+0 بَگَن (Bəyən)
خُرداد قیامی اوْنودولاجاق‌می؟
حسن راشدی
1385 – جی ایل اوردیبهشت آیی‌نین 22- سی دولت اوْرگانی اوْلان " ایران " گونده‌لیگی، تَمل و بینوره‌سی پهلوی حاکیمیتی دؤنمیندن قوْیولان راسیسم و پان فارسیسم تفکّورونه دایاناراق، ایران آدلی اؤلکه‌ده و تقریبا اوْنون یاری نفوسونو و ان آزی %40 تشکیل ائدَ‌ن تورکلرین حریمینه جسارت ائدیب بو گونده‌لیگین اؤزل سایی‌سیندا و اوُشاقلارا آیریلمیش صحیفه‌سینده کاریکاتورلو بیر حکایه‌ده حیاسیزجاسینا تورکلری " سوُسک " ( سوُسه‌ری بؤجَگی ) آدلاندیراراق اوْنلارین کوتله‌وی محو ائتمه یوْللارینی اوُشاقلارا اؤیرَتمه‌یه چالیشمیشدیر!
لاکین بو اهانت و توهین جاواب‌سیز قالماییب آیاغینی جیزیغیندان قیراغا اوُزادان "ایران " گونده‌لیگی علیهینه اعتراض قیامی آذربایجانین گؤز ببه‌گی اوْلان و تاریخ بوْیو قیاملار و رشادتلر مرکزی ساییلان تبریزدن و تبریزین بیلیم یوُردوندا تحصیل آلان و آذربایجانیمیزین آییق وجدانلاری و دوشونن بئینلری ساییلان اؤیرنجیلری طرفیندن باشلاندی.
" ایران " گونده‌لیگی مسئوللاری، بو اعتراضلارا اعتناسیز قالاراق، تاریخ بوْیو هئچ بیر توْهین و ذلالته بوْیون اگمه‌ییب حتّا جانلاریندان کئچَن و ۷۰ میلیون نفوسو اوْلان ایران آدلی اؤلکه‌نین ۳۰ میلیونوندان چوْخونو ( 1385 جی ایلین نفوس ساییمی ) تشکیل ائدَ‌ن تورکلردن، بئله بیر عذرده دیله‌مه‌دی!
طبیعی‌دیر کی، بو اعتناسیزلیق ائله اوْ توهین قَدَر بلکه‌ده اوْندان چوْخ، آذربایجان میلّتینه اهانت‌ایدی. بو اعتناسیزلیغین آردیندان تبریز، اوُرمو،زنجان، اردبیل، تهران و باشقا شهرلرین بیلیم یوُردوندا تحصیل آلان تورک اؤیرنجیلری "ایران " گونده‌لیگی‌نین بو جسارت و حیاسیزلیغینی محکوم ائده‌رَک اوردیبهشت آیی‌نین 25، 26 و ۲۷- جی گونلر ی بو شهرلرین بیلیم یوُردلاری ایچینده اعتراض نمایشی کئچیردیلر و دؤلت اوْرگانی اوْلان " ایران " گونده‌لیگی‌نین نژادپرستانه و راسیستی سیاستینی قینادیلار.
آمما بو اعتراضلاردا ،" ایران " گونده‌لیگی مسئوللارینا هئچ بیر تاثیر بوُراخمادی و اوْنلار اوْ هفته‌نین سوْنو و اوردیبهشت آیی‌نین ۲۹ – جو گونو و یئنه همان اؤزل صحیفه‌ده بو اعتراضلارا اعتنا ائتمه‌دن تورکلره ائتدیکلری توهینی اهمیت‌سیز ساندیلار!
