+0 بَگَن (Bəyən)
" ساناز " توركجه نی نئجه اؤیرَندی ؟ (۶)
دوكتور هئیت دن اؤزل خاطیره لر
حسن راشدی ۲۹ / مهر / 1393
سؤیله نیلَن تاریخ :۳۰/ شهریور/ 1383
مكان : تهران ، دوكتور هئیت مطّبی ( وارلیق دفتری ) ساعات : ۱۷:۳۰ الی ۱۹
بو مكاندا حاضیر اولانلار : حسن راشدی ، مسعود فیوضات، علی آردم ( اردبیللی موسیقیچی )
دوكتور هئیت تئلفون آرخاسیندا توركیه توركجه سینده دانیشیردی ، دانیشیغی قورتاراندان سونرا دئدی :
" بو دانیشدیغیم ، منیم سون بئشیگیم " ساناز " قیزیم ایدی . "
سونرا آرتیردی ، سانازین آناسی فارس اولدوقدان اوشاقلیقدان سانازلا فارسجا دانیشیردیم ، بورادا (تهراندا ) بیر آدام تاپا بیلمیردیم كی ، فارسجا بیلمه سین و سانازا توركجه نی اؤیرَتسین .
بیر دفعه توركیه یه بیر كونفرانسا گئتمیشدیم سانازیدا اؤزومله آپارمیشدیم ؛ كونفرانسین تنفس اثناسیندا ساناز منله فارسجا دانیشیردی .
كونفرانس بؤیوكلریندن اولان دوكتور " سرت كایا " بیزیم فارسجا دانیشیقلاریمیزی گؤردوكده سانازا خطاب ( اصلینده منه ) دئدی :
" اولاماز بیزیم بویوكلریمیزین چوجوكلاری پاپاز ( كشیش ) اولسون ! "
یعنی بیزیم بؤیوكلرین اوشاقلاری مسلمانلیقدان دؤنوب كشیش اولا بیلمَزلر و بو بیزه یاراشماز .
اصلینده سرت كایا بو سؤزو سانازا یوخ ، منه دئییردی .
بو سؤز منه چوخ تاثیر ائتدی و اونو حاقلی گؤردوم ؛ او ایل سانازی آپاریب توركیه ده " تؤمَر " ه قویدوم توركجه نی اؤیرنمه یه و بیر پانسیونا تاپشیردیم .
او زامان سانازین ۱۲ - ۱۳ یاشی وار ایدی ، بیز بیر - بیریمیزدن آیریلاندا چوخ چتینلیك چكدیك و آغلادیق ؛ آمما ساناز توركجه نی اؤیرَندی و ایندی بیز بیر- بیریمیزله توركجه دانیشیریق . من گؤردوم بو ایشی گؤرمه سم ساناز باشقا باجیلاری ایله یاخشی ارتباط قورا بیلمه یه جك ، چونكو منیم او بیریسی قیزلاریم توركیه لی خانیمیمداندیلار و توركجه دانیشیرلار .
بو ایش اولدو و ایندی من سانازلا توركجه دانیشیرام .