حسن راشدی

 یازیلان تاریخ : دی آیی ۱۳۷۹

بو جمله‌، کئچمیش فرهنگ و ارشاد اسلامی وزیری و بو گوٍنکو میلّتلر آراسی تمدّن‌لر دانیشیغی‌نین رئیسی دوٍکتور مهاجرانی آغزیندان سؤیله‌نیلمیشدیر.

توٍرکجه یازدیغیمیز بو جُمله، فارسجا «انسانها را نمی توان تابع یک فرهنگ کرد» دوشنبه گوٍنو دوٍکتور مهاجرانی طرَفیندن اوسترالیا‌نین فرهنگ و قوْمیت‌لر وزیرینه خطاباً دئییلمیش و چهارشنبه گوٍنو 21/‌دی/79 تاریخینده مطبوعاتدا چاپ اوْلموشدور.

دوٍکتور مهاجرانی اوسترالیا‌نین فرهنگ و قوْمیت‌لر وزیری ایله گؤروشَنده، اوسترالیادا مهاجر حالیندا یاشایان ایرانلیلارین فرهنگ و مدنیّت‌لری‌نین قوْرنماسینا قایغی گؤسترمیش و اوْنلارین فرهنگی هویّتلری‌نین قوْرونوب گوٍجلنمه‌سی‌اوٍچون اوسترالیا دؤلتی ایله تام امکداشلیق ائتمه‌یه حاضرلیغینی بیلدیرمیشدیر.

عطااله مهاجرانی بو گؤروشده آرتیرمیشدیر: « مهاجر حالیندا یاشایان انسانلار اؤز شخصیّت، فرهنگ و تمدّنلرینی قوْرومالیدیرلار و انسانلاری بیر فرهنگه تابع ائتمک اولماز» مهاجرانی‌نین بو سؤزلری گؤستریر کی، ایندیه قَدَر طوُمارلار امضالاییب، جمهور رئیسه گؤنده‌ریب مُـختلـف یازی و مقاله‌لرده اؤز‌ دیل، فرهنگ و هویّتلرینی قوْرویوب باشقا بیر فرهنگه تابع اوْلماماق اوٍچون اؤلکه‌نین اساس قانونون 15 و 19- جو ماده‌سی‌نین اجراسینا متوسل اوْلان اوْتوز میلیون توٍرک ‌دیللی انسانلارین ‌آیدین و ضیالیلاری‌نین ایستَک‌لری نه قدر لازم‌ و ضروری ایمیش!

آما نه‌دنسه بو اوْتوز میلیون انسانلارین ایستَک‌لرینه نه تمدّنلر دانیشیغی‌نین بانی‌سی خاتمی جنابلاری و نه اوْنون اوٍچ ایل یاریم فرهنگ و ارشاد وزیری اوْلان و بوگوٍنلر تمدّنلر دانیشیغی‌نین رئیسی، مهاجرانی جنابلاری بیر گؤز اوُجو ایله‌‌ده بئله باخمامیشلار!

لاکین بو گوٍن همان مسئوللار اوسترالیا اؤلکه‌سینده یاشایان بیر نئچه مین و یا حتی نئچه یوز مین ایرانلی‌نین (سیز اوخویون فارسین) فرهنگ و مدنیّت‌لری‌نین قوْرونوب و حتّا گوٍجلنمه‌سینه بو قدَر ماراق گؤستریر و اوسترالیا دؤلتی ایله هر جوُر امکداشلیق ائتمه‌یه حاضر لیقلارینی بیلدیریرلر!

