی خصوصیت گؤرمه دیكده بیر – بیریمیزه باخدیقدا ، آتا ، بو تعجب لی باخیشلارین معناسینی دویوب دئدی :

اوشاقلار ! بو  كندین سیزه باشقا كندلردن ائله بیر فرقی یوخدور ، آمما بو كند منه بیر كنددن علاوه ، باشقا بیر آنلام و معنا داشییر !

 من اون دوققوز یاشیمدا و 1324 –جو ایلین سونلاری دموكرات فرقه سی نین " جاوانلار سازمانی" تشكیلاتیندا عضو اولدوغومدان ، 1325 جی ایلین یازیندا و 20 یاشیمدا اولاركن ائله بو تپه نین باشیندا یوزلرله اطراف كندلردن گلیب بورا توپلاشان اینسانلارا سخنرانلیق ائدیب ،بوندان سونرا مركز بویوندروغو آلتیندا یوخ ، اؤز گوجوموز و اؤز الیمیزله و بؤیوك رهبریمیز سید جعفر پیشه وری راهنمالیغی ایله استبداد الیندن یاخا قورتاران وطنیمیز آذربایجانا و اونون جاونلارینا  اؤز ایچیمیزدن یارانان دولتیمیزین گؤره جك ایشلریندن ،هیجانلا دانیشمیشام . او زامان ائله بو مكاندان، مندن سونرادا من یاشدا اولان باشقا بیر گنج قیزدا یئنی قورولان دؤلتیمیزین قیزلارا و قادینلارا گوره جك ایشلریندن دانیشدی !

اوشاقلار ! ایندی بیلدینیز نییه من سیزی بو داشلی – چینقیللی یولدان بو كنده گتیردیم ؟ من بورا گلمكله 65 ایل اؤنجه یه ، او آل – الوانلی گونلره ، او آرزو – دیلَك دولو گونلره و 85 یاشیمدا اولاركن 20 یاشیمدا اولدوغوم گنجلیك گونلریمه قاییتدیم و او هیجانلی گونلری یئنی دن یاشادیم !

سونرا آتام همیشه كی  كیمین ، او بیر ایلده مدرسه لرده آنا دیلده درس اوخویان اوشاقلارین سحر چاغی آنا دیلده صبح دعاسی ایله بیرلیكده اوخودوقلاری: