+0 بَگَن (Bəyən)
میلّی حرکتله باغلی صداقت و صمیمیّت چاغریسی !
حسن راشدی ، شنبه ۱۴ /۵ /۱۳۹۶
سون ایل، آی ،اؤزللیکله سون گونلرده تاسّف‌له بیر عده میلّی حرکت آدی ایله مجازی دونیا و سوسیال شبکه‌لرده آذربایجانین میلّی وارلیق، کیملیک، و انسانی حقوقلاری یولوندا چالیشماق یئرینه بیر-بیرلرینی تخریب ائدیر و بوتون وارلیغیمیزین دوشمنی اولان و بیزی یوخ ائتمه یه چالیشان شوونیزم تشکیلاتلارین وظیفه سینی یئرینه یئتیریرلر!
نئچه ایل اؤنجه، میلّی حرکت‌ده هر بیر فعال و چالیشقان انسانا قیمت و ارزش وئریب اونون آرخاسیندا دوروردوقسا، ایندی هرکس باشقاسینی متّهم ائدیر و اتهام باتلاغیندا بوغماق ایسته‌ییر!
بو آرادا شخصی اختلافلار دا آذربایجان میلّی مسئله‌سینه باغلانیر و هر کس اؤزونو حاقلی و باشقاسینی حاق‌سیز و دوشمن تشکیلاتلارینا باغلی و او تشکیلات خدمتینده گؤرور.
نئچه ایل قاباق ایچه‌ریده اولان هر کس صادقانه ، ریاسیز ، بویاسیز میلّی یولدا چالیشیردیسا، متاسفانه ایندی میلّی حرکت یولو ایله شهرت قازانماق فیکرینده اولانلار، وارلیغیمیزین قانلی دوشمنی اولان شخص و تشکیلاتلارین آغزیندان چیخان سؤزلرینی، قارشی طرفه نثار ائدیر ، نزاکت و ادب‌دن اوزاق و دوشمن سئون جمله لرله طرفی مئیداندان چیخارماق ایسته‌ییر.
میلّی حرکت ، یئمه‌یه حاضیرلانمیش دادلی بیر یئمک و یا ماسالاری حاضیرلانمیش پست و مقام دئییل کی، بو یولدا حرکت ائدنلر او دادلی یئمک و یا مقام و شهرته چاتسینلار . هر کیم بو یولدا حرکت ائدیرسه هزینه وئرمکدن باشقا بیر منفعت و قازانجا چاتماز.
میلّی وارلیغیمیز یولوندا سگگیز ایل چتین شرایط‌ده قهرمانلیقلا و ایگیدجه‌سینه حبسه دؤزوب حبس‌دن قورتاران سعید متین پور دان توتوب، دوققوز ایل حبسه محکوم اولان و رجایی شهر (گوهردشت) زیندانی دیوارلاری آراسیندادا میلّی وارلیغیمیز و انسانی حاقلاریمیزدان مدافعه ائدن دوکتور لطیف حسنی ( آراز ) ، دوققوز ایل زیندانا محکوم اولوب دؤرد ایلدن چوخ حبس چکدیکدن سونرا اؤزل شرایط‌له آزادلیغا بوراخیلان یوروش مهرعلی بگلی ، محمود فضلی و دوستلاری ، ایندیلیکده چتین دورومدا و هله‌ده آغیر باسقیلارلا قارشی- قارشی‌یا سورغو-سئوال آلتیندا زینداندا محبوس اولان سیامک میرزایی، حبیب ساسانیان ، قادینلارین چالیشما چتینلیگینی و محدودیتینی نظره آلاراق میلّی یولدا چالیشدیغینا گؤره بئش ایل زیندانا محکوم اولوب تجدید نظر مرحله‌سینده قیسا مدتلی حبسه محکوم اولان آذربایجانین دیشی آسلانی سهیلا کارگر ، آغیر وثیقه ایله موقتی اولاراق محکمه تشکیل تاپانا قدر آزادلیغا بوراخیلان حجت الاسلام عظیمی قدیم و اون ایل زیندان و ایکی ایل تبعیده محکوم اولوب تجدید نظر مرحله‌سینده اولان اکبر آزاد، علیرضا فرشی و اونلارلا بیر شرایط‌ده اولان باشقا دوستلاری و دفعه لرله زیندان چکیب ایندی‌ده آیاغی محکمه‌لر یولوندا اولان و باسقی و فشارلار قارشیسیندا داغ کیمی دایانان عباس لسانی و آدلارینی چکمه‌دیگیمیز زیندان چکیب و یا زیندان چکمه‌ین آمما میلّی یولدا صداقتله و بوتون وارلیقلاری‌ایله چالیشان چوخلو میلّتچی‌لریمیزین چکدیکلری بو آجی‌لاری کیمسه آلچاقلادیب ارزش‌سیز سایا بیلمز.
ایندیکی دورومدا میلّی حرکت یولوندا چالیشان انسانلار هزینه وئرمکدن باشقا بیر قازانج الده ائتمیرلر؛ میلّی حرکته لیدرلیک و رهبرلیک ادعاسی ائدنلر وارسا، بو لیدرلیک و اؤندرلیک، صادقانه، ادعاسیز،ریاسیز و بویاسیز چالیشیب و بو یولدا چالیشان بوتون انسانلاری سئومک و اونلارا حؤرمت بسله‌مک و آذربایجان سئوگیسی، اکثریت اولوب اقلیت حقوقوندان محروم قالان مظلوم بیر میلّت و تحقیرلر و توهینلر آلتیندا اینله‌ین ۳۵ میلیون انسانین هارایلاری بوتون وجودونو بورومکله میسّر اولار.
آذربایجانین دردلری چوخ ، یارالاری درین‌دیر، گلین بوتون کینه و نیفرتلری بیر یانا بوراخاراق آذربایجانین یارالارینی سارماغا چالیشاق و بیر- بیریمیزله دوشمن اولماق یئرینه ، سنین ، منیم و هامیمیزین و بیر سؤزده وارلیغیمیزین قانلی دوشمنی اولانلارا قارشی، بیرلیکده ال- بیر ، اوره‌ک - بیر، اولوب بو مقدّس یولدا صداقت و صمیمیّتله چالیشاق!