بو گونلر شفاء تاپماسینا دوعا ائتدیگیمیز

                           بؤیوك بیلگین ، آذربایجانیمیزین و تورك دونیاسی نین افتخاری         

                  پروفئسور دوكتور جواد هئیت 1383 و 1384 جو ایل نئجه وصیت ائتدی؟(1)

                                            حسن راشدی  23/تیر/ 1393

آچیقلاما : منیم ، اوستادیمیز دوكتور هئیت باره ده یازدیغیم اؤزَل یادداشتلاریم وار ، بو یادداشتلار وارلیق درگی سی نین دفتری كیمی ساییلان دوكتور هئیتین مطبّینده و دوكتور هئیت له اؤزل گؤروشلرده تاریخ و زامانی یادداشت اولاراق گؤتورولموشدور كی ، زامانی گلدیكده بو یادداشتلار سیرا ایله دیه رلی میلّتیمیزه سونولاجاقدیر ؛ ایندی بو یاددشتلارین ایلك بؤلومو بورادا تقدیم اولور  .

...................................................................

تیر آیی نین  اورتالاری 1383 جو هجری شمسی ایلی ایدی ، چوخ زامانلار اولدوغو كیمی بو گونده بؤیوك بیلگین دوكتور هئیتین وارلیق مجله سی نین دفتری كیمی اولان و فلسطین خیابانیندا یئرله شن مطبّینده ، دوكتورون یانیندا ایدیم .

بو گون ، چوخدان منیم ذهنیمی اؤزونه مشغول ائدن آمما اؤزومه جرئت وئریب دوكتوردن سوروشا بیلمه دیگیم  بیر سورغونو سوروشماق ایسته ییردیم!

او گون بیر مقدّمه دن سونرا و دوكتور هئیتین میلّتیمیزه نه قدر ارزشلی و دیه رلی اولدوغونو قید ائتدیگدن سونرا دوكتوردن سوروشدوم :

"آقای دوكتور آللاه سیزه 100 ایل عؤمور وئرسین ، لاكین بوتون اینسانلار نهایت دونیادان گئتمه لی دیر، آمما بؤیوك اینسانلار دونیادان گئتدیگدن سونرادا اونلارین جسمی نین هارادا دفن اولماسی اؤنم داشییر و میلّت ایچینده او مكان بیر معنوی مكانا چئوریلیر ، آیا سیز بو حاقدا بیر تصمیم توتوبسوزمو ؟ "

بؤیوك عالیم بیرآز فیكیره گئدیب دئدی :

" واللاه بو حاقدا بعضی واختلار فیكیرله شیرم ، آمما نه ایش گؤره جه ییم و هارادا دفن اولاجاغیم  باره ده تصمیم توتمامیشام . " من دئدیم :

 آقای دوكتور جسارت ائدیرم  منی باغیشلایین ، آمما سیز بوتون وجودونوزلا ایندیه كیمی آذربایجانا و میلّتیمیز یولوندا چالیشیب سینیز ،سیزین جسمینیزین آذربایجاندا تورپاغا تاپشیریلماسی میلّتیمیزه چوخ اؤنملی دیر ، آیا تبریزده تورپاغا تاپشیریلماغا فیكر ائدیب سینیزمی ؟

 دوكتور دئدی :

" بو یاخشی فیكیردیر آمما منیم عائله م عمومیتله ایندی تهراندا یاشاییرلار "

من دئدیم : آقای دوكتور سیز داها اؤز عائله و قوهوملارینیزین یوخ ، بیر میلّتین سینیز.

دوكتور دئدی : " بو حاقدا فیكیرلشمه لییم "

 

............................

حدودا ایكی آی سونرا :

وارلیق دفتری ( دوكتور هئیت مطّبی) ، چهار شنبه 11/ شهریور / 1383 ساعات : 6 حدودو آخشام اوستو  :

دوكتور هئیت یالنیز ایدی و منشی سی آقای اسكندری دن باشقا مطبّ ده بیر آدام یوخ ایدی ، داها دوكتور ح. جعفر زاده ده یوخ ایدی ، گئتمیشدی تبریزه ......

دوكتور هئیت مندن اكبر آزاد حاقدا سوروشدو  ؛ بیر ساعات یاریم قاباقدا منیم جیب تئلفونوما زنگ ائدیب اكبر آزادین توتوقلانماسی باره ده سوروشموشدو ، منده دئمیشدیم گله رم مطبّه و داها آرتیق بو مسئله نی ایضاح ائده رم .

من اكبر آزادین هله ایچه ریده اولدوغونو دوكتوره توضیح وئردیكده دئدی :

" كئچمیش زامان اولسایدی ،ایندی بیر تئلفونلا آزادی حبس دن چیخاراردیم "

بیر موضوع قاباغا گلدی بیردن منیم یئنه دوكتور هئیتین وصیت مسئله سی یادیما دوشدو ؛ سوروشدوم : آقای دوكتور خاطیرینیزده اولسا تقریبا ایكی آی قاباق وصیت باره ده بیر سورغو جنابینیزا وئرمیشدیم ؟!

