اوتوز ایل داها عؤمروم اولسایدی بئله....! (5)

                                             دوكتور هئیت دن اؤزل خاطیره لر

                                                               حسن راشدی 25 / شهریور / 1393

سؤیله نیلَن تاریخ : 13 / اسفند/ 1383   

مكان : تهران ، علم و صنعت بیلیم یوردو ( اونیوئرسیته سی )  شهید بهرامی سالونو

بو مكاندا حاضیر  اولانلار : "علم و صنعت" و تهرانین باشقا بیلیم یوردلاریندا تحصیل آلان

 تورك اؤیرنجیلری و دعوت اولان ادیب لر

ایلك دفعه بنگلادش اؤلكه سی طرفیندن 17 نوامبر 1999 جو ایلده "دونیا آنادیلی گونو" نون آدلانماسی " یونسكو " تشكیلاتینا پیشنهاد اولدو و فورال آیی نین 21 ی بنگلادش اؤلكه سی نین  اؤنه ریسی و یونسكو تشكیلاتی قبولی و یونسكو عضوو اولان دونیانین 188 اؤلكه سی او جمله دن ایران بو پیشنهادا رای وئریب اونو تائید ائتدیلر و فورال آیی نین 21 ی ( اسفندین 2سی و بعضی ایللر 3و ) " دونیا آنا دیلی گونو " اعلان ائدیلدی.
بو اعلاندان سونرا ایلك دفعه 2000 جی میلادی ایل فرانسه اؤلكه سی نین باش شهری " پاریس " ده دونیانین مختلیف اؤلكه لری نین نماینده لری ، دیلچی بیلگینلری و یونسكو تشكیلاتی نین باش كاتیبی اشتراكی ایله " دونیا آنا دیلی گونو " مراسیمی كئچیریلدی .

 ایران چرچیوه سینده ده كئچن ایل (1382 جی هجری شمسی و 2004 میلادی ایل ) بو مراسیم  ایلك دفعه تبریزده و اوندان بیر آز سونرا تهراندا كئچیرلدی .

تبریز مراسیمی مهندس علیرضا صرافی و اونون یاخین دوست و امكداشلاری " دوكتور مبین " آدینا تالاردا و تهراندا " علم و صنعت بیلیم یوردو " تورك اؤیرنجیلری بو مراسیمی چوخ عظمتله كئچیرمیشدیلر .

بو ایل ( 1383 هجری شمسی و 2005 میلادی ) اسفند آیی نین 13 جو گونو یئنه بو مراسیم  " علم و صنعت بیلیم یوردو " تورك اؤیرنجی لری طرفیندن كئچیریلدی ؛ بو مراسیمه تورك اؤیرنجی لرین قاتیلماغی و باشقا قلم صاحیبی و ادیب لرین اشتراكی ایله یاناشی دوكتور جواد هئیت دن " اؤزل قوناق = مهمان ویژه " عنوانینندا دعوت اولموشدو .

دوكتور هئیت مراسیمین اولینده دانیشمیشدی ، من بیر آز گئج گلدیگیمدن و مراسیمین باشلانیشیندان اولمادیغیما گؤره دوكتور هئتین ایلك دانیشیغینی ائشیده بیلمه میشدیم .

مراسیمده بنی طُرف و باشقالاری آنادیلی گونو مناسیبتیله دانیشدیلار ؛ دوكتور هئیت مراسیمین سونونا قَدر قالا بیلمه دیگینه گؤره آیاغا دوروب گئتمك ایسته دی ؛ آیاغا دوروب گئتدیگی زامان اؤیرنجی لر و باشقا اشتراكچیلارلا دولو اولان تخمینا 800 الی 1000 مین نفرلیك سالونداكیلارین هامیسی دوكتور هئیتین احترامینا آیاغا دوردولار .

دوكتور هئیت درین تاثیر آلتیندا قالیب گؤزلری دولدو ، میكروفون ایسته دی ، اؤز حیسّ لرینی بیلدیرمك و  تشكّور ائتمك اوچون دئدی :

 من سیزدن چوخ تشكّور ائدیرم كی ، منی شرمنده ائدیرسینیز ، آمما بیر سؤز دئمك ایسته ییرم :

 " منیم مومكوندور داها بیر ایلدن چوخ عؤمروم اولماسین (بو زامان هامی دویغولاندی )  لاكین بوندان سونرا اگر اوتوز ایل داها عؤمروم اولسایدی بئله ، یئنه بو یولو گئدَردیم "

سونرا 10 دقیقه یه قدر نئجه بیزیم دیلیمیزین ، مدنیتیمیزین و هویتیمیزین دانیلیب تحقیر اولماسیندان دانیشیب سالونو ترك ائتدی .