یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

بابک قالاسی مراسیمی، تاریخی ابتکار!

+0 بَگَن (Bəyən)
BBCPersian.com

بابک قالاسی مراسیمی، تاریخی ابتکار!
 حسن راشدی: تیر آیی‌نین ۷-سی ۱۳۹۹
شرقی آذربایجان اوستانی‌نین مشهور بؤلگه‌سی و جنّته اوخشار «قره داغ» منطقه‌سینین کیچیک شهری«کلئیبر»ین باتی‌سیندا چوخ مشهور تاریخی بیر قالا وار.
بو قالانین آدی تاریخده «بَذ» یا « بَذّ» آدی ایله یاد ائدیلیب، آمما داها چوخ « بابک قالاسی» آدی ایله مشهوردور، چونکو بو مکان اسلام تاریخی‌نین اوچونجو یوز ایللیگینده عباسی خلیفه‌سی علیهینه ۲۰ ایل مبارزه آپاران آذربایجانین ملّی قهرمانی«خرّمدین بابک»ین مبارزه سنگری اولموشدور.
۱۳۷۹ جو هجری شمسی ایلیندن اؤنجه، آذربایجانلی ادیب، موّرخ، اؤیرنجی و بو ملّی دوشونجه لی انسانلارین اؤنجولو رحمتلیک دوکتور زهتابی داغلیق منطقه‌ده  یئرله‌شَن  " بابک قالاسی" یا " بَذ قالاسی" حاقدا  تاریخی حادثه‌لره دایاناراق یای فصلی‌نین ایستی‌سیندن اوزاقلاشیب سرین هاوا و گؤزل طبیعت‌ده ملّی قهرمانیمیزین خاطیره‌سینی  اونوتماماق اوچون بعضی زامانلار ۲۰- ۳۰ نفرلیک توپلومدا "بابک قالاسی" باشینادا چیخیر و عرب خلیفه‌سینه قارشی مبارزه آپاران آذربایجانین تاریخی قهرمانی "بابک‌ خرّمدین"ین  تاریخی قهرمانلیغینداندا سؤز آچیردیلار. آمما ۱۳۷۹ - جو ایل و یاز آیلاریندان، باشقا بیر جریان دیلدن دیله دوشدو!
"بو ایل ( ۱۳۷۹) جمعه گونو  و تیر آیی ۱۰ - و  " بابک خرّمدین "ین  دوغوم گونو ، بابک قالاسیندا عظمتلی مراسیم کئچیریله‌جک ؛ بو مراسیمه آذربایجان شاعیر، یازیچی، ادبیاتچی و عاشیقلاری قاتیلیب آزاد طبیعت‌ده ادبی- فرهنگی مراسیم چرچیوه‌سینده  آذربایجان موسیقیسی و رقصی‌ده اجرا ائده جکلر." 
بو خبرلر و اطلاعیه‌لر او قدر چوخالدی و جدّی لشدی کی، حتی شایعه اولدو بو مراسیمه تورکیه‌‌نین مشهور صنعتچیسی " ابراهیم تاتلیسس"ده قاتیلاجاق و مراسیمده برنامه اجرا ائده جک!
هر حالدا تیر آیی گلدی و اونون جمعه و ۱۰- جو گونونده اون مینلرجه اؤیرنجی و غیر اؤیرنجی آمما ملّی فعال و تورک انسانی آذربایجانین مختلیف شهر و کندلریندن و حتی تهراندان بابک قالاسینا توپلاشیب  ادبی- فرهنگی ، شعر - موسیقی برنامه‌لرین اجراسینا باشلارکن جمهوری اسلامی‌نین آنا یاسی‌نین (اساس قانونون) ۱۵ و ۱۹ جو ماده سی‌نین اجراسینی یعنی آنا دیلده مکتب‌لرده درس وئریلمه‌سینی‌ده توپلوم حالدا دؤلت‌دن ایسته‌دیلر.
بو مراسیمده خبری گئدن بوتون برنامه‌لر او جمله‌دن، شعر - موسیقی ، تئاتر و باشقا فرهنگی - هنری برنامه‌لر اودا بابک قالاسی‌نین گؤزل محیطی و سرین هاواسیندا اجرا اولدقدان علاوه، ملّی مسئله لریمیز، انسان حاقلاری و فرهنگی - مدنی ایستکلریمیزله باغلی دانیشیقلار و چیخیشلار اولدو. یالنیز ابراهیم تاتلیسسین مراسیمه قاتیلماسی شایعه ایمیش !
مراسیمدن سونرا، اونون خبری تبریز رادیو- تلویزیونو و حتی تهران روزنامه‌لرینده گئنیش سویه‌ده یاییلدی و بابک قالاسی‌نین خبری هر کسین نظرینی اؤزونه چکدی!
۱۳۷۹ جو ایل و اوندان  سونرا تیر آیی‌نین ایکینجی پنجشنبه جمعه‌سی « بابکین دوغوم گونو» اعلام اولوب ملّی فعاللار و اؤیرنجیلر آراسیندا رسمیتله قبول اولدو.
  ۱۳۸۰، ۱۳۸۱، ۱۳۸۲ و ۱۳۸۳ جو ایللرده دؤلت طرفیندن مراسیمین کئچیریلمه‌سینه مختلیف محدودیتلر یارانسادا  یئنه مراسیم، مدنی بیر چرچیوه‌ده و یوز مینلر انسانین اشتراکی ایله بو ایللرده تیر آیی‌نین ایکینجی پنجشنبه -جمعه‌سی، چوخ طنطنه و هیجانلا  کئچیریلدی، آمما ۱۳۸۴- جو ایلدن تیر آیی‌نین ایکینجی پنجشنبه - جمعه‌سی داها هئچ کیمی قالایا یول وئرمه‌دیلر و مراسیمین اجراسی‌نین قاباغینی آلدیلار!
بو ایلدن سونرا ملّی فعاللار اؤز مدنی- فرهنگی ایستکلرینی ورزش مئیدانلارینا چکیب « تراختور» فوتبال تیمی سوپرلیگه آیاق قویاندان سونرا بو تیمی حمایه ائتمکله ۱۵- جی ماده نین اجراسینی و آنا دیلینده تحصیل آلماق ضرورتینی ورزشگاهلاردا «#تورک_دیلینده_مدرسه_اولمالیدیر_هرکسه » شعارینا چئویردیلر.
آذربایجان تورکلری، آذربایجانین ملّی قهرمانی « خرّمدین بابک » ه دوغوم گونو تعیین ائدیب مراسیم کئچیردیکدن سونرا فارس ناسیونالیستلری‌ده بو ابتکاردان اقتباس ائدیب نئچه ایل اؤنجه شیرازین پاسارگاد منطقه‌سینده  و قرنلر اؤنجه «سلیمان آناسی‍نین مزاری» آدی‌ایله مشهور اولان، لاکین بیرینجی پهلوی زامانیندان «کوروش» قبری آدی ایله تانینان بنادا اؤزل بیر گونده مراسیم کئچیردیلر!
طبیعی کی، داها تیر آیی‌نین ایکینجی پنجشنبه- جمعه‌سینده بابک قالاسیندا مراسیم کئچیرمه‌یه اجازه وئریلمیر، آمما بو ابتکار،اؤنملی مدنی بیر حادثه اولاراق آذربایجان تاریخینده ثبت اولاراق واختی و زامانی گلدیکده مسلما یئنه کئچیریله جکدیر.                                                                                                                  https://t.me/yurddash