بیرلیگینیزی  قورویون  (۹)

                                               دوکتور هئیت‌دن اؤزل خاطیره‌لر  

                                                     حسن راشدی :۱۸ دی ۱۳۹۳ 

 سؤیله‌نیلن تاریخ : ۱۹آبان ۱۳۸۰

مکان : دوکتور هئیت مطبّی ( وارلیق دفتری )

زامان : شنبه گونو  آخشام اوستو

بو مکاندا حاصیر اولانلار : رحمتلیک میر هدایت حصاری ، حسن راشدی ، اکبر آزاد ، حسین محمدخانی (گونئیلی) ، دوکنور حسن جعفرزاده ، آغشین آغکمرلی، حسین تهماسب پور ( شهرک- میرزا) ، عبدالعلی مجازی، مسعود فیوضات ، آیدین صادقی،اکبر منظوری ، سلطانی ، محمدپور

 شنبه گونو " درنَکلر درنَگی ^{" (۱)} موضوعسو اوزه‌رینده دوکتور هئتین مطبینده ( وارلیق دفترینده) جلسه واریدی ؛ بو ساحه‌ده مختلیف بحثلر اولدو ، بو بحثلر آراسیندا دوکتور هئیت دئدی :

" من حضرت محمدین مریدلریندنم ، بو بؤیوک اینسانی پیغمبرلیکدن علاوه بؤیوک بیر فیلسوف و شخصیت بیلیرم ؛ بورادا حزب اللهی - زاد یوخدورکی، من اؤزومو بئله گؤسترم هله‌ده کی،​کراواتیمی تاخیرام !

آمما حضرت محمد ایلک شخصیتلردن ایدی کی، اؤز عقیده‌سی اوزه‌رینده اُمتینی تشکیل ائتدی و بو یولدا چوخلو زحمتلر چکدی ؛ دونیانی ترک ائدن زاماندا یاخین آداملارینی اطرافینا ییغیب دئدی :

"من دونیانی ترک ائدیرم آمما مندن سونرا سیز بیرلیگینیزی قورویون" ؛ چون او بیلیردی اوندان سونرا نه اختلافلار مومکوندور اوز وئرسین.

دوکتور هئیت سونرا آرتیردی :  

من اؤزومو او بؤیوک شخصیتله مقایسه ائتمک ایسته‌میرم ،من حتی محمد امین رسولزاده کیمی‌ده اولا بیلمه‌رم آمما بؤیوک شخصیت‌لرین یاشاییش و سفارشلری بیزه سرمشق اولمالی‌دیر. بیر نفر تورک و آذربایجانلی بیزیم هدفلریمیز یولوندا حرکت ائدیرسه من اونونلا بیر یولدا حرکت ائده بیلمه‌سمده اونون علیهینه چالیشمارام . مثلا من " د . ص " ^(۲) ایله بیر یئرده ایشله‌یه بیلمه‌رم آمما هئچ زامان اونون علیهینه یازمارام .  یا من وارلیق مجله‌سینده شمالی آذربایجانین شاعیر ویازیچیلاریندان آد چکیب اونلارین اثریندن " وارلیق"دا چاپ ائدیردیم  رحمتلیک ( ع . ت ) ^(۲) دئمیشدی داها " وارلیق" مجله‌سی میندار اولوب ، آمما من هئچ زامان اونا جاواب یازمادیم .

ایندی بیزیم گوجوموز بیرلیگیمیزده‌دیر، مین نفر دوست آز و بیر نفر دوشمن چوخدور .

آرامیزدا اختلافلارین اولماسینی دوشمنه بیلدیرمه‌مه‌لییک ؛ بیزده بیر تشکیلات یاراناندا دوشمن اوندان چوخ حساب آپاریر ، بیرلیگیمیزی هر زامان قورومالییق .

دوکتور هئیت بو سؤزلری‌نین آردیندان بیر خاطیره‌سیندن مثال گتیردی :

"شاه زامانیندا و من دانشجو اولان زامان " شاه آباد " ( ایندیکی جمهوری) خیابانیندا " انجمن آذربایجان" آدیندا بیر تشکیلات فعالیت ائدیردی دیلی ده تورکو ایدی . من و آتامدا بو انجمنین عضوو ایدیک ؛ مستشارالدوله ( صادق صادقی ) و دوکتور آشتیانی کیمی آداملاردا بورا گلیردیلر ، بیر گون دوکتور آشتیانی منه یاخینلاشیب دئدی : " سیز سئچگی‌لرده بیزه کؤمک ائدین " . من او زامان چوخ فخر ائله‌دیم  اونلار بو انجمنده بو قدر گوج گؤروردولر و من بیر گنج دانشجو اولدوغوم حالدا مندن بو تقاضانی ائدیردیلر."

ایندی بیزده بیر تشکیلات اولاندا باشقالاری بیزیم گوجوموزون نه قدر بؤیوک اولدوغونو گؤرورلر!

...........................................................................................................

^{(۱) "درنکلر درنگی " ۱۳۸۰ جی ایلده تهران و اطراف شهر و شهرجیک‌لرده  تورک دیلی ومدنیتی  یولوندا چالیشان درنکلرین نماینده لریندن تهراندا تشکیل تاپان بیر قوروم ایدی .}

^{(۲) بو آدلار منیم یانیمدا محفوظدور}