عطااله مهاجرانی‌نین بو سؤز‌لریندن اوٍچ گوٍن قاباق، جمهور رئیس سید محمد خاتمی، «فارس‌دیلی، ایرانلیلارین وحدت‌دیلی‌دیر» جمله‌‌سینی سؤیله‌میشدیر. بئله بیر جمله‌ پهلوی حاکمیّتی رؤیالاری ایله یاشایان پان ایرانیست‌لر و شوْونیست‌لره یاشیل چیراق اوْلاراق اکثریت اوْلوب اقلیت حقوقونا مالیک اوْلا بیلمه‌ین ایران توٍرک‌لرینی سئویندیرمه‌میش و فارس‌دیللی اوْلمایان باشقا ایرانلیلارا دا بیر هدیه گتیرمه‌میشدیر.

ایران اؤلکه‌سی کثیرالمله بیر اؤلکه‌دیر، بو اؤلکه‌ده چئشیتلی‌دیللر میلّتلرآراسیندا دانیشیلیر. اؤلکه‌نین بوٍتون امکانلاری فارس‌دیلی‌نین اختیاریندا قوْیولسادا باشقا‌ دیللرده دانیشانلار اؤزللیکله ایراندا نفوسلاری فارسلاردان چوْخ اوْلوب 150 مین نفر ارمنی قدَری اؤز‌ دیل‌لرینده تحصیل آلا بیلمه‌ین توٍرک‌لر، ‌دیللرینی فارس‌دیلیندن آشاغا گؤرمور و فارسلار قدَری اؤز ‌دیل‌لرینده اؤلکه امکانلاریندان فایدالانماغا و ابتدایی‌دن توُتدو دانشگاهین سونونا قدَر تحصیل آلماغا حق‌لی‌ گؤرورلر، بو میلّتلر اؤزلرینی فارس لاردان داها اسکی یئرلی و‌ دیللرینی فارس ‌دیلیندن داها سابقه‌لی، دوْلغون و قانونلو گؤرولر.

فارس‌دیلی، وطنلری بیر اوْلوب‌ دیللری فرقلی اوْلان ایران میلّتلری آراسیندا ارتباط ‌دیلی اوْلا بیلر آنجاق هئچ زمان وحدت‌دیلی اوْلا بیلمز. چوْخ میلّتلی و چوْخ ‌دیللی بیر اؤلکه‌ده وحدت یاراتماق اوٍچون اوٍرکلره حاکیم اوْلان بیر عامیله احتیاج وار؛ بیر ‌دیله بوٍتون امتیازلاری وئریب باشقا‌ دیللری وطن امکانلاریندان محروم ساخلاییب ‌سیخینتیدا قوْیوب آلچاق توتماقلا وحدت یاراتماق اولماز !

بیر عایله‌ده، بیر اؤولادین تربیه و تحصیلی اوٍچون بوٍتون عایله امکانلارینی اوْنون اختیاریندا قویوب، اوْنا محبّت ائدیب عالی تحصیل قازاندیرماق اوٍچون دائما اوْنون فیکرینده اوْلوب باشقا اؤولادلارین تربیه و تحصیلینه ابتدایی حددینده‌ده توجه ائتمه‌ین عایله ایچینده، صمیمت و بیرلیک یاراتماق مُومکون دئییل.

یالنیز ایران نفوسونون 35 – 40 % حیصّه‌سی‌نین آنا‌دیلی اوْلان فارس‌دیلی یوْخ، بو اؤلکه جمعیّتی‌نین 98% اینامینی تشکیل ائدَ‌ن اسلام‌ دینی ایرانلیلار آراسیندا محکم و معنوی بیر وحدت عاملی‌دیر؛ نئجه کی، آیت اله خامنه ای 19/4/79 تاریخینده اؤلکه‌نین مسئول مقاملاری ایله گؤروشونده دئمیشدیر: « عامل وحدت ملت ایران زبان فارسی نیست،‌ دین اسلام است، همان‌دینی که در انقلاب و نظام اسلامی تجسم پیدا کرد... » ( ایران میلّتی نین وحدت عاملی فارس دیلی یوْخ ، اسلام دینی دیر ،‌ همان‌دین کی، انقلابدا و اسلام نظامیندا اؤزونو گؤستَرمیشدیر...)[1]