یوردداش yurddaş

بو بلاگ آذربایجانلیلارین و ایراندا یاشایان باشقا تورکلرین دیل ، تاریخ ، مدنیت ، فولکلور و انسانی حاقلاری ساحه سینده چالیشیر .

من بو گون یالنیز فخر یوخ ، قانادلانیب اوچماق ایستیرم ! (14)

+0 بَگَن (Bəyən)

 

                            

                       من بو گون یالنیز فخر یوخ ، قانادلانیب اوچماق ایستیرم ! (14)   

                                            دوکتور هئیت‌دن اؤزل خاطیره‌لر   

                                            حسن راشدی : اول مهر۱۳۹۴ 

 سؤیله‌نیلن تاریخ : ۲۷ خرداد  ۱۳۷۹جمعه

  مکان : تهران " شفق مدنیت سارایی "

زامان : ساعات :   ۱۳:۳۰

من (حسن راشدی ) ، اکبر آزاد و نوشین موسوی ( آیشین آیدا ) ۱۳۷۲ جی ایلدن اوشاقلار و یئنی یئتمه‌لرله باغلی " چیچکلر قورولوشو " آدلی بیر تشکیلات یاراتدیق . بو تشکیلات آذربایجاندا یاشایان و یا  تهراندا آذربایجانلی عائله‌لریندن دونیایا گلن اوشاقلارین یاردیمی ایله آنا دیلده مختلیف فولکلوریک - موزیکال برنامه لر اجرا ائتمه‌یه موفق اولدو و ایلک برنامه‌سینی 1373 جو ایل تهرانین 16- جی آموزش و پرورش منطقه‌سی‌نین " دوکتور شریعتی " آدینا بؤیوک تالاریندا و نازی آباد محله‌سینده  " اوشاق شعری و موسیقیسی آخشامی " آدی آلتیندا هنرمند آذربایجان اوشاقلاری‌نین اجراسی ایله باشلادی ؛ بیر ایل سونرا و 1374 جو ایلده " لای لای ، نازلاما و بوی اوخشاما " آدی ایله یئنه همان سالوندا و 1376 جی ایلده ایسه "مین ایل ادبیات ، اوشاقلار و 710 ایل یاشاییش"  آدی ایله باشقا برنامه‌نی تهرانین " بهمن مدنیت سارایی " ندا اوشاقلار و یئنی یئتمه‌لر طریقی‌ایله رحمتلیک دوکتور زهتابی ، دوکتور هئیت ، دوکتور فرزانه و رحمتلیک غلامرضا مجدفردن  تجلیل ائده‌رک اجرایا آپاردی.  

بو برنامه‌لردن چوخ استقبال اولدو ، اؤزللیکله بو برنامه‌لر اوشاقلار و یئنی یئتمه‌لر طرفیندن اجرا اولدوقلاری‌اوچون اونلارین باجاریقلارینی اؤز آنادیل ، ادبیات ، موسیقی و باشقا ساحه‌ده  نمایش ائتدیریردی.

۱۳۷۶ جی ایلین اوغورلو برنامه سیندن سونرا ۱۳۷۷ جی ایل " تهران بهمن مدنیت سارایی ( فرهنگسرای بهمن تهران) " ایله " چیچکلر قورولوشو " باشقا بیر برنامه نین اجراسینا امضا آتدیلار .  بو برنامه "آذربایجان هفته سی " آدی ایله ، بیر هفته لیک وآبان آیی نین ۵ یندن ۱۲ قدر اولاجاقدی .

بو برنامه‌ده آذربایجانلا باغلی  آذربایجان یئمکلریندن توتدو  آذربایجانین محلّی گئییملری ، شیرینی‌ نوعلاری ، توی عادت - عنعنعه لری ، فولکلور ، داستان  و باشقا ساحه‌ده مختلیف برنامه‌لر اؤزللیکله شعر ، مقاله ، آذربایجان رقص و موسیقی برنامه سی اجرایا گئده جکدی .

بوتون حاضیرلیقلار دؤرد آی اؤنجه‌دن گؤرولدو و حتی "چیچکلر قورولوشو " ایله  " فرهنگسرای بهمن " آدینا اورتاق اطلاعیه‌لر یازیلیب یاییلدی و تهران مئیدانلاریندا رکلام یازیلاری اوزون پارچالاردا گؤز اؤنونده  سرگیلندی ،. ایش اورا چاتدی کی ، تبریزده موسیقی و رقص اجرالارینی حاضیرلایان دوستلار تهرانا گلمک اوچون حتی اوچاق و قاتار بلیط‌لرینی‌ده آلدیلار و آذربایجان هفته‌سینه گؤنده‌ریلن و برنامه‌ده اوخوناجاق مقاله‌لرین سایسی ۳۷ یه چاتدی ؛ بو مقاله لری یوللایانلار تانینمیش شخصیت و مشهور یازارلاریمیزدان او جمله‌دن : رحمتلیک دوکتور جواد هئیت ، دوکتور حمید نطقی ، دوکتور محمدتقی زهتابی ، دوکتور محمدعلی فرزانه ، اوستاد بهزاد بهزادی ، دوکتور صمد سرداری نیا و باشقالاریندان ایدی  و آذربایجان موضوعلاری ایله باغلی دولغون مقاله لر ایدی.

