شهر شوراسی سئچگیلری زامانی یاخینلاشیر، بو سئچگی‌لر ایله علاقه‌ده باتی آذربایجانین بعضی شهرلرینده او جمله‌دن سایین قالا (شاهین‌دژ)، سولدوز (نقده)، تیکان‌تپه (تکاب) اؤزللیکله اورمو شهرینده خاصّ بیر وضعیت و دوروم حاکیمدیر؛

 بونون اساس سببی ده اؤزونو کورد خلقینه منسوب ائدن تئروریستی قوه‌لرین چیرکین نیّت‌لری‌دیر.

اورمو شهری باتی آذربایجانین ان اؤنملی،تانینمیش،تاریخی و اسکی شهرلریندندیر.  اورمو شهرینده یاشایان یئرلی اهالی‌نین قاطع اکثریتینی ان قدیم زامانلاردان تورکلر تشکیل ائتدیگی حالدا، بو شهرده آسوری، ائرمنی، کورد و... آزینلیقلاری‌دا تورکلرله یاناشی یاشاییرلار.

 اورمونون تورک اهالیسی هر زامان بو اقلیّت‌لره  قوجاغینی آچمیش و اونلارلا محبتله یاناشیب امنیّـتلرینی قوروموشلار؛ لاکین اؤزلرینی کورد خلقینه منسوب ائدن تئروریستی قوه‌لر، چالیشیرلار غربی آذربایجان، خصوصی‌ایله اورمو شهرینده «شهر شوراسی» سئچگیلرینده بعضی کوبود حرکتلره ال آتاراق اورمو، سولدوز، سایین‌قالا و تیکان‌تپه‌نی تورک شهرلری یوخ، باشقا بیر ائتنیکلرین شهرلری کیمی تبلیغ ائتسینلر!

بو فاکتورلاری نظره آلاراق بوتون تورک ملّی فعاللاردان تقاضا ائدیریک آرادا اولان احتمالی تفرقه و نئچه تیره‌لیگه سون قویوب، تام اراده، اینام و حاضیرلیقلا، بیرلیک‌لرینی قوروماقلا برابر، اهالینین رأی‌لری‌نین پارچالانماسینا یول وئرمه‌سینلر و پیس نیـّتـلی تئروریست قوه لرین آرزولارینی بوشا چیخارماق اوچون بوتون شخصی و گروهی سلیقه‌لری قیراغا قویوب، وطن نامینه و ملی منافع اوغروندا بیرلشه‌رک «شهر شوراسی» سئچگیلرینه آدای‌لاردان یالنیز بیر لیست ارائه ائدیب، بوتون قوه‌لری‌ایله او لیست‌دن حمایه ائتمه‌یه و شهر اهالیسی‌نین اونلارا رای وئرمه‌لرینه چالیشسینلار.

۵/۲/۱۴۰۰ - ( 25 آوریل 2021)

سایقی و حؤرمتله

: اکبر آزاد    حسین محمدخانی (گونئیلی)        حسن راشدی                                                                                                                                                                                        https://telegram.me/yurddash