+0 بَگَن (Bəyən)
دوکتور زهتابی نین یازدیغی تاریخ ،
بیزیم یازدیقلارمیزی سوپوروب آپاردی (11)
دوکتور هئیت‌دن اؤزل خاطیره‌لر
حسن راشدی : اول خرداد ۱۳۹۴
سؤیله‌نیلن تاریخ : ۴ اسفند ۱۳۷۹ پنجشنبه
مکان : " جان آذربایجان " دفتری ، " قومیت لر " جلسه‌سی ، جمالزاده خیابانی ، تهران
زامان : آخشام اوستو
جلسه ده اولانلار : حسن راشدی ، اکبر آزاد ، احمد حکیمی پور ، کمال مرادی ، دوکتور حسن جعفرزاده، ابراهیم رفرف ، عزیزی بنی طُرُف ، منصور مشرف (عرب لردن )
جلسه‌ده همیشه کی کیمی بحث لر آنایاسانین ( اساس قانونون) 15 و 19 جو ماده‌سی‌نین اجراسی باره‌ده گئدیردی . بئله بیر دورومدا سؤز غیر فارس دیللرین نئجه تدریس اولماسی و تاریخ کیتابلاری متنی‌نین دگیشدیریلمه‌سیندن و دوکتور زهتابی‌دن گئتدی .
آقای بنی طرف دئدی : بیر نفر عراقدان گلمیشدی دئییردی ، پروفئسور زهتابی بغداددا منیم اوستادیم اولوب ؛ او اورادا تورکجه درس دئییردی .
دوکتور هئیت دئدی : پروفئسور زهتابی ائلچی بگین و عیسی قنبرین ده باکی‌دا اوستادی اولوب . ائلچی بگ رئیس جمهور اولاندا منه دئدی : دوکتور زهتابی‌یه منیم صمیمی سلامیمی یئتیرین و دئیین اونون یئری بیزیم باشیمیز اوستونده‌دیر . آنجاق حئییف کی ، ائلچی بگین عؤمرو آز اولدو .
سونرا دوکتور هئیت آرتیردی :
من تاریخ یازمیشام دیلیمیزین تاریخینی ، رحیم رئیس‌نیا گؤزل تاریخ یازیب آذربایجان تاریخی ؛آمما دوکتور زهتابی‌نین یازدیغی ایکی جیلدلیک " ایران تورک‌لری‌نین اسکی تاریخی " کیتابی بیزیم یازدیقلارمیزی سوپوروب آپاردی!
سونرا جلسه نین بحث‌لری رئیس جمهور خاتمی یه مکتوب یازیب 15 و 19 جو ماده‌نین اجراسینی ایسته‌مکله داوام ائتدی . آرادا یئنه رسمی جلسه‌دن قیراق دیلدن و تاریخدن صحبتلر اولدو ، دوکتور هئیت دئدی :
هامی‌دان چوخ تورکلر فارس دیلینه خیدمت ائدیب ، مثلا تورک دؤلتی اولان غزنویلر فارس دیلینی رسمی دیل مقامینا چاتدیریب و بؤیوک خیدمت‌لری اولوب بو دیله ، آمما ایندی بیز تورکلر بو گونه دوشموشوک و دیلیمیزده ابتدایی حددینده‌ده درس اوخوماغا حقّیمیز یوخدور .
من دئدیم آقای دوکتور ، ائله اونا گؤره غزنویلر بؤیوک خیانته مرتکیب اولوبلار !
دوکتور هئیت دئدی :
شاه زامانیندا بیر انجمن واریدی " انجمن قلم " آدیندا، دوکتور همایون‌فر منی اورا دعوت ائتمیشدی ، بیر گون جلسه‌لرین بیرینده فارسلاردان دوروب تریبون آرخاسیندا دانیشماغا باشلارکن دئدی :
" بوگون دوکتور هئیت‌ده بوراددیر و بیلیرم تورک دیلینی سئویر؛ آمما تورک حکومتی اولان غزنویلر فارس دیلینه بؤیوک خیانت ائدیب لر ...! " و غزنوی‌لردن پیسله‌مه یه باشلادی .
من‌ده [دوکتور هئیت] آیاغا قالخیب او آداما دئدیم :
سیز دئدیگینیز بو سؤز دوزدور ، و غزنویلر تاریخده بؤیوک خیانته مرتکیب اولوبلار چونکو اونلار اؤز تورک دیل‌لری یئرینه فارس دیلینی رسمی دربار دیلی ائله‌ییبلر ، یوخسا اونلار او خیانتی ائتمه‌سئیدیلر ایندی بیزیم دیل بوگونه قالمازدی !