بئله بیر دورومدا و مهر آیی‌نین اوتوزوندا و برنامه‌نین اجراسینا یالنیز دؤرد گون قالمیش فرهنگسرا مسئوللاری طرفیندن بیزه دئدیلر :​ " آذربایجان هفته‌سی برنامه‌سی لغو اولدو " !

خبر چوخ شاشیردیجی و اوزوجو ایدی ! مختلیف یوللارلا نه قدر چالیشدیقسا برنامه اجرایا گئتسین ، اولمادی کی اولمادی ! علتی سوروشدوقدا فرهنگسرا مسئوللاری دئدیلر : "برنامه نین اجراسینا بودجه‌میز چاتمادی !"  بو سؤز چوخ اویدوروجو و اوشاق آلدادیجی قدر منطیق‌سیز ایدی ؛ هر کس بیلیردی کیملر طرفیندن بو دستور گلمیشدی ؟

دؤرد آی اؤنجه‌دن پلانلانمیش برنامه‌نین بودجه‌سی یالنیز برنامه‌نین اجراسینا دؤرد گون قالمیش حسابلانمیش اولارمی؟! بیر حالدا کی ، برنامه نین هزینه‌سی‌نین  چوخودا بلیط ساتیشیندان چیخاجاقدی و فرهنگسرایا بیر هزینه‌سی اولمایاجاقدی .

بئله بیر دورومدا بیز " چیچکلر قورولوشو " اولاراق برنامه‌نین لغوی باره‌ده مطبوعاتا مصاحیبه وئرمک ایسته‌ینده  فرهنگسرا مسئوللاری طرفیندن دوستاجاسینا و رجاء اولاراق بو مصاحیبه‌دن واز کئچمه میزی خواهیش ائتدیلر و اونلاردا بو برنامه‌نین لغو اولماسینا مجبور اولاراق بویون قویمالارینا اعتراف ائتدیلر. "آذربایجان هفته‌سی " پلانی و اونون لغو اولماسی بیزیم چوخلو چالیشما انرژیمیزی الیمیزدن آلدی و بیر مدت بیزی چالیشمادان قویدو .

 آنجاق " یاشاماق اوچون بوتون اوغورسوزلوقلارا قارشی اراده و دایانیق گره‌کیر " دئیه بیر مدتدن سونرا و چیچکلر عضوونون بیری یعنی "آیشین آیدا " خانیم درس اوخوماغا داوام ائتمک و اورتاق حیات قورماق‌اوچون بیزدن آیریلیب باشقا بیر اؤلکه‌ده یاشاماق دروموندا قالدیقدا من و اکبر ازادین بئینینده باشقا بیر مسئله یئر آلماغا باشلادی .

آنا دیلیمیزده یازیلان یازیلار بیر مئتود و قایدادا یازیلمادیغی اوچون دیلیمیزی راحات اوخویوب - یازیماقدا چتینلیک چکیریک ، یازیلان کیتاب و مقاله لریمیز بیر قایدا- قانون چرچیوه سینده  و بیر املا ایله یازیلارسا آنا دیلده یازیب - اوخوما چتینلیکلریمیزین چوخو آرادان قالدیریلار دئیه فیکیر پلانلاماسینا باشلادیق .  بو ایشی "چیچکلر قورولوشو " باشلاسین یوخسا باشقا دوستلارلادا مصلحت‌لَشک دئیه ، بو ایشی باشلاماغا هر قوروم و تشکیلاتدان اوستون " وارلیق" درگیسی و اونون باشیندا دایانان تجربه‌لی عالیم و بیلگین " دوکتور جواد هئیت‌"ی اویغون گؤردوک. موضوع وارلیق دفتری ساییلان دوکتور هئیتین مطبّینده مطرح اولدوقدا دوکتور هئیت طرفیندن بو اصلاحین گؤرولمه‌سی‌نین  نه قدر لازیم اولدوغو اعلان اولدو.

