حسن راشدی : 16 مهر 1393

آذربایجان وارلیغینی 35 ایل بوتون وارلیغی ایله قورویان اوستادیمیز دوكتور جواد هئیتین قیرخ مراسیمینه قاتیلماق اوچون بیر تعداد دوستلارلا شهریور آیی نین سون گونلرینده باكی شهرینه گئتدیك و بو بؤیوك اینسانین قیرخ مراسیمینده اشتراك ائتدیك .
مراسیمدن سونرا بیر نئچه گونده بو شهرده قالدیق و بعضی یئرلری او جمله دن شهیدلر خیابانی ، فخری خیابانی ، علملر آكادئمیاسینی و باشقا یئرلری ده گزدیك . من 17 ایل قاباق باكی یا گئتمیشدیم ، آذربایجانین بو گؤزل شهری یئر ایله گؤی آراسی فرقلنمیش و گؤزللنمیشدیر.

آكادئمیادا علم آداملاری ایله گؤروشمك منه چوخ گؤزل آنلاری یاشاتدی .

آذربایجانین دیلی ، ادبیاتی،  تاریخی،  فولكلورو و تانینمیش شخصیتلری بو مركزده آراشدیریلیر و اؤیرنجی لره اؤیره دیلیر ؛ بورادا هر شئی دوغمادیر ، تاریخ- ادبیاتدان توتدو آدلیم شخصیتلره قدر .

باكی دوغما شهر دیر ، سن اؤزونو بورادا اؤزگه و یابانجی گؤرمورسن ، شهر تابلولاریندان توتدو مكتب كیتابلارینا قدر سنله دوغما دیلده دانیشیرلار ؛ سن سئودیگین " آذربایجان " آدی بورادا ان مقدس آدلارداندیر.

بورادا تبریز آدی ان صمیمی و گؤزل آدلارداندیر ، سنین گونئی آذربایجاندان گلدیگینی  بیلدیكده " تبریزدن گلمیسینیزمی ؟ " دئییرلر .

شهریاری و دوكتور هئیتی كیچیك دن توتدو بؤیوگه قدر هر كس تانییر و اونا حؤرمت گؤزو ایله باخیرلار.

 اوزانلارا - عاشیقلارا و اونلارین سازلارینا و سؤزلرینه حؤرمت ائدیلیر ؛ آذربایجان نهضتی دؤرونون شاعیری سهراب طاهرین درین حؤرمتی وار بورادا ، بو 89 یاشلی شاعیر اؤزو جانلی تاریخدیر !

  بیز گونئی آذربایجانلیلارین چوخو ، مزارینی نین بئله هاردا اولدوغونو  تانیمادیغیمیز شاه اسماعیله بؤیوك سركرده ، شاه و شاعیریمیز دئییب  شعرلرینی ازبردن اوخویورلار و اوستاد شهریارین سؤیله دیگی  توركجه شعرلری اؤزللیكله " حیدربابایا سلام " شعری دیللر ازبری دیر .

http://www.qafqaznews.az/09/25/hesen-rasidi-amea-merkezi-elmi-kitabxananin-qonagi-olmusdur-foto/

بورادا سنین سئودیكلرینی سئویرلر و سنین نیفرت ائتدیكلریندن نیفرت ائدیرلر.

بورادا ارمنستان ، اشغالچی دولت دیر و اونو سئون یوخدور و قاراباغ دردی بوتون اینسانلارین دردی دیر.

بورادا اورمو گؤلونون قورماسینا اوره كلر آجییر و گونئی آذربایجانین گله جه یی نئجه اولاجاغینا تاسف لنیرلر.

بورادا بیزیم دردلریمیز اونلاریندا دردی دیر !

بورادا هر شئی دوغمادیر ، یالنیز آز بیر عده نی ، یعنی هله ده روس بویندوروغونا فخر ائدیب اوشاقلاری ایله روسجا یارمالایانلاری سیرادان چیخارساق !