25 دی 1398

۱۳۹۷ جی ایل خورداد آیی نین بیرینجی گونو هر زامانکی اولدوغو کیمی ساعات ۴-۵ حدودلاری، (گون اورتادان سونرا) تهراندا کیتاب آلماغا   «تهران بیلیم یوردو»  قارشیسی و  « فروزنده» پاساژینین ان آشاغا قاتیندا یئرلَشن  «اندیشه نو» انتشاراتینا باش چکدیگده گؤردوم ۳-۴ نفر  دوکان قاباغیندا کارتونلارا کیتاب توپلاماقدادیلار و کیتاب دوکانی دا قاریشیق حالدادیر! 

 سایین یوسف فرزانه « اندیشه نو» انتشاراتین مسئولودا گرگین دورومدا کیتاب توپلایانلارین الینه باخیر! 

من دوکانین ایچینه کئچمک ایسته ینده، کیتاب توپلایانلارین بیری منه خطاب فارسجا:

  « حاج آقا مغازه تعطیله!» 

من تعجب ایله آقای فرزانه نین اوزونه باخاندا اودا قیسا جمله ایله منه بیلدیردی، بلی.... دوکان تعطیلدیر!

سونرا بیلدیم گلیب « اندیشه نو» کیتاب دوکانیندان، مجوّز ایله چاپ اولان دوکتور زهتابی، دوکتور هئیت و منیم (راشدی) کیتابلاریمی تمامیله توپلاییب آپاریبلار و آقای فرزانه یه ده دئییبلر، بوندان سونرا بو اوچ نفرین کیتابلارینی ساتمامالیسان! 

آقای فرزانه دئییب بو کیتابلارا ارشاد اداره سی مجوّز وئریب چاپ اولوب ساتیلماسینا. 

دئییبلر مجوّزی اولسادا سن ساتمامالیسان!

 سونرا ظاهرا آقای فرزانه ده محکمه یه چکیلیب و محکمه نین سون حؤکمو، کیتابلار مصادره اولدوقدان علاوه اوچ میلیون تومن جریمه و بیر آی کیتاب دوکانی نین تعطیلی اولموشدور!

ایندی هم او اوچ میلیون جریمه وئریلیب و هم بیر آی دوکان تعطیلی باشلانیب!

https://t.me/yurddash