دئدی :

" بلی،  آقای ری شهری بیزیم عائله وی مقبره میزی كی، ابن بابویه ده ( شهر ری ) دیر و آتام و فامیللریمیز اوردا دفن اولوبلار بیزدن آلیب و بیز داها امواتیمیزی اوردا دفن ائده بیلمیریك، من آقای اوجاق نژادا (حجت الاسلام ) دئدیم آقای ری شهری یه دئیین او مكانی بیزه وئرسین چونكو من دئمیشم منی آتامین آیاغی آلتیندا دفن ائله سینلر آمما او مكانی بیزه قایتارماسالار وصیّت ائده جه یم منی باكی دا دفن ائله سینلر ." سونرا آرتیردی :

" حیدر علی یف منه دئمیشدی وصیت ائت وفات ائتدیكدن سونرا سیزی باكی یا گتیریب فخری قبریستانلیغیندا دفن ائله یك ، ایندی ده من باكی یا گئدنده منه بو سؤزو دئییرلر، ابن بابویه مسئله سی حل اولماسا من ده بو ایشی گؤره جه یم ."

من دئدیم : آقای دوكتور تبریزده مثلا مقبرة الشعرادا دفن اولماغا فیكرینیز نئجه دیر ؟ و آرتیردیم ، اوستاد شهریارین تبریزده دفن اولماسی چوخ اهمیت داشیییر ایندی .

دوكتور دئدی : " آخی منی مقبرة الشعرادا دفن ائله مَزلر كی ......"

بو زامان ، تبریزدن بیر اوغلان و بیر قیز اؤیرنجیسی گلدی و سؤزلر یاریمچیلیق قالدی

...........................................

تقریبا بیر ایل سونرا :

چهار شنیه 9 / شهریور /  1384، مطبّ

آخشام اوستو مطبّ خلوت اولدوقدان سونرا كی، ساوالان (حسن مجید زاده ) ده اوردا ایدی و اوچوموز ( دوكتور هئیت ،حسن مجید زاده جنابلاری و من ) مختلیف مسئله لر بارده دانیشیردیق یئنه منیم دوكتور هئیتین وصیت موضوعسو یادیما دوشدو .

من بو گون ، ساوالان جنابلاری ایله بیرلیكده یئنه وصیت باره ده دوكتورله دانیشدیم .

 ساوالان دا ، رحمتلیك دوكتور جاویدین تبریزده نئجه دفن اولماسیندان دانیشدی ، علی تبریزی نین وادی رحمت ده نئجه دفن اولما موضوعسونو دیله گتیردی و نهایت دوكتور هئیت دئدی :

" منیم خانیمیم ایسته ییر منی اؤز عائله وی قبیرلرینده تهراندا دفن ائتسینلر لاكین من اونا راضی دئییلم " .

بیزده دئدیك، البته سیز راضی اولمازسینیز ، سونرا دوكتور هئیت آرتیردی :

" بیلمیرم باكی و یا تبریزده دفن اولماغیم نئجه اولاجاق ؟ " 

بو سؤزدن سونرا من دئدیم :

آقای دوكتور ، هم تبریز و هم باكی هر ایكیسی آذربایجان تورپاغی دیر ، آمما سیز

 وصیت ائدین اوّلجه تبریزده مثلا مقبرة الشعرادا و یا سیزه اویغون باشقا بیر یئرده دفن اولاسینیز ، لاكین سیزین تبریزده دفن اولماغینیزا مانع اولسالار وصیت ائدین باكی دا دفن ائتسینلر ؛ یعنی وصیت ائدین " منی تبریزده دفن ائدین اگر تبریز اولماسا باكی دا تورپاغا تاپشیرین " .

دوكتور دئدی :

"بو چوخ گؤزَل پیشنهاددیر ،ائله اوجور ائله رم ، چونكو باكی لیلاردا تبریزی چوخ سئویرلر و اونا باشقا بیر حیسّ ایله باخیرلار ، تبریز اولماسا باكی اولار ." سونرا ساوالاندا بو وصیته تأكید ائتدی .  

هر ایكیمیز دوكتور هئیتین آغزیندان چیخان بو سؤزلرین شاهیدی اولدوق او گون و  9 / شهریور / 1384  تاریخینده ، آخشام اوستو و دوكتور هئیتین مطبّینده .

ائشیتدیگیمیزه گؤره دوكتور هئیت بو وصیتی ائله بوردا دئدیگیمیز كیمی یازیب و لازیم اولان یئر و یا یئرلره ده تحویل وئریب دیر .

بیز ، اوره یی آذربایجان سئوگیسی ایله دائما چیرپینان پروفئسور دوكتور هئیتین شفاء تاپماسینا دوعا ائدركَن ، اونون ائتدیگی وصیتینی ان ساغلام زامانیندا بورادا گتیرمك ایسته دیك .

دوكتور هئیت باره ده منیم اؤزل و چوخلو یادداشت خاطیره لریم وار كی ، بو یادداشت خاطیرلری یئری گلَركن بؤلوم - بؤلوم و ائله بو وئبلاگدا و فیسبوك صحیفه مده سیزلرله پایلاشاجاغام .