دئمه‌لی " ایران " گونده‌لیگی مسئوللاری بلکه هدفلی بیر پلان اوزه‌رینده بو کاریکاتورلو توْهینی ایره‌لی سورمکده اوْلدوقلاریندان حتّا بو صحیفه‌نین یازانی " مانا نیستانی "نین دیلیندن بئله، یانلیش بیر یازی‌نین یازیلدیغینی دیله گتیرمه‌ییب بو یازی‌دان غیر مستقیم اوْلاراق مدافعه ائتدیلر!
طبیعی‌دیر آذربایجان میلّتینه بئله بیر حؤرمت‌سیزلیک باغیشلانیلماز و واز کئچیلمَز ایدی؛ تاریخ بویو دونیا ایمپراتورلاری و تزارلاری قارشیسیندا داغ کیمی دایانان تورکلر و هئچ بیر جسارت و اهانته دؤزمه‌ین آذربایجان میلّتی بو قدر آچیق وآیدن بیر نشریه‌‌نین تحقیر و توْهینینه دؤزه بیلمَزدی!
بو اساسدا گوجلو، لاکین مدنی بیر اعتراض نمایشی ایلک اؤنجه سوت گونو ( یکشنبه ) خُردادین بیرینجی گونو (۸۵- جی هجری گونش ایلی ) تبریز اهالیسی و قاباقدا و اؤن سیرادا اؤیرینجی‌لر و میلّی بوْلدا چالیشانلار اولماقلا تبریز خیابانلاریندا باشلاندی؛ بو اعتراضین گور سسی یالنیز تبریز، آذربایجان و ایراندا یوْخ، بلکه دونیانین هر یئرینده ائشیدیلدی!
تبریز اهالیسینه آرخا دوُروب " ایران " گونده‌لیگی‌نین راسیستی سیاستینه اعتراض اوْلاراق، اوُرمو، زنجان، اردبیل، سوُلدوز، قوْشاچای، خیاو (مشکین‌شهر )، موُغان ( پارساآباد و گئرمی )، مرند، میانا، ماراغا، خوْی، سالماس، ماکی و آذربایجانین باشقا شهرلری و حتّا تهراندا یاشایان تورکلر آردی – آردیندان بو اعتراضا قوْشولدولار.
بئله بیر دوُرومدا ایدی کی، اؤلکه مسئوللاری‌دا بو اعتراض سَسلرینی ائشیدیب " ایران " گونده‌لیگی‌نین نشرینی دایاندیریب اوْنون مسئول مدیری و توْهینلی کاریکاتورلو حکایه‌سینی یازان " مانا نیستانی "نی توُتوقلاییب حبس ائتدیلر.
آمما بو اعتراض سسلری‌نین ائشیدیلمه‌سی و آذربایجان میلّتی‌نین اؤز وارلیق و شرفیندن مدافعه ائتمه‌سی چوْخ‌دا اوُجوز باشا گلمه‌دی؛ چونکو تبریز، اوُرمو، سوُلدوز و خیاودا گول پارچاسی کیمی گنجلریمیز، شرفلی و میلّی دوشونجه‌لی اینسانلاریمیز بیر مدنی اعتراض‌دا و اینسان‌لیق شرفیندن و حیثیتیندن مدافعه ائتمک یوْلوندا آل قانلارینا بوْیانیب شهید اوْلدولار!
اگر بیر نئچه آی سوْنرا "ایران " گونده‌لیگی یئنی‌دن ایشه باشلاییب، اوْنون مسئول مدیری بو ماجرالارین یاراتماسیندان تبرئه اوْلوب توْهینلی کاریکاتورلو حکایه یازاری "مانا نیستانی " ایراندان قاچیب یا قاچیریلسادا، آذربایجان میلّتی هئچ زامان اؤز شرف و حیثیتی یوْلوندا آذربایجان شهر و بؤلگه‌لرینده باشلانان ۱۳۸۵- جی ایل خُرداد آیی‌نین قیامی‌نی و بو یوْلدا جانلارینی قوُربان وئرَ‌ن اَردملی شهیدلری‌نین خاطره‌سینی اوُنوتمایاجاق!