موران - زاهرا كندی   

                             یئنی ایلین ایشنی نئجه باشلادیق !          

                                  حسن راشدی  29 فروردین 1393    

بو ایلده كئچن ایللر كیمی یئنی ایلین  تعطیل گونلرینی گونئی آذربایجانیمیزدا آتا - آنا یوردوندا  موغان - موران Moran منطقه میز و  "زاهرا " آدلی كندیمیزده كئچیردیك .

نه قَدَر بیر عده  بو گونئی آذربایجانی یوخسوللوغا سوروكله ییب گؤزدن سالماق ، اورمو گولوموزو قورودوب دوز باتلاغینا چئورمك و گؤزل آذربایجانیمیزی لوت كویرلرینه اوخشاتماق ایسته سه لرده یئنه آذربایجان سئوگیسی آذربایجان دلی لیلری نین اوره گیندن چیخمیر كی چیخمیر !

حتی شوونیزم باتلاغیندا بوغولوب فارسجا یارمالایان و اؤز هویت و وارلیقلاریندان خبری اولمایانلار بئله ، بو گونلر یوخسوللاشمیش و یورولموش آذربایجان آنانین قوجاغینا سیغینیرلار .

بو ایلین بایرام گونلری آذربایجانین باشقا شهر و كندلرینده اولدوغو كیمی بیزیم منطقه و كندیمیزده ده چئشیدلی اقلیم شرایطی وار ایدی . بایرامین بیرینجی گونوندن دوققوزونجو گونونه كیمی هاوانین گونشلی اولوب ملایم و جانا یاتان و طراوتلی اولماسی هر كسی حئیران ائدیر و موران منطقه سی نین یاشیل دونلو و مَخمَله اوخشار دره ، تپه و دوزنلیكلریندن بوتون وجودلاری ایله استفاده ائدنلر هركسین گؤزو اؤنونده ایدی.

 آمما منیم طبیعتدن بیر چوخلاریندان داها آرتیق استفاده ائتمه م بیر یانا ، دیلیمیز و وارلیغیمیز یولوندا چالیشان دوستلار عائله لری ایله اوزاق شهرلردن گلیب كندیمیزده و ائو ایچینده اوتوروب واخت كئچیرمك یئرینه گئدیب طبیعتین قوینوندا ،گئنیش فضادا و یاشیللیقدا ساعاتلار كئچیرمه ییمیز بو ایلین بایرام تعطیل لری نین دادینی نئچه برابر آرتیردی.

               دوستلارلا بیرلیكده موران دا " بولقار" (بالهاری) چایی قیراغیندا و گونئی - قوزئی آذربایجان سینیریندا

بو گوزل طبیعت دن استفاده ائتدیگیمیز دورومدا ، آذربایجانیمیزین ایناملی و ایمانلی انسانلاری و قیزیل آذربایجانیمیزین زنگان شهریندن اولان و مقاومت سیمگه سینه چئوریلمیش " سعید متین پور " ، ائلیمیزین آغ ساققالی و میلّی موسیقیمیزین تمثیلچیسی " حسن آذربایجان " ، اراده لری ایله بوتون مانع لره اوستون گلَن " بهبود قولی زاده ، دوكتور لطیف حسنی ، مهندس محمود فضلی ، یوروش مهر علی بگلی ، مهندس شهرام رادمهر " و 21 فئورال ( 2 اسفند ) 1392 تاریخینده "دونیا آنا دیلی " گونو مراسیمینده اشتراك ائتدیكلرینه گؤره ، آنا دیلی تدریسی نین شعارینی وئرَن ولی عملده هئچ بیر ایش گؤرمه ییب عكسینه عمل ائدن دوكتور روحانی دولتی نین مسئوللاری طرفیندن توتوقلانان آغ ساچلی مدنی چالیشقان اكبر آزاد و ائلیمیزین - میلّتیمیزین باشی نین اوجالیغینی اؤز و عائله لری نین راحاتلیغیندان اوستون توتان و ائله همان مراسیمده اشتراك ائدن: علیرضا فرشی ، رستم كاظم پور ، بهنام شیخی ، حمید منافی نادارلی ، محمود اوجاقلی  و باشقا میلّچی لریمیزین حبسده و عائله لریندن اوزاق قالماسی بیزی ده كدَرلندیردی .

آمما نه ائتمك ؟ هئچ بیر میلّت زحمت سیز - هزینه سیز اؤز حاقلارینا چاتماییب و بو هزینه نی وئرمَكده ، یالنیز قارنینا دوشونن و بوتون حقارتلره بویون اگیب و هویت سیز بیر كیمسه یه دؤنَن و منه نه ! دئینلرین ایشی دئییل ، یالنیز بیر میلّتین نه قَدَر یازیق اولدوغونو و اونون حقّی نین نه قَدر تاپدالاندیغینی و اكثریت اولوب اقلّیت حقّه  مالیك اولا بیلمه دیگینی دوشونن و بو آجی یا بی تفاوت قالمایان درین اینام - ایمانلی و سارسیلماز اراده لی انسانلارین  انسانی، میلّی و تاریخی وظیفه سی دیر ، طبیعی كی، بئله انسانلار گله جك نسیللرین یانیندا اوزو آغ و آلنی آچیق انسانلار اولاجاقلار !

هر حالدا یئنی ایلین 10 جو گونونون آخشام چاغیندان منطقه ده قار یاغماغا باشلاییب 11 جی گونونده منیم اؤلچومله و ماشینین اوستوندن توتدوغوم اؤلچو اساسیندا دوز 17 سانتیمتر قار یئر اوزونه اوتوروب و ایكی گون قاباقكی موران یاشیللیغینی تام آغ اؤرپك له اؤرتدو !

البته بیز بو قارلی گوندنده فایدالانماغی اونوتمادیق ،لاكین مئیوه آغاجلاری نین چیچك لری اوستونه قارلارین اوتورماسی و ایكی گون سونرا چیچك لرین سولماسی مئیوه باغلارینا نه قَدر ضرر وئرمه سینی ده دوشوندوك .

تاسفلر اولسون بو یاز گونلری باشلانان گوندن بو گونه كیمی ایشلریم چوخ دالی دوشوب و حتی اسفند آیی نین 26- سیندان بو گونه كیمی وئبلاگیمی دا تزه لمه میشدیم كی، ایندی بیر شئیلر یازدیم ؛ آرزو ائدیرم حبس ده اولان میلّتچی دوستلاریمیزین آزادلیغا بوراخیلماسی بو تئزلیكده باش توتسون و منیمده یازماغا حوصله م اولسون .