+0 بَگَن (Bəyən)
مجلیس سئچگیلرینه رای وئرک یا یوخ؟!
بو گونلر بعضی دوستلار و میلّی فعاللار تئلفون و یا اینتئرنئت یولو ایله مندن سوروشورلار :
«قارشیمیزدا اولان و ۱۳۹۸ جی ایلین اسفند آیی سئچگیلرینه نئجه باخیرسینیز و بو ساحه‌ده سئچگیلره قاتیلیب - قاتیلماماغا فیکرینیز نه‌‌دیر؟»
جاواب اولاراق دئمه‌لییم:
«بیزیم هر بیریمیز مستقیل شخص اولاراق مستقیل فیکیر، تصمیم و دوشونجه‌یه صاحیبیک و هر بیریمیزین بیر موضوع و مسئله اوزه‌رینده مومکوندور فرقلی دوشونجه و تصمیمیز اولسون؛ بو مسئله عینی دئموکراسی و فیکیر آزادلیغی‌دیر و بئله بیر فیکیر و دوشونجه‌یه‌ده حؤرمت گؤزو ایله باخیب سایغی گؤسترمه‌لییک.»
آمما بیر فرد اولاراق منیم اؤزومه گلینجه:
سون هفته‌لرده و بئنزین باهالیغی اعلان اولدوقدان سونرا اؤلکه شهرلری‌نین چوخوندا، اؤزللیکله یوخسول طبقه‌نین بو باهالیغا اعتراضی نتیجه‌سینده چوخلو اؤلکه داشلارین جانلاری‌نین قوربان گئتمه‌سی و سایی بللی اولمایان یارالی و دوستاق اولدوقلاری، روحیه‌می ائله سارسیدیب و فیکیریمی مشغول ائدیب کی، یالنیز مجلیسه کیمین گئدیب گئتمه‌مه‌سینه یوخ، حتی بو مسئله‌دن اؤنملی اولان سیاسی مسئله‌لره بئله دوشونمک ایسته‌میرم!
یالنیز غربی آذربایجانین بعضی شهرلری، خصوص‌ایله اورمیه شهری‌نین مجلیس سئچگیلری‌ایله باغلی اؤزل دورومونو نظره آلاراق بعضی شخصلرین فیکیری ایله تاریخده اللری اورمیه و غربی آذربایجان تورکلری‌نین قانینا باتان شخصلرین فیکیرلرینین اوست اوسته دوشدویونو و اونلارا یاخین نسبتی اولان شخصلرین بو شهرده مجلیس نماینده‌لیگینه آدای اولدوقلارینی ائشیتدیکده چوخ نیگران اولورام!
او اوزدن بیر شخص اولاراق اورمیه‌ده و غربی آذربایجانین بعضی شهرلرینده سئچگی مسئله‌سینه سیاسی مسئله‌دن داها آرتیق بیر کیملیک و هویت مسئله‌سی کیمی اؤنم وئرمه‌یی لازیم و واجیب گؤرورم!
حسن راشدی: ۱۷ آذر ۱۳۹۸
https://t.me/yurddash