" خاطرات من و پدرم " (من له آتامین خاطره لری)

کیتابی نین تقدیمات ( رونمایی ) مراسیمی تهراندا کئچیریلدی

دوز گونو اوریبهشت آیی نین 11ی 1396 تاریخینده تهرانین شرقینده یئرله‌شن " اشراق مدنیت ائوی"ینده (فزهنگسرای اشراق)  آذربایجانین ان آدلیم طبیب و ادیب شخصیّتی اولان رحمتلیک پروفئسور دوکتور جواد هئیت‌ین یئنی‌جه چاپدان چیخمیش " خاطرات من و پدرم " کیتابی نین تقدیمات = تانیتیم (رونمایی)  مراسیمی ، او مرحومون یاخین دوستلاری و " وارلیق" مجله سی ایله اوزون ایللر بویو امکداشلیق  ائدن تجربه‌لی ادیب، شاعیر، یازیچی و محقق لرین اشتراکی و اونلارین رحمتلیک دوکتور هئیت‌له یاشادیقلاری گونلر و ایللرین خاطره‌لریندن سؤیله‌دیکلری چئشیتلی موضوعلارلا  ساعات 17:30 - 19:30 قدر کئچیریلدی.

مراسیم ، کیتابین ویراستارلیغینی اوتوز ایللیک دوستو و تانینمیش میلّی - مدنی فعال و ادیبی اکبر آزادلا بیرلیکده عهده‌سینه آلان و کیتابا اؤن سؤز یازان و دوکتور هئیت‌ین یاخینلاریندان اولان تدقیقاچی حسن راشدی‌نین قوناقلارا خوش گلدینی‌ و دوکتور هئیت‌ و " خاطرات " کیتابی حاقدا وئردیگی اؤنملی بیلگی‌لری ایله ساعات 17:30 دا باشلاندی.

سونرا دیلیمیز و ادبیاتیمیز ساحه سینده چوخ دَیه‌رلی و چوخلو کیتابلار مؤلیفی اولان آدلیم محقق دوکتور حسین محمدزاده صدیق ( دوزگون) و اوندان سونرا دوکتور هئیت‌ین یاخین دوستو و ایللر بویو " وارلیق " مجله سی ایله امداشلیق ائدن ایکی تانینمیش و مهارتلی شاعیر و ادیب کریم مشروطه چی ( سؤنمز) و حسن مجیدزاده ( ساوالان ) جنابلاری تریبون آرخاسینا کئچیب " خاطرات من و پدرم " کیتابی حاقدا و دوکتور هئیت باره‌ده اؤز شیرین خاطره‌لرینی سؤیله دیلر .

مراسیمن داوامیندا ، " خاطرات من و پدرم " کیتابی‌نین ویراستارلیغیندا اؤنملی رولو اولان و کیتابا " سون سؤز " یازان ،عین حالدا وارلیق مجله سی ایله امکداشلیق ائدن سایین اکبر آزاد و اوندان سونرا ایسه کئچمیشده " دیلماج " مجله سی‌نین امتیاز صاحیبی و مسئول مدیری و " وارلیق " مجله‌سی‌نین امکداشی مهندس علیرضا صرافی و تورکجه فارسجا چئشیتلی و اؤنملی کیتابلار یازاری اولان دوکتور مرتضی مجدفر ، هم " وارلیق " مجله‌سی و هم دوکتور هئیت‌ین چوخ درین باخیشلی و اوزاق گؤرن بیر سیاستچی اولاراق بیلگیلی و صداقتلی ادیب و مهارتلی و اینسان سئور بیر جراح اولدوغو باره‌ده سالونداکیلارا معلومات وئردیلر .

مراسیم ، موسیقی شنلیگی و قوجامان ادیب‌لردن توتدو آذربایجانیمیزین گله‌جه‌یینه فیکیرله‌شن آختاریجی و گنج اؤیرنجی قیز و اوغلالانلاریمیزین اشتراکی و " خاطرات من و پدرم " کیتابی‌نین ساتیشی ایله ساعات 19:30 دا سونا چاتدی.  

                   سون آیلاردا چاپدان چیخان رحمتلیک  دوکتور جواد هئیت ین      

                                     "خاطرات من و پدرم "

                                                   و حسن راشدی نین

                                   " دیلیمیز، وارلیغیمیز "

کیتابینی بو یئرلردن آلا بیلرسینیز:

تهراندا : " انتشارات اندیشه نو " خیابان انقلاب ، روبروی دانشگاه تهران ، پاساژ فروزنده ، زیر همکف ، تئلفون : 66953959 ، تبریزده : 1- " نشر آیدین ساو " خیابان شهید جدیری ، بالاتر از تقاطع پاستور جدید تئلفون : 33364201 ، موبایل : 09143059715  ،    2 - " کتابفروشی بیتیک " خیابان 17 شهریور جدید ، پاساژ اطلس ، زیرزمین ، موبایل : 09141051698 ،   3- " انتشارات انور" (کتابفروشی کیرپی ) میدان شهید بهشتی ( منصور سابق ) پاساژ اطلس زیرزمین ، موبایل: 09148605480 ،    اردبیل ده : 1-  "آذربایجان کیتاب ائوی" محله علی آباد ، دمیرچیلر بازاری آغزی ( سر بازار آهن فروشان ) تئلفون : 33617203 ،    2 -  " منصور کیتاب ائوی" شیخ صفی ، خیابان اسماعیل بیگ تئلفون : 33243803 ، موبایل : 09386755173،   زنجان دا : " کتابفروشی حکیم هیدجی" چهار راه انقلاب، کوچه باشگاه، پاساژ کسری ، طبقه اول  پلاک 43 ، تئلفون : 33323885