بو توافق‌دن سونرا ایشین باشلانماسینا " وارلیق" تحریریه هئیتی جلسه‌ لری آردی- آردیندان قورولماغا باشلادی و بو چالیشمالارا " اورتو گرافی " جلسه لری آدی وئریلدی . اورتوگرافی جلسه‌لری‌نین هدفی  آنا دیلده یعنی آذربایجان تورکجه‌سینده و عرب کؤکلو الیفبا ایله یازدیغیمیز یازیلاریمیزی بیر قایدا و قانونلا یازماق و بیر املایا صادق قالماقدان عیبارت ایدی .

یالنیز وارلیق یازارلاری یوخ ، تهراندا ، گونئی آذربایجان و ایرانین باشقا شهرلرینده یاشایان و دیلیمزده یازان باشقا ادیب و یازارلاردا بو جلسه‌لره دعوت اولوب فیکیرمبادله سینه باشلاندی و " علمی هئیت " عضولری سئچیلدی . آیلار و هفته لر مختلیف جلسه‌لردن سونرا  "بیرینجی اورتوگرافی " سمیناری‌نین بیرینجی  گونو پنجشنبه ۲۶ خورداد صبح ساعات ۹ دا و ایکینجی گونو ایسه جمعه ۲۷ خورداد ۱۳۷۹ جی ایل و تهرانین " شفق مدنیت سارایی ( فرهنگسرای شفق)  " ندا ایشه باشلاییب دگرلی مقاله‌لر اوخونوب و سس (رای ) چوخلوغو اساسیندا معیّن املا قایدالاری قبول اولوب سمینار سونا چاتدی.

سمینارین اختتامیه مراسیمینده رحمتلیک دوکتور هئیت تریبون آرخاسینا گئدیب دئدی :

" من بو گون یالنیز فخر یوخ ، قانادلانیب اوچماق ایسته‌ییرم ؛ چونکو بوردا و بو سمیناردا بو قَدَر گؤزل و دولغون مقاله‌لر و معروضه‌لرین شاهیدی اولدوم و اؤلنده‌ده راحات خیاللا اؤله‌جگم . بیز وارلیغی چیخارداندا (۱۳۵۸ جی ایلده) بارماق سایی قدر دیلیمیزده یازان واریدی و اونلارین ایچینده رحمتلیک گنجعلی صباحی‌نین نثر اثری ائله گؤزل و آخیجی ایدی کی ، من اونو دفعه‌لرله اوخویاردیم ، حتی ازبرلردیم ؛ الحمدالله ایندی و یئنی نسلیمیز داها دیلیمیزده گؤزل نثرلر یازیرلار . من بو گون بوردا دینله‌دیگیم نثرلری گؤردوکده یالنیز فخر یوخ ، قانادلانیب اوچماق ایسته‌ییرم . اگر دوکتور زهتابی ، دوکتور نطقی ، پیر هاشمی ، صباحی و باشقا رحمته گئدنلریمیز بوردا اولسایدیلار گؤرَردیلر اونلارین زحمتلری هَدَر اولماییب ."

سونرا دوکتور هئیت دوکتور حمید محمدزاده و دوکتور محمدعلی فرزانه‌‌دن آد چکیب بیری زنجاندا و او بیریسی سوئد اؤلکه‌سینده خسته حالیندا اولدوقلاریندان اونلارا آللاهدان شفا دیله دی . دوکتور هئیت وفات ائدن ادیبلردن دوکتور زهتابی ، دوکتور نطقی ، پیر هاشمی ، گنجعلی صباحی ، علی کمالی و سهنددن آد چکه‌رک اونلارین احترامینا آیاغا قالخیب بیر دقیقه سکوت ائدیب بیر حمد و سوره اوخوماغی سمیناردا اشتراک ائدنلردن خواهیش ائتدی ؛ هامی آیاغا قالخاراق بو ایشی گؤردولر ، بیر آز سونرا حسین محمدخانی ( گونئیلی ) بیر یادداشت یازیب دوکتور هئیته وئریب رحمتلیک عبدالکریم منظوری خامنه‌ای‌نین آدی‌نین چکیلمه‌سی‌نین اونودولدوغونو بیلدیردی ؛ دوکتور هئیت دئدی : " آدام قوجالاندا فیکیری‌ده چاشیر " ، سونرا رحمتلیک منظوری خامنه ای‌دن چوخ احتراملا یاد ائتدی و عذر دیله‌دی .

سونرا دوکتور هئیت آرتیردی : " بو سمینار دیلیمیزین اورتوگرافیسی باره‌ده بیرینجی سمیناری‌دیر ، آنجاق سونونجوسو اولمایاجاق ، انشااله گلن ایلده بو سمیناری برگزار ائدک ، اگر من دیری قالسام منده اشتراک ائده رم ، آنجاق قالماسامدا هئچ غمیم یوخدور . "  بو زامان سالونا بیر غم سکوتو حاکیم اولدو  و سمینار مراسیمی سونا چاتدی .