اوستاد شهریار و شوونیست‌لر!

                  حسن راشدی

1381- جی ایلین شهریور آییندا، تبریزین مجلیس وکیلی علی اصغر شعردوست پیشنهادی و "شورای عالی انقلاب فرهنگی" تصویبی ایله "اوستاد شهریار" ین وفات ائتدیگی گون ، یعنی شهریور آیی نین 27- سی " ایرانین ملّی شعر و ادب گونو" (روز ملی شعر وادب ایران) تعیین اولوندو.
لاکین بو خبر مطبوعاتدا یاییلارکن شوونیست فارسلار ال- آیاغا دوشوب آذربایجانلی و تورک بیر شاعیرین آدینی ایرانین شعر وادب گونو آدینا قویولماسینی تحمل ائده بیلمه دیلر.
حتی شهریارین سویله‌دیگی شعرلری‌نین اکثریتی فارسجا اولدوغو و معاصیر دؤورده ایرانلیلار ایچینده ان تانینمیش و مشهور شاعیراولدوغودا شوونیستلری راضی سالمادی !
اونون "علی ای همای رحمت....، آمدی جانم به قربانت ولی حالا چرا....،جوانی شمع ره کردم که جویم زندگانی را......، ای وای مادرم....و بوتون ایرانلیلار ایچینده دیللر ازبری و مشهور اولان فارسجا شعرلری ده پان فارسیست‌لری قانع ائتمه‌دی!
شهریارین بؤیوک بیر گوناه و سوچو وار ایدی ، اودا اؤز دوغما دیلینده یعنی آذربایجان تورکجه سینده شعر سؤیله‌مه‌سی ایدی!
همین گون ایله باغلی شوونیست‌لر 1381- جی ایلین پاییزیندا مطبوعاتدا بئله دئدیلر:
بهاءالدین خرمشاهی: " ...بو سئچیم، پان تورکیسم حرکت‌لرینه سبب اولاراق بیزیم میلّی مصلحت‌لر علیهینه اولابیلَر...(ایران قزئتی 3/مهر/1381 ص 20)
پرویز ورجاوند: "...امید ائدیرَم بو سئچیم ، قومیّت‌چیلیگی ایران جامعه‌سینده یاراتماسین... ( ایران قزئتی 3/مهر/1381)
ضیاء موحد:"... شهریار او درجه‌یه چاتماییب کی ،" ایرانین میلّی شعر و ادب گونو" اونون آدینا اولسون ....!(ایران قزئتی 3/مهر/1381" )
و چوخ کیچیک آداملار، بؤیوک شهریار آردینجا یونگول و آتماجا سؤزلر آتدیلار و جسارتی او یئره چاتدیردیلار کی ، اوستاد شهریارین کاریکاتورونو چکدیلر !
شوونیستلر، ایرانی یالنیز فارسلارین شخصی مُلکی حساب ائده‌رک و باشقا میلّت‌لرین بو مملکتده هئچ بیر حق و حقوقلاری اولدوغونا ایناملاری اولمادیقدان ، صبح‌دن آخشاما کیمی رادیو- تئلویزیون ومطبوعاتدا ، فارس بئله گلدی- فارس بئله گئتدی، فارس دیلی دونیادا ائله اولمالی دیر- بئله اولمالی‌دیر، ستارگان پارسی ائله دیرلر- بئله دیرلر و یوزلرجه بو جور آشیری و منطق‌سیز تبلیغاتلارین هئچ بیریسینی پان فارسیسم و فارس قومیت‌گرالیق آدلاندیرمیرلار، آما شهریارین "حیدربابایه سلام" شعرینده اونون اوشاقلیق خاطره سی و " آغاج مینیب آت گزدیرَن گونلری " باعث اولورکی، شهریارین اؤلوم گونو،" ایرانین ملّی شعر و ادب گونو" آدلانماسین ، چونکو " پان تورکیسم" حرکت لری‌نین مئیدانا گلمه‌سینه سبب اولار !!
و نهایت شوونیست لر آرزولارینا چاتیر لار و " روز ملی شعر وادب ایران" ی "روز شعر وادب فارسی"یه چئویریر و تقویم‌لرده یازیرلار!
چونکو اونلارین فیکیرینجه هر شئی ایراندا فارس آدینا اولمالی‌دیر، حتی ایران آدینا اولماغی‌دا تحمل ائده بیلمزلر!
لاکین شوونیست لرین بو جور حرکتلری‌دیرکی،سون ایللرده داها "ایران" آدی، ایران چرچیوه سینده یاشایان میلّت‌لره، اوزللیکله تورکلره، فارس هویتینی داشییر و تورکلر فارس اولمادیقلارینا گؤره، ایرانا ، داها بوتون ایران میلّتلرینی اؤز ایچینه آلان بیر اؤلکه کیمی باخماغا شوبهه ائدیرلر.
▀