۱۳۷۷- جی هجری گونش ایلی آذربایجان میلّتی نین هویّت و وارلیغی ایله چیرپینان بیر اورَک ، دی آیی نین بیرینجی گونو دایاندی و ‌دی آیی نین اوچونجو گونو شبسترده تورپاغا تاپشیریلدی! 

 شبستَر اهالیسی و آذربایجانین مختلیف شهرلریندن گلن اَدیب ، شاعیر، یازیچی و اؤیرنجیلر ، ۷۵ ایل عؤمور سوروب، آذربایجان عشقی ایله یاشاییب، آذربایجان میلّتی نین آلین یازیسی، هویّت و وارلیغی یوْلوندا اؤز وارلیغیندان کئچَن بیر غیرتلی اؤولادینی تورپاغا تاپشیردی!

مُـعجُز شَهَریندن باش قالدیریب میلّتی نین دانیلمیش هویّت و تاپدالانمیش شخصیّتینی اوْنلارا قایتارماق اوچون ایناملا فعالیت آپاران بیر اینسان ‌دیلیمیز، ادبیّاتیمیز و مدنیّتیمیز یوْلوندا چالیشانلاری درین ماتمه باتیردی. اوْ گون آذربایجان آنا، محمد تقی زهتابی آدیله تانینمیش ایناملی و ایمانلی ایگید بیر اوْغلونو باغرینا باسدی !

پروْفئسور زهتابی عؤمور بوْیو و اَن گنج یاشلاریندان میلّتی نین آلین یازیسینا لاقید قالماغا اؤزونو راضی ائده بیلمه‌ییب استالین ‌دیکتاتورلوغو زامانیندان توتاراق عؤمرونون سوْن دقیقه‌سینه قَدَر، خلقی نین معنوی حق‌لری یوْلوندا مبارزه‌دن بیر آن بئله دایانمادی، ائله بو یئنیلمَز اراده‌سینه گؤره هم شورالار اؤلکه سینده و هم انقلابدان سونرا وطنه دؤندوکدن سونرا، اوُزون ایللر بویو آغیر سورگون و زیندانلارا معروض قالدی.

بؤیوک عالیـم، حتّا زینداندا قالدیغی ایللرده‌ ده بئله، بوتون سیخینتی و تضییق‌لره دوزه‌رک میلّتینه چؤرَک یئمَکدن واجیب ساندیغی آذربایجان ‌دیل و ادبیّاتی نین قوْرونوب ساخلانیلماسی یوْلوندا سارسیلمادان چالیشدی.

پروْفئسور زهتابی، تربیه ائتدیی اؤیرنجیلر و یازدیغی- یاراتدیغی اثرلرله آذربایجان تاریخینده ابدی یاشاییشا مالیک اوْلدو.

آذربایجان میلّتی بوُ بؤیوک اینسانین آدیله فخر ائدیر، آذربایجان تاریخی ایسه اؤز شانلی صحیفه‌‌لرینده اوْنون آدینی قیزیل قلمله یازاجاق و تورک دونیاسی اوْنا فخر ائده‌جکدیر!                                                                                           https://t.me